ජාත්‍යන්තර ක්‍රිකට් කවුන්සිලය විසින් ශ්‍රී ලංකාවට පනවා ඇති ක්‍රිකට් තහනම මධ්‍යයේ මෙරට ක්‍රිකට් ක්‍රීඩකයින් පිළිබඳ නැවත වතාවක් බොහෝ දෙනෙකුගේ අවධානය යොමුව තිබේ.
ඒ, (නොවැම්බර් 28 වෙනිදා) අබුඩාබි හිදී ආරම්භ වූ T-10 තරගාවලිය හේතුවෙනි.
ශ්‍රී ලංකා ක්‍රිකට් කණ්ඩායමේ ක්‍රීඩකයින් මෙවර අබුඩාබි T-10 තරගාවලිය ආරම්භයේදීම දක්ෂතා අතරට පැමිණීමට සමත්ව ඇත.
දක්ෂතා පෙන්නු ශ්‍රී ලංකා ක්‍රීඩකයින් කවුද ?
අබුඩාබි T-10 තරගාවලියේ ආරම්භක දිනයේදී ශ්‍රී ලාංකික ක්‍රීඩකයින් දෙදෙනෙකු පෙන්වූ දක්ෂතා පිළිබඳ බොහෝ දෙනෙකුගේ අවධානය යොමුවිය.
නොදර්න් වොරියර්ස් සහ මොරිස්විල් සෑම්ප්‍ ආමි කණ්ඩායම් දෙක අතර පැවති තරගයේදී කඩුලු ත්‍රිත්වයක් දවා ගැනීමට ඇන්ජලෝ මැතිව්ස් සමත් විය.
මෙවර තරගාවලියේදී කඩුලු ත්‍රිත්වයක් දවා ගත් පළමු පන්දු යවන්නා වන්නේ ඇන්ජලෝ මැතිව්ස්ය.
මැතිව්ස් ගේ මෙම දක්ෂ පන්දු යැවීම හේතුවෙන් නොදර්න් වොරියර්ස් කණ්ඩායමට ලකුණු 9 ක ජයක් හිමිවිය.
මේ අතර තවත් තරගයකදී නිව් යෝර්ක් ස්ට්‍රයිකර්ස් කණ්ඩායම් නියෝජනය කළ චාමික කරුණාරත්න ලකුණු 25 කට කඩුලු 3ක් දවා ගැනීමට සමත් විය.
අබුඩාබි T10 තරගාවලියේ සිය පළමු අර්ධ ශතකය වාර්තා කිරීමට කුසල් ජනිත් පෙරේරා සමත්වීමද විශේෂ සිදුවීමක් විය.
(නොවැම්බර් 29 වෙනිදා) බෙංගාල් ටයිගර්ස් කණ්ඩායම සමග පැවති තරගයේදී නිව් යෝර්ක් ස්ට්‍රයිකර්ස් කණ්ඩායම නියෝජනය කරනු ලබන කුසල් ජනිත් පෙරේරා අර්ධ ශතකයක් රැස් කිරීමට සමත් විය.
කුසල් පෙරේරා පන්දු 20 කදී හයේ පහරවල් දෙකක් සහ හතරේ පහරවල් 07ක් එල්ල කරමින් සිය අර්ධ ශතකය රැස් කරන ලදී.
මේ අතර එම තරගයේදී පන්දු වාර දෙකක් තුලදී ලකුණු 22 කට කඩුලු 03ක් දවා ගත් නිව් යෝර්ක් ස්ට්‍රයිකර්ස් කණ්ඩායම නියෝජනය කළ චාමික කරුණාරත්න තරගයේ වීරයා ලෙස සම්මාන දිනා ගත්තේය.
T-10 තරගාවලියේ දී නායකත්වය හිමිවූ ශ්‍රී ලාංකික ක්‍රීඩකයින් කවුද ?
මෙවර අබුඩාබි T-10 තරගාවලිය සඳහා කණ්ඩායම් 8ක් ක්‍රීඩා කරනු ලබයි.
