දශක හතරකට ආසන්න කාලයක් තිස්සේ නැගෙනහිර පළාත තුළ ක්‍රියාත්මක වන උප ප්‍රාදේශීය ලේකම් කාර්යාලයක්, පුර්ණ බලතල සහිත ප්‍රාදේශීය ලේකම් කාර්යාලයක් බවට පත් කරමින් එම ප්‍රදේශයේ පාරම්පරික ජීවත් වන දෙමළ ජනතාව මුහුණ දී සිටින පීඩාවන්ගෙන් ඔවුන් නිදහස් කිරීමට කටයුතු නොකරන්නේ මන්දැයි උතුරේ දෙමළ ජනතා නියෝජිතයෙක් පාර්ලිමේන්තුවේදී අගමැතිවරයාගෙන් ප්‍රශ්න කර තිබේ.
දෙමළ ජාතික ජනතා පෙරමුණේ (TNPF) නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් නොවැම්බර් 28 වැනිදා පාර්ලිමේන්තුවේ දී පෙන්වා දුන්නේ අම්පාර දිස්ත්‍රික්කයේ කල්මුණේ උතුර උප ප්‍රාදේශීය ලේකම් කාර්යාලය, ප්‍රාදේශීය මහ ලේකම් කාර්යාලයක් ලෙසට උසස් නොකිරීම නිසා එම ප්‍රදේශයේ ජීවත් වන දෙමළ ජනයා ගැටළු රැසකට මුහුණ දී සිටින බවයි.
“දෙමළ ජනතාවට අවශ්‍ය පරිපාලන කටයුතු කරගෙන යෑමට නොහැකි තත්වයක් ඇති වෙලා තියනවා. දේශපාලන හේතු මත පලිගැනීම් සිදු වෙමින් පවතිනවා. දෙමළ ජනතාව බරපතල හානි වලට මුහුණ දෙනවා.”
පළාත් බද වාර්තාකරුවන් පවසන පරිදි අම්පාර දිස්ත්‍රික්කයේ, කල්මුණේ උතුර උප ප්‍රාදේශීය ලේකම් කාර්යාලය 1986 වසරේදී ස්ථාපනය කර තිබෙන අතර 1993 වසරේ අමාත්‍ය මණ්ඩල රැස්විමේදී එම උප කාර්යාලය, ප්‍රාදේශීය මහ ලේකම් කාර්යාලයක් බවට පරිවර්තනය කිරිමට තීරණය වී තිබේ.
එම තීරණය ක්‍රියාත්මක කරන ලෙස එවකට ස්වදේශ කටයුතු හා පළාත් රාජ්‍ය ලේකම් ලෙස කටයුතු කළ එස්. ඒ. ඕබඩගේ විසින් කල්මුණේ ප්‍රාදේශීය ලේකම්වරයාට ලිඛිතව දැනුම් දී ඇතත් එය මෙතෙක් ඉටු වී නැත.
කල්මුණේ උතුරු කොට්ඨාසයේ ජීවත් වන දෙමළ ජනයා පවසන්නේ සිය පරිපාලන අවශ්‍යතා ඉටු කරගැනීම වෙනුවෙන් බොහෝ අවස්ථා වලදී මුස්ලිම් ජනයා වැඩි වශයෙන් ජීවත් වන ප්‍රදේශයක පිහිටි කල්මුණේ දකුණ ප්‍රදේශීය ලේකම් කොට්ඨාසය වෙත යෑමට සිදු වන බවයි.
කල්මුණේ උතුර උප ප්‍රාදේශීය ලේකම් කාර්යාලයට මුදල් සහ ඉඩම් බලතල අහිමි අතර සංවර්ධන කටයුතුවල දී දෙමළ ප්‍රදේශවලට මුදල් නෙැලැබිමේ තත්වයකට මුහුණ දී සිටින බවත් ඔවුහු පවසති.
දෙමළ ජාතික ජනතා පෙරමුණේ (TNPF) නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් නොවැම්බර් 28 වැනිදා පාර්ලිමේන්තුවේ දී වැඩි දුරටත් ඉල්ලා සිටියේ ගණකාධිකාරීවරුන් ඇතුළු වැදගත් පත්වීම් ලබා දී කල්මුණේ උතුරු උප ප්‍රාදේශීය ලේකම් කාර්යාලය පුර්ණ බලතල සහිත ප්‍රාදේශීය ලේකම් කාර්යාලයක් බවට පත් කරන ලෙසයි.
පාරම්පරිකව දෙමළ ජනයා ජීවත් වන ප්‍රදේශයක ප්‍රදේශිය ලේකම් කොට්ඨාසයක් අනුමත කිරීමට ඇති නොහැකියාව කුමක්දැයි දෙමළ ජනතා නියෝජිතයා මෙහිදී අගමැතිවරයා ප්‍රමුඛ පළාත් පාලන අමාත්‍යාංශ වලින් ප්‍රශ්න කළේය.
“උතුරු නැගෙනහිරත් දෙමළ ජනතාව ජීවත්වන අනෙකුත් ප්‍රදේශවලත් මුස්ලිම් කොට්ඨාස සහ සිංහල කොට්ඨාස පිහිටුවලා තියනවා. අනවසර සංක්‍රමණ සිදුවී ඇති ස්ථාන නීත්‍යනුකුල කිරීමට කොට්ඨාස හදන්න පුළුවන්නම් පාරම්පරිකව දෙමළ ජනයා ජීවත් වන ප්‍රදේශයක, ප්‍රාදේශීය ලේකම් කොට්ඨාසයක් අනුමත කරන්න ඔබලාට බැරි ඇයි කියන මේ ප්‍රශ්නය අගමැතිතුමාගෙන් සහ ඔහු යටතේ තියන රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශ වලින් අහන්න කැමතියි.”
කල්මුණේ උතුරු උප ප්‍රාදේශීය ලේකම් කාර්යාලය යටතේ ග්‍රාම සේවා වසම් 29 පවතී.
Facebook Comments
