පලාත් පාලන මැතිවරණයෙන් දේශපාලන බලපෑමක් කළ හැකි ආසන සංඛ්‍යාවක් දිනා ගනු ඇතැයි විශ්වාස කෙරෙන මහින්ද රාජපක්ෂ පාර්ශවය හා එක්වී නව අගමැතිවරයෙකු යටතේ ශ්‍රී ලංකා නිදහස් පක්ෂ ආණ්ඩුවක් පිහිටුවිමේ බලාපොරොත්තුව ජනාධිපතිවරයා විසින් ප්‍රකාශයට පත් කර තිබේ.
“අපිට කියනවා ශ්‍රී ලංකා නිදහස් පක්ෂයෙ ආණ්ඩුවක් හදනවා නම් එකට එකතු වෙනවයි කියලා. මම ඒගොලන්නට කියනවා 2015 අගෝස්තු මැතිවරණයේදී ජයග්‍රහණය කරපු ශ්‍රී ලංකා නිදහස් පක්ෂය ප්‍රමුඛ සන්ධානයේ මන්ත්‍රිවරු 96 දෙනා මාත් එක්ක හෙට එකට හිට ගන්නවා නම් මම ලෑස්ති ශ්‍රී ලංකා නිදහස් පක්ෂයේ ආණ්ඩුවක් හදන්න” යැයි ජනාධිපති මෛත්‍රීපාල සිරිසේන කියා සිටියේය.
යාලුවා නොදන්න පක්ෂය
පොදුජන පෙරමුණ බිහි වීම පිළිබඳව තමාගේ මිත්‍ර හිටපු ජනපති මහින්ද රාජපක්ෂ නොදන්නා බව අවධාරණය කල ජනපති ජි.එල් පිරිස්ගේ නායකත්වයෙන් යුත් පොදුජන පෙරමුණ “කුණු කාණුවක්” ලෙස හැඳින්වු අතර එය අතහැර ශ්‍රී ලංකා නිදහස් පක්ෂ ආණ්ඩුවක් සෑදීමට තම නිවසට පැමිණෙන ලෙස 27 සෙනසුරාදා රත්නපුරයේ පැවති ජන හමුවක් අමතමින් තම දේශපාලන සඟයන්ට ආරාධනා කරන ලදී.
“ටික කාලයක් යනකොට මගේ මිත්‍ර මහින්ද රාජපක්ෂ මැතිතුමා දන්නෙම නැහැ යට ඉන්න ගෝලයෝ ටිකක් අලුත් පක්ෂයක් හැඳුවා” යි ජනාධිපති පවසයි.
දේශපාලනයේ සදාකාලික සතුරුන් ද සදාකාලික මිතුරන් ද නැති බව සිහි කර දුන් ජනාධිපති මෛත්‍රීපාලන සිරිසේන “ඕන වෙලාවක වෙන් වෙන්න පුලුවන් ඕන වෙලාවක එක් වෙන්න පුලුවන්” යැයි ද වැඩි දුරටත් ප්‍රකාශ කළේය.
Facebook Comments