එලෙස ක්‍රීඩා කරන කණ්ඩායම් අතරින් කණ්ඩායම් දෙකක නායකත්වය දරනු ලබන්නේ ශ්‍රී ලාංකික ක්‍රීඩකයින් වීම ද විශේෂත්වයකි.
නොදර්න් වොරියර්ස් කණ්ඩායමේ නායකත්වය ඇන්ජලෝ මැතිව්ස්ට හිමිව ඇති අතර චරිත් අසලංක චෙන්නායි බ්‍රේව් කණ්ඩායමේ නායකත්වය දරනු ලබයි.
මෙවර අබුඩාබි T-10 තරගාවලියට ක්‍රීඩා කරන ලාංකික ක්‍රීඩකයින් කවුද ?
අබුඩාබි T-10 ක්‍රිකට් තරගාවලිය සඳහා මෙවර ශ්‍රී ලංකා ක්‍රීඩකයින් රැසක් එක්ව සිටියි.
තරගාවලිය සඳහා ක්‍රීඩා කරන කණ්ඩායම් අනුව ඒවා නියෝජනය කරනු ලබන ශ්‍රී ලාංකික ක්‍රීඩකයින් පහතින් සඳහන් වේ.
නිව්යෝර්ක් ස්ට්‍රයිකර්ස් කණ්ඩායම:
චාමික කරුණාරත්න, කුසල් පෙරේරා, ලසිත් කෘස්පුල්ලේ සහ නිරෝෂන් දික්වැල්ල.
මොරිස්විල් සෑම්ප්‍ ආමි කණ්ඩායම :
මහිෂ් තීක්ෂණ.
ටීම් අබුඩාබි කණ්ඩායම :
බිනුර ප්‍රනාන්දු.
ඩෙකෑන් ග්ලැඩියේටර්ස් කණ්ඩායම:
නුවන් තුෂාර
දිල්ලි බුල්ස් කණ්ඩායම:
දුනිත් වෙල්ලාලගේ
නොදර්න් වොරියර්ස් කණ්ඩායම:
ඇන්ජලෝ මැතිව්ස් (නායක).
චෙන්නායි බ්‍රෙව්ස් කණ්ඩායම:
චරිත් අසලංක (නායක), භානුක රාජපක්ෂ.
බෙංගාල් ටයිගර්ස් කණ්ඩායම:
කුසල් මෙන්ඩිස්, මතිෂ පතිරණ.දසුන් ශානක සහ අවිශ්ක ප්‍රනාන්දු.
අබුඩාබි T-10 තරගාවලියේ ආරම්භය
2017 වසරේදී අබුඩාබි හිදී ආරම්භ වූ මෙම T-10 තරගාවලියේ මේ දක්වා තරගාවලි 06ක් පවත්වා ඇත.
මෙම වසරේදී මෙම තරගාවලිය පවත්වනු ලබන්නේ 7 වන වරටය.
තරගයකදී කණ්ඩායමක් පන්දු වාර 10කට පමණක් සිමාවන අතර විස්සයි 20 තරග ආකෘතියට සමාන දැඩි උදෙවේගකර හා තරගකාරි ස්වභාවයකින් යුතු වීම හේතුවෙන් ප්‍රේක්ෂකයින් මෙම ක්‍රිකට් තරග නැරඹීම සඳහා දැඩි උනන්දුවක් දක්වනු ලබයි.
2017 වසරේ දී මෙම T-10 තරගාවලියේ ආරම්යේ සිට 2021 වසර දක්වා පැවති තරගාවලි සඳහා කණ්ඩායම් 6ක් ඊට සහභාගි විය.
2021 වසරෙන් පසුව අබුඩාබි T-10 තරගාවලිය සඳහා තරග කරන කණ්ඩායම් සංඛ්‍යාව 8ක් දක්වා ඉහළ දැමිණි.
BBC සිංහල සේවය
Facebook Comments
