මාකඳුරේ මධුෂ් හා කංචිපානි ඉම්රාන් යන පාතාල සාමාජිකයන් සමඟ තමන්ගේ හිතවත්කමක් ඇතැයි පෙන්වා තම ජීවිතයට හානියක් සිදු කිරිමට පිරිසක් කුමන්ත්‍රණයක් සිදුකරමින් සිටින බවට එක්සත් ජාතික පක්ෂයේ මන්ත්‍රීවරයෙක් පවසා තිබේ.
මධුෂ්ට විරුද්ධ පාතාල කල්ලි ලවා තමන්ට අනතුරක් සිදුකිරීම මෙම කුමන්ත්‍රණකරුවන්ගේ අරමුණ වී තිබෙන බවයි එජාප මන්ත්‍රී මුජිබර් රහුමාන් පෙන්වා දෙන්නේ.
අදාළ කුමන්ත්‍රණය පිළිබඳව කොළඹ අපරාධ කොට්ඨාසයට, විදුලි සංදේශන නියාමන කොමිෂන් සභාවට සහ කථානායක කරු ජයසූරිය වෙත පැමිණිළි කර ඇති බව 28 බ්‍රහස්පතින්දා පැවති මාධ්‍ය හමුවක දී හෙතෙම කියා සිටියේය.
මෙම කුමන්ත්‍රණකරුවන් විසින් මධුෂ් හා ඉම්රාන්ගේ මුහුණු සමග තමන් ඇතුළත් ඡායාරූපයක් සකස් කර කංචිපානි ඉම්රාන් තමන්ට අයත් ගොඩනැගිල්ලක විවිධ කටයුතු සිදුකරන බවට ව්‍යාජ කරුණු ෆේස්බුක් සමාජ ජාලයේ ප්‍රසිද්ධ කර ඇති බව ද මන්ත්‍රීවරයා සඳහන් කළේය.
මීට අමතරව පසුගිය දිනකදී මරණීය තර්ජන එල්ල කරමින් දුරකථන ඇමතුමක් ද ලැබුණ බව මන්ත්‍රී මුජිබර් රහුමාන් පැවසීය.
මැද කොළඹ ආසනයේ වසර 20ක් තිස්සේ දේශපාලනය කරන තමන්ට විරුද්ධව කිසිදු පොලීසියක පැමිණිල්ලක් සටහන් වී නොමැති බව මෙන්ම මහින්ද රාජපක්ෂ පාර්ශ්වය විවේචනය කිරීම නිසා මෙවැනි තර්ජනවලට මුහුණ දීමට සිදුව ඇති බවට ක්සත් ජාතික පක්ෂයේ මුජිබර් රහුමාන් මන්ත්‍රීවරයා කියා සිටියේය.
Facebook Comments
