බලහත්කාරයෙන් රඳවා ගෙන සිටින ලංකා ගුරු සංගමයේ ප්‍රධාන ලේකම් ජෝශප් ස්ටාලින් බැලීමට මුලතිව් කේපාපුලව් ගුවන් හමුදා කදවුර වෙත ගිය සංගමයේ නියෝජිත පිරිසට රජයේ හමුදා විසින් බාධා කර තිබේ.
ඔවුන් මෙසේ බාධාවන් හා හිරිහැර වලට අද දිනයේ (15) ලක්ව ඇත්තේ අනුරාධපුරයේ සිට කේපාපිලව් ගුවන් හමුදා කදවුර වෙත යන ගමනේ පුලියන්කුලම්,නෙදුන්කර්නී, වට්ට්‍රාපලෛ,සහ තන්නීර් උට්ටු හමුදා මුරපොළ හිදී ය. ඒ ගැන මාධ්‍යයට අදහස් දැක්වූ ලංකා ගුරු සංගමයේ උතුරු මැද පලාත් සම්බන්ධීකාරක ජේ.එම්. ඉල්ලියාස් ” හමුදා නිලධාරින් මග දිගටම ප්‍රශ්න අහලා අපිට හිරිහැර කළා. නිදහස් රටක ද අපි ජිවත් වෙන්නේ කියල සැක හිතෙනවා,” යි පැවසීය.
ගුරු නායකයා අත්තනෝමතික ලෙස රඳවාගෙන සිටීම පිළිබඳ පැමිණිලි විභාග කිරීමට ගිය මානව හිමිකම් කොමිසමේ නිලධාරීන්ටත් ගුවන් හමුදාව බාධා පමුණුවා ඇත.
ගුරු සංගම් නියෝජිතයන් පැමිණෙද්දී පළාත්බද මාධ්‍යවේදීන් වාර්තා කර සිටියේ මුලතිව් නගරයේත් කේපාපුලවූ කඳවුර අසලත් හමුදා රැකවල් තරකොට තිබෙන බව ය.
“අපි අපරාධකරුවො බලන්න ආවෙ නෑ. අපරාධකරුවන් බලන්න යන දේශපාලකයන්ට මෙහෙම හිරිහැර කරන්නේ නැහැ.මේ ගැන අපි රජය ට බරපතල විරෝධය හා අප්‍රසාදය පළ කරනවා,” යැයි පවසන ලංකා ගුරු සංගමයේ සභාපති ප්‍රියන්ත ප්‍රනාන්දු විවිධ බාධා මැද වුවද තම සංගමයේ ප්‍රධාන ලේකම් වරයා ඇතුලු අනෙකුත් වෘත්තීය සමිති නායකයන් වෙත තමන් රැගෙන ගිය දෑ ලබා දීමට හැකි වු බව සදහන් කරයි.
ගෲප් කපිතාන් ඒ.ඩී.ආර් ලියනාරච්චිගේ අණදෙන මුලතිව් කේපාපුලව් ගුවන් හමුදා කදවුරේ ගුරු සංගම් නායක ජෝශප් ස්ටාලින් ඇතුලු පිරිස බලහත්කාරයෙන් රඳවා ගෙන දැනට පුරා දින අටකි. ඔවුන්ට සම්බන්ධයෙන් රජයේ සෞඛ්‍ය බලධාරීන් විසින් කරන ලද පී.සී.ආර් පරීක්ෂා වෙන් තහවුරු වී ඇත්තේ එම පිරිස කොවිඩ් ආසාදිතයන් නොවන බවය.
ලංකා ගුරු සංගමයේ උතුරු මැද පලාත් සම්බන්ධීකාරක ජේ.එම් ඉල්ලියාස් මාධ්‍යයට කියා සිටියේ ” පී.සී.ආර් ටෙස්ට් එක නෙගටිව් ඒත් ස්ටාලින් සහෝදරයා නිදහස් කරන්නේ නෑ. පිටරට ඉදන් එන කට්ටිය දවස් දෙකෙන් ගෙදර යවනවා. ආණ්ඩුව මේ කරන්න පාපතර වැඩක්,” බවය.
ගුවන් හමුදාපතිට කල් දෙයි
අධ්‍යාපනයේ හමුදාකරණයට එරෙහිවීම නිසා හමුදා අඩස්සියට පත් කර ඇති ගුරු නායකයා ඇතුළු විරෝධතා කරුවන් නීති විරෝධී ලෙස රඳවා තබා ගැනීම පිළිබඳව පැවැත්වෙන විමර්ශනයට ගුවන් හමුදාව සහාය දී නැතැයි කනගාටුව පලකරන ශ්‍රී ලංකා මානව හිමිකම් කොමිසම ගුවන් හමුදාපති එයාර් මාර්ෂල් සුදර්ශන පතිරණට ඒ ගැන කරුණු දැක්වීමට පස් දිනක් කල් දී තිබේ.
ශ්‍රී ලංකා මානව හිමිකම් කොමිෂන් සභාවට ලැබුණු පැමිණිල්ලක් අනුව මූලික විමර්ශනයක් සඳහා කොමිසමේ යාපනය සම්බන්ධීකාරක ටී.කනගරාජ් මහතා ඇතුළු නිලධාරීන් පිරිසක් ජූලි 9 දා මුලතිව් ගුවන් හමුදා කඳවුරට ගිය අවස්ථාවේ විමර්ශනයට අවශ්‍ය තොරතුරු කඳවුරේ නිලධාරීන් විසින් ලබා දී නොමැති බව, කොමිසමේ සභාපති ආචාර්ය ජගත් බාලසුරිය විසින් ගුවන් හමුදා ප්‍රධානියාට යවා ඇති ලිපියක දැක්වේ.
එම සහාය නොදැක්වීම සම්බන්ධයෙන් නිමල් කරුණාසිරි කොමසාරිස්වරයා විසින් දැනුම් දීමෙන් අනතුරුව ගුවන් හමුදාපතිගේ උපදෙස් පරිදි ජූලි 13 දා ගුවන් හමුදා කඳවුරට ගිය කොමිසමේ නිලධාරීන්ගේ විමර්ශනයට දෙවැනි වතාවටත් සහාය නොදුන් බව මානව හිමිකම් ක්මිසමේ සභාපාතිගේ ලිපිය පවසයි.
Facebook Comments
