රටේ නායකයන්ට “කොන්ද පණ මදි” යනුවෙන් කොළඹ අගරදගුරු හිමිපාණන් පාස්කු ප්‍රහාරයෙන් තුන් මසකට පසුව විවෘත කළ දෙව් මැදුරේ කළ දේශනාව ජනාධිපතිවරයාගේ දැඩි දෝෂ දර්ශනයට ලක්ව තිබේ.
එය තමන්ට හා අගමැතිවරයාට “හැංගිලා ගැහීමක්” යනුවෙන් හැඳින්වු ජනාධිපති මෛත්‍රීපාල සිරිසේන අගරදගුරු මැල්කම් රංජිත් හිමි නමින් හැඳින්වීමෙන්ද වැළකී සිටියේය.
“විදේශීය බලවේගවලට අත පොවන්න ඉඩ නොදෙන්න අපේ නායකයන්ගේ කොන්ද පණ මදි,” යි හෙලා දුටු කාදිනල් මැල්කම් රංජිත් හිමියන් “එක්සත් ජාතීන්ගේ සංවිධානය, මානව හිමිකම් සංවිධාන සතුටු කරන්න බුද්ධි අංශ අඩපන කර විනාශ කර දැම්මා,” යි මීගමුව කටුවාපිටිය දේවස්ථායේදී දේශනාවක් පවත්වමින් රජය දෝෂ දර්ශනයට ලක් කර තිබුනි.
“හැංගිලා ගහන්න එන්න ඕනේ නෑ. මාත් එක්ක විවෘත සාකච්ඡාවකට එන්න කියලා මම විවෘතව ආරාධනය කරනවා. හැංගිලා ගහන අයට මාධ්‍ය ඉස්සරහ මම ආරාධනය කරනවා,” යි ජනාධිපති මෛත්‍රිපාල සිරිසේන ප්‍රකාශ කළේ හමුදා සෙබළුන්ට සුබසාධන ප්‍රදානය කිරීම සඳහා සුගතදාස ගෘහස්ත ක්‍රීඩාංගණයේ පැවති උත්සව සභාවක් අමතමිනි.
පාස්කු ඉරිදා ප්‍රහාරය සම්බන්ධ වගකීම කාදිනල් මැල්කම් රංජිත් විසින් ආණ්ඩුවට පැවරීම “දේශපාලන න්‍යාය පත්‍රයකට යටවීමක්” ලෙස කෝපයෙන් යුතුව ජනාධිපතිවරයා විසින් හෙලා දකින ලදී.
තමන්ට විරුද්ධව විවේචන ගෙන එන්නේ “නොයෙකුත් අපරාධ කාරයෝ, මත්කුඩු කාරයෝ” සමග හවුල් වෙමින් බව ජනාධිපතිවරයා කාදිනල් මැල්කම් රංජිත්ට චෝදනාවක්ද එල්ල කළේය.
Facebook Comments
