මන්නාරම සමූහ මිනීවලේ කාලය ගැන තීන්දු ගැනීමට අලුතින් දේශීය විමර්ශනයක්

ශ්‍රී ලංකාවෙන් මේතාක් හමුවු විශාලතම සමුහ මිනිවල සම්බන්ධයෙන් නිකුත් කළ එක්සත් ජනපද වාර්තාව ප්‍රතික්ෂේප කරන මෙරට මහාචාරයවරයකු එම අස්ථි කොටස් සමග හමුවූ භාණ්ඩ පිළිබඳව නැවත පරික්ෂා කිරීම ආරම්භ කර තිබේ.

ඇමරිකා එක්සත් ජනපදය විසින් නිකුත් කරන ලද වාර්තාව නිසාවෙන් තුන් මසකට ඉහතදී නවතා දමන ලද මන්නාරම සතොස සමූහ මිනීවළේ නව පරීක්ෂණ කටයුතු මන්නාරම මහේස්ත්‍රාත්වරයාගේ නියෝග මත ෆ්ලොරීඩාවේ, මියාමි හි පිහිටි බීටා ඇනලිටික්ස් ආයතනය නිකුත් කළ කාබන් පරීක්ෂණ වාර්තාව ප්‍රතික්ෂේප කරන කැළණිය විශ්ව විද්‍යාලයට අනුබද්ධිත පුරාවිද්‍යා පශ්චාත් අධ්‍යයන අංශයේ මහාචාර්ය රාජ් සෝමදේවටය.

කැණීම් සමග ගොඩගත් 700 කට අධික විවිධ භාණ්ඩ ඇසුරින් ජූනි මස අග භාගයේ සිට ආරම්භ කරන ලද පුරාවිද්‍යාත්මක නව කාල නීර්ණ පරික්ෂණ වාර්තාව එළැඹෙන නොවැම්බරයේදි මන්නාරම අධිකරණයට බාරදීම තම අපේක්ෂාව බව මහාචාර්යවරයා ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS)සංවිධානයේ කිත්සිරි විජේසිංහ හට ප්‍රකාශ කර ඇත.

අපරාධයක් සිදුවූ ස්ථානයක් ලෙස නිගමනය කොට තිබෙන මන්නාරම සතොස සමූහ මිනීවළෙන් ගොඩගත් අස්ථි කොටස්වල කාලය නිගමනය කර ගැනීම සඳහා සාම්පල කිහිපයක් අධිකරණ නියෝග පරිදි පසුගිය ජනවාරි මාසයේදි ෆ්ලොරීඩාවේ, මියාමි හි පිහිටි බීටා ඇනලිටික්ස් ආයතනය වෙත භාර දෙනු ලැබුණි. ඔවුන් විසින් 2019 පෙබරවාරි 21 දා එවන ලද කාබන් කාල නීර්ණ පරීක්ෂණ වාර්තාවට අනුව අස්ථි කොටස් ක්‍රිස්තු වර්ෂ 1404 ත් 1635 ත් අතර සියවස් ගණනක කාල පරාසයකට අයත් බවට නිගමනය කර තිබේ.

නමුත්, මහාචාර්ය රාජ් සෝමදේව එකම පස් තට්ටුවකින් ගත් ඇටකටුවලින් පරම්පරා ගණනාවක් පුරා දිවෙන කාල පරාසයක් දක්වන එක්සත් ජනපද විශ්ලේෂක වාර්තාව ප්‍රතික්ෂේප කරයි.

“මගේ දැනීමේ හැටියට මේ අස්ථි කොටස් එතරම් පැරණි ඒවා නෙමෙයි. අපිට පේන හැටියට සමූහ මිනිවළේ තියෙන්නේ එකම පස් ස්ථරයක්. එකම පස් ස්ථරයක් තියෙන තැනක කාලය වෙනස් වෙන්න බෑ. එකම පස් ස්ථරයක්, පසේ එකම වර්ණයක් එකම සංයුතියක් තියන පස් තට්ටුවක් තුළ තිබෙන ඇටසැකිලිවලට අවුරුදු 241 ක පරතරයක් තියෙන දිනයක් ලැබෙනවා කියන එක තර්කානුකූල නැහැ. ඒකෙන් පේන්නේ යවපු සාම්පලවල යම් දෝෂයක් තියෙනවා තියෙන බවකයි. ඒ නිසායි මම කියන්නේ මේ වාර්තාව ගැටළු සහගතයි කියලා.” මහාචාර්යවරයා JDS සංවිධානය හා කියා තිබේ.

කාල නිර්ණය තහවුරු කරවා ගැනීම සඳහා මිනිස් අස්ථි සාම්පල කොටස් බීටා ඇනලටික්ස් පරීක්ෂණාගාරය වෙත යැවිමට පෙරම මහාචාර්ය රාජ් සෝමදේව ඒ සම්බන්ධව ඔහුගේ විරෝධතාවය ප්‍රකාශ කර තිබුණි.

මන්නාරම සමූහ මිනිවළ උපරිම වශයෙන් දශක තුනකට වඩා පැරණි නොවන බවට අස්ථි සම්පල ඇමරිකාවට යැවීමට පෙර මහාචාර්යවරයා JDS සංවිධානය හා කියා තිබු අතර ඔහු තවමත් සිටින්නේ එම අදහසේ බවයි කිත්සිරි විජේසිංහ වාර්තා කරන්නේ.

“මට ඒ මතය ප්‍රකාශ කරන්න හේතු වුණේ මිනීවළ ආශ්‍රිතව ඇට සැකිලි සමීපයේ තිබුණු අපද්‍රව්‍ය වළක් පරික්ෂා කරලායි. අපද්‍රව්‍ය වළේ පස්වල තත්ත්වය, එහි කැපුම් ස්වභාවය, අපද්‍රව්‍යවල තත්ත්වය පරික්ෂා කරලායි මම ඒ නිගමනයට එළඹුනේ.”

මන්නාරම සමූහ මිනිවළේ මානව අස්ථි කොටස්වල කාලය නිගමනය කරමින් මේ වන විට එක් වාර්තාවක් නිකුත්ව තිබියදී, පුරාවිද්‍යාත්මක ද්‍රව්‍ය ඇසුරින් නව වාර්තාවක් සකස් කරන්නේ නම්, එම වාර්තා දෙකෙන් ‘නිවැරදිම’ සහ ‘නිල වාර්තාව’ ලෙස පිළිගැනීමට සිදුවන්නේ කුමන එකදැයි තීරණය කිරීම උසාවියට පැවරෙන කාර්යයකැයි හෙතෙම වැඩි දුරටත් කියා සිටී.

බීටා ඇනලිටික්ස් කාල නිර්ණ වාර්තාව ලැබීමෙන් පසුව සමූහ මිනීවළ තාවකාලිකව වසා දමන විට එයින් ඇට සැකිලි 300කට වැඩි ප්‍රමාණයක් ගොඩගෙන තිබු අතර එම මිනිස් අටසැකිලි අතර 23ක් දරුවන්ගේය.