යහපාලන කාලේ කොම්පියුටර් ගන්න ලංගමට කෝටි ගණන් වැඩිපුර වියදම්

ශ්‍රී ලංකා ගමනාගමන මණ්ඩලය 2018 වර්ෂයේ පරිගණක මිලදී ගැනීමේදී ඇස්තමේන්තුගත මුදල ඉක්මවා රුපියල් කෝටි නමයකට ආසන්න මුදලක් වියදම් කොට ඇති බව කෝප් කමිටුවේදී අනාවරණය වී තිබේ.

2018 වර්ෂයේ ප්‍රසම්පාදන සැලැස්ම අනුව ශ්‍රී ලංකා ගමනාගමන මණ්ඩලය පරිගණක 139 ක් හා ලැප්ටොප් යන්ත්‍ර 74ක් රුපියල් 15,290,000ක ඇස්තමේන්තුගත මුදලකට මිලදී ගැනීමට සැලසුම් කොට තිබුණද, එය ඉක්මවා පරිගණක යන්ත්‍ර මිලදී ගෙන ඇති බවයි ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව පවසන්නේ.

“මේ අනුව පරිගණක යන්ත්‍ර 800ක් හා ලැප්ටොප් යන්ත්‍ර 47ක් රුපියල් 113,303,750ක මුදලකට ප්‍රසම්පාදනය කර තිබුණි.”

මේ නිසා 2018 වර්ෂයේ පරිගණක මිලදී ගැනීමේදී ඇස්තමේන්තුගත මුදල ඉක්මවා රුපියල් 89,977,500ක මුදලක් ගමනාගමන මණ්ඩලයේ සාමාන්‍ය ගිණුම් හරහා වියදම් කොට ඇති බව කෝප් කමිටුවේදී අනාවරණය වී ඇත.

ඒ ලංකා ගමනාගමන මණ්ඩලයේ 2017 සහ 2018 වර්ෂ සඳහා වූ විගණකාධිපති වාර්තා සහ එහි වර්තමාන කාර්ය සාධනය පරීක්ෂා කිරීමට පාර්ලිමේන්තු මන්ත්‍රී මහාචාර්ය චරිත හේරත්ගේ ප්‍රධානත්වයෙන් කොප් කමිටුව ඔක්තෝබර් 6 වැනිදා පාර්ලිමේන්තුවේදී රැස් වූ අවස්ථාවේදී ය.

නියමිත ක්‍රමවේදයකින් තොරව මෙසේ මුදල් වියදම් කිරීම පිළිබඳව කෝප් කමිටුවේ සභාපතිවරයා සිය අප්‍රසාදය පළ කර තිබේ.

අබලන් ගැජට්

ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව වැඩි දුරටත් සදහන් කරන්නේ සුඛෝපභෝගී බස්රථ 125 ක් සඳහා කැමරා හා ජී.පී.එස්. (GPS) පද්ධති පවත්වාගෙන යාමට අවශ්‍ය උපකරණ මිලදී ගැනීම සඳහා ශ්‍රී ලංකා ගමනාගමන මණ්ඩලය පෞද්ගලික සමාගමක් සමඟ රුපියල් 33,628,840 ක ගිවිසුමකට එළඔ තිබු බවයි.

එහෙත් මෙම උපකරණවලින් කිහිපයක් හැර අනිත් උපකරණ නිවැරදිව ක්‍රියාකාරී මට්ටමේ නොපවතින බවත් කොප් කමිටුවේදී අනාවරණය වී ඇත.

විශේෂයෙන් මෙම බස් රථ වල සේවකයන් මෙම උප උපකරණවලට හිතාමතාම හානි සිදුකර ඇති අතර මේ පිළිබඳව පරීක්ෂණයක් සිදු කරමින් පවතින බවත් එහිදී පැමිණ සිටි නිලධාරීන් පවසා තිබේ.

ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව නිවේදනය කර ඇති පරිදි 2018 වර්ෂයේ ප්‍රසම්පාදන සැලැස්ම අනුව ශ්‍රී ලංකා ගමනාගමන මණ්ඩලය ඉලෙක්ට්‍රොනික් බස් ටිකට් මැෂින් 1000ක් රුපියල් මිලියන 35 ක් වැයකර කර මිලදී ගැනීමට සැලසුම් කර තිබූ අතර ඒ සඳහා අධ්‍යක්ෂක මණ්ඩලයේ අනුමැතියද ලබාගෙන තිබුණි.

“නමුත් 2018 වර්ෂයේ දී ඉලෙක්ට්‍රොනික් බස් ටිකට් මැෂින් 2000ක් මිලදී ගැනීමට රුපියල් 75,900,000ක මුදලක් වියදම් කර තිබුණි. ”

මේ අනුව අනුමැතියකින් තොරව ඉලෙක්ට්‍රොනික් බස් ටිකට් මැෂින් 1000ක් මිලදී ගෙන තිබූ අතර, මෙම මිලදී ගත් මැෂින් මගින් අපේක්ෂිත අරමුණු ඉටු නොවී තිබීම පිළිබඳවද කාරක සභාවේ අවධානය යොමුව තිබේ.

මේ නිසා මාසයක් ඇතුළත මේ පිළිබඳ වාර්තාවක් කෝප් කමිටුවට ලබාදීමට නිර්දේශ කළ බව ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව නිවේදනය කර ඇත.

එසේම අධ්‍යක්ෂ මණ්ඩලයේ තනතුරු කිහිපයක ගැටලු පිළිබඳව, ධාවනයේ පවතින 5921ක බස් රථ සංඛ්‍යාව පිළිබඳවද, දැනට ධාවනයෙන් ඉවත් වී ඇති බස් රථ සංඛ්‍යාව පිළිබඳවද, මෙන්ම වසර 10 ක් පැරණි බස් රථ 2742ක් පිළිබඳව ද මෙහිදී සාකච්ඡා කර තිබේ.

කාරක සභා රැස්වීමට අමාත්‍ය මහින්දානන්ද අලුත්ගමගේ, රාජ්‍ය අමාත්‍ය ඩී.වී. චානක, පාර්ලිමේන්තු මන්ත්‍රිවරු වන රවුෆ් හකීම්, ජගත් පුෂ්පකුමාර, මධුර විතානගේ, ප්‍රේම්නාත් සී. දොලවත්ත සහභාගී වී ඇත.

පාර්ලිමේන්තු මන්ත්‍රී ආචාර්ය හර්ෂ ද සිල්වා මෙම කමිටුවට සම්බන්ධ වී ඇත්තේ මාර්ග ගත ක්‍රමය ඔස්සේය.