රංජන් ගේ “ලීක් ටේප්” සමග රටටම අනතුරු ඇඟවීමක්

0

අගමැති, රාජ්‍ය නිලධාරින් සහ විනිසුරන් ඇතුලු විවිධ පුද්ගලයන් සමග හිටපු රාජ්‍ය අමාත්‍ය රංජන් රාමනායක විසින් කරන ලද කතාබහ බව කියැවෙන හඬපට ප්‍රසිද්ධියට පත් වීමත් සමග පුද්ගලික විද්‍යුත් දත්ත ප්‍රවේසම් කරගන්නා ලෙස තොරතුරු තාක්ෂණ විෂය හා සම්බන්ධ ශ්‍රී ලංකාවේ ප්‍රවීණයන්ගේ සංවිධානය අනතුරු අඟවා සිටී.

තමන්ගේ පෞද්ගලික දත්ත ආරක්ෂා කරගැනීමට මුරපදයක් යොදාගැනීම වැනි ආරක්‍ෂිත ක්‍රමවේදයක් අවම වශයෙන් අනුගමය කරන ලෙසයි ශ්‍රී ලංකා තොරතුරු තාක්ෂණ සංගමයේ සභාපති රජීව් යසිරු කුරුවිටගේ මැතිව් නිවේදනයක් නිකුත් කරමින් ඉල්ලා සිටින්නේ.

“මේ දිනවල විවිධ පුද්ගලයන්ගේ පෞද්ගලික දුරකථන සංවාද සමාජ මාධ්‍ය වෙබ් අඩවි හරහා ඉතා වේගයෙන් ජනතාව අතර හුවමාරු වන බවක් දක්නට ලැබෙන අතර මේ නිසා මේ දිනවල ඔබගේ පෞද්ගලික දත්ත සුරක්ෂිත කරගැනීමට ක්‍රියාමාර්ග ලබාගන්නා ලෙස අප ශ්‍රී ලංකා තොරතුරු තාක්ෂණ සංගමය ලෙස ශ්‍රී ලාංකික ජනතාවට දැනුම් දෙමු.”

සමාජ මාධ්‍ය ගිණුම් වල මුරපද අන් අය සමග හුවමාරු කරනොගන්නා ලෙස ද ශ්‍රී ලංකා තොරතුරු තාක්ෂණ සංගමය වැඩි දුරටත් ප්‍රකාශ කර ඇත.

දුරකතන සංවාද පටිගත කිරීම සහ ඒවා ප්‍රචාරය කිරීම සම්බන්ධයෙන් රංජන් රාමනායක ප්‍රසිද්ධියක් උසුලන්නෙකි.

Facebook Comments