රාජිත සේනාරාත්න සෞඛ්‍ය අමාත්‍ය ධූරයෙන් සහ සම කැබිනට් ප්‍රකාශක ධුරයෙන් ඉවත් කරන ලෙසට කණ්ඩායම් ගණනාවක් ජනාධිපති මෛත්‍රීපාල සිරිසේනගෙන් ඉල්ලා තිබේ.
රජයේ වෛද්‍ය නිලධාරී සංගමය, ශ්‍රී ලංකා නිදහස් පක්ෂයේ අමාත්‍යවරුන් හා සිවිල් සංවිධාන කිහිපයකින් ඉදිරිපත් කළ එම ඉල්ලීමට ජනාධිපතිවරයා එකඟ වූ බවත් සෞඛ්‍ය සමුළුවකට සහභාගීවීම සඳහා රාජිත සේනාරත්න අමාත්‍යවරයා විදෙස්ගත වූ බැවින් මෙවර අමාත්‍ය ධූරය සංශෝධනය වීම සිදු නොවූ බව ජනාධිපති කාර්යාලය ආරංචි මාර්ග පවසයි.
ඉදිරියේදී සිදුවීමට නියමිත කැබිනට් සංශෝධනයේදී රාජිත ඇමතිවරයාට සෞඛ්‍ය ආමත්‍ය ධුරය අහිමි වීමේ ඉඩ කඩක් පවතින බවයි ජනාධිපති කාර්යාලයේ ප්‍රකාශකයෙක් කියා සිටියේ.
කැබිනට් තීරණ දැනුම් දීමේ මාධ්‍ය සාකච්ඡා අතරතුර ශ්‍රී ලංකා නිදහස් පක්ෂයට අහිතකර අයුරින් නිකුත් කළ ප්‍රකාශ හේතුවෙන් සම කැබිනට් ප්‍රකාශක ධූරයෙන් හා සෞඛ්‍ය අමාත්‍ය ධූරයෙන් රාජිත සේනාරත්න ඉවත් කරන ලෙසට ශ්‍රී ලංකා නිදහස් පක්ෂයේ අමාත්‍ය කණ්ඩායමද ජනාධිපතිවරයාගෙන් ඉල්ලා තිබුණී.
ගෝඨා ජනපති කර අගමැති වීම
රාජිත ඇමතිවරයාගේ හැසිරීම සම්මුතිවාදී ආණ්ඩුවේ පැවැත්මට විශාල අභියෝගයක් බව පෙන්වා දී ඇති සිවිල් සංවිධාන ඔහුගේ අරමුණ 2020 ගෝඨාභය රාජපක්ෂ ජනාධිපති කර එම රජයේ අගමැති වීම බව මෙන්ම රාජිත ඇමතිවරයා සෞඛ්‍ය අමාත්‍යංශය සිය පවුලේ බූදලයක් ලෙස භාවිතා කරන බවටද ජනාධිපතිවරයාට පැමිණිළි කර ඇත.
ඉදිරි සතියේ සිදු කිරීමට නියමිත කැබිනට් සංශෝධනයේදී අමාත්‍ය රාජිත සේනාරත්න සෞඛ්‍ය අමාත්‍යධූරයෙන් ඉවත් නොකළහොත් දැඩි ක්‍රියාමාර්ග රැසක් ගැනීමට රජයේ වෛද්‍ය නිලධාරී සංගමය, ශ්‍රී ලංකා නිදහස් පක්ෂය හා සිවිල් සංවිධාන විසින් දැනටමත් තීරණය කර ඇති බවද වාර්තා වේ.
තමන්ව සෞඛ්‍ය අමාත්‍යධුරයෙන් ඉවත් කර වෙනත් අයෙක් ඒ සඳහා පත් කර ගැනීමට දුම්කොළ සමාගම සහ ඖෂධ සමාගම් එක්ව කුමන්ත්‍රණය කරමින් සිටින බව ඇමති රාජිත මීට පෙර ප්‍රකාශ කර තිබුණි.
Facebook Comments
