රජයේ ආයතන අලාභ ලබන තත්ත්වයට පත්වීමට අවශ්‍ය ප්‍රමාණයට වඩා සේවකයන් බඳවා ගැනීමත් හේතුවක් වී ඇති බව මුදල් හා ජනමාධ්‍ය අමාත්‍යවරයා පවසයි.
“ඇත්තට ම දෙන්න දැන් රජයේ රස්සාවල් නෑ. 1000කට පඩි ගෙවන්න පුළුවන් රජයේ ඇතැම් කාර්යාලවල 3000ක් විතර සේවකයන් ඉන්නවා. රජයේ රස්සාවක් දෙන එකත් පවක්. මමත් ඒ පවේ කොටස්කරුවෙක්. රජයේ ආයතන අලාභ ලබන තත්ත්වයට පත් වෙන්න, ඒ ආයතන කඩා වැටෙන්න මේක හේතුවක්.”
රටේ තරුණ තරුණියන් රැකියා සොයා දේශපාලකයන් පසුපස යන යුගය අවසන් කළ යුතුව ඇති බව අමාත්‍ය මංගල සමරවීර මාතර උයන්වත්ත ප්‍රාදේශීය සංවර්ධන බැංකුවේ එන්ටප්‍රයිස් ශ්‍රී ලංකා කාර්යාලය විවෘත කිරීමේ අවස්ථාවට එක්වෙමින් කියා තිබේ.
මැදපෙරදිග රටවල් වැටුප සරිලන කම්කරු රැකියා මෙරට තුලද ඇති බව පෙන්වා දෙන මංගල සමරවීර ඇමැතිවරයා රටේ තරුණයන් මෙරට සමාගම් වල මැලිකම් දක්වන බවයි පවසන්නේ.
තරුණ පිරිස් මෙරට සමාගම් වල රැකියා අවස්ථා ලබා නොගන්නේ නම් ඒ සඳහා විදේශ කම්කරුවන් ගෙන්වන බවටද මුදල් හා ජනමාධ්‍ය අමාත්‍යවරයා අනතුරු අඟවා සිටියේය.
“මෙහෙ තියෙන සමාගම් දිගින් දිගට ම රැකියා අවස්ථා දෙන්න හැදුවත් භාර ගන්න පිරිස ඉදිරිපත් වෙන්නෙ නැත්තම් අපට සිද්ධ වෙනවා ඒ රස්සාවල්වලට චීනය, ඉන්දියාව සහ මියැන්මාරය වගේ රටවල්වලින් එන කම්කරුවන්ට ඉඩ දෙන්න. ඊට පස්සෙ ඔන්න රටින් කට්ටිය ගෙනාව කියල කෑ ගහන්න එපා.” යි ඇමැතිවරයා පැවසීය.
ත්‍රිරෝද රථ පැදවීමේ වයස් සීමාව අවුරුදු 35 දක්වා සීමා පැනවීමට සිය විරෝධය පල කල මංගල සමරවීර ඇමැතිවරයා “කෙනෙකුට රස්සාවක් කරන්න තියෙන අයිතියට අපි ඉඩ දෙන්න ඕනෙ.” යැයි වැඩි දුරටත් අවධාරණය කළේය.
Facebook Comments
