හමුදා භට පිරිස් ‘ප්‍රමාණගත කිරීම’ සහ යුද හමුදා කඳවුරු ‘ඇතැම් ග්‍රාමීය පුදබිම් වලින් ඉවත් කරගැනීම’ ජාතික ආරක්ෂාවට, කලාපීය ආරක්ෂාවට සහ පූජනීය ස්ථානවලට තර්ජනයක් නොවන බව ආරක්ෂක අමාත්‍යාංශයේ ලේකම් පාර්ලිමේන්තුවට දැනුම් දී තිබේ.
ආරක්ෂක අමාත්‍යාංශයේ ලේකම්, විශ්‍රාමික මේජර් ජෙනරාල් කමල් ගුණරත්න ඒ් බව දැනුම් දී ඇත්තේ ජාතික ආරක්ෂාව පිළිබඳ ආංශික අධීක්ෂණ කාරක සභාව පසුගිය 7 වැනිදා පාර්ලිමේන්තුවේදී රැස් වූ අවස්ථාවේදීය.
යුධ හමුදා භට පිරිස් නියමිත ප්‍රමාණගත කිරීම යනු භට පිරිස් අඩු කිරීමක් නොවන බව පෙන්වා දෙන ආරක්ෂක අමාත්‍යාංශයේ ලේකම් හමුදාව නියමිත ‘ප්‍රමාණගත කිරීම’ යන්නෙන් අදහස් කළ දෙයෙහි තේරුම කුමක්දැයි පැහැදිලි කළ බවක් පාර්ලිමේන්තුවේ සන්නිවේදන දෙපාර්තමේන්තුව නිකුත් කළ නිවේදනයේ සදහන් කර නැත.
ජාතික ආරක්ෂාව පිළිබඳ ආංශික අධීක්ෂණ කාරක සභාවේ සභාපති පාර්ලිමේන්තු මන්ත්‍රී ආචාර්ය සරත් වීරසේකරගේ ප්‍රධානත්වයෙන් පැවැති කමිටු රැස්වීමට රාජ්‍ය අමාත්‍ය ප්‍රමිත බණ්ඩාර තෙන්නකෝන්, පාර්ලිමේන්තු මන්ත්‍රීවරයන් වන ජොන්ස්ටන් ප්‍රනාන්දු, චන්දිම වීරක්කොඩි, යූ.කේ.සුමිත් උඩුකුඹුර, ආචාර්ය,මේජර් ප්‍රදීප් උඳුගොඩ, මේජර් සුදර්ශන දෙනිපිටිය, නිමල් පියතිස්ස සහ ආරක්ෂක හා විදේශ කටයුතු අමාත්‍යාංශවල ලේකම්වරයන්, අදාළ අමාත්‍යාංශවල ජ්‍යෙෂ්ඨ නිලධාරීන්, ආරක්ෂක මාණ්ඩලික ප්‍රධානී, ත්‍රිවිධ හමුදාපතිවරු, ඇතුළු පිරිසක් එක්ව තිබේ.
පාර්ලිමේන්තුවේ ව්‍යවස්ථාදායක සේවා හා සන්නිවේදන අධ්‍යක්ෂ ජනකාන්ත සිල්වා පවසන්නේ මෙරට වාර්ගික කණ්ඩායම් අතර සහජීවනය ඇති කිරීම පිළිබඳව ද සිය අවධානය යොමු කළ කමිටුව, අන්තවාදය පරාජය කිරීම සදහා කටයුතු කිරීමේ අවශ්‍යතාව අවධාරණය කළ බවයි.
මෙරට හමුදා නිලධාරීන්ට පනවා ඇති ජාත්‍යන්තර සංචාරක තහනම හමුදා සාමාජිකයින්ගේ චිත්ත ධෛර්යයට බලපාන බැවින් එයට එරෙහිව පෙනී සිටීමේ අවශ්‍යතාවය සහ මෙම ගැටලුව විසඳීමට විදේශ කටයුතු අමාත්‍යාංශය මැදිහත් වීමේ අවශ්‍යතාව ද ජාතික ආරක්ෂාව පිළිබඳ ආංශික අධීක්ෂණ කාරක සභාවේ සභාපති පෙන්වා දී ඇත.
ශ්‍රී ලංකාව දෙමළ ජනතාවට එරෙහිව වර්ග සංහාරයක් සිදු කර ඇති බවට කැනේඩියානු පාර්ලිමේන්තුව ඒකමතිකව සම්මත කොට ගෙන ඇති යෝජනාවට විරෝධය පල කරන ආකාරය සම්බන්ධයෙන් දැනුම් දෙන ලෙස කමිටුව විදේශ අමාත්‍යාංශයෙන් ඉල්ලා තිබේ.
Facebook Comments
