‘ජාතික ආරක්ෂාව’ තකා කොළඹ දිලීපන් සමරුවට තහංචි

මළවුන් අනුස්මරණය කිරීමේ අයිතියට බාධා කරන්නන්ට එරෙහිව නීතිය ක්‍රියාත්මක කිරීම වෙනුවට එම අනුස්මරණය කිරීම වළකාලීම වෙනුවෙන් පොලිසිය අධිකරණය මෙහෙයවා තිබේ.

ඉන්දීය හමුදාවට එරෙහිව මාරාන්තික උපවාසයක යෙදී ජීවිතය පරිත්‍යාග කිරීම නිසා ත්‍යාගී දිලීපන් ලෙසින් ගෞරවයට පාත්‍ර වී සිටින එල්.ටී.ටී.ඊ සංවිධානයේ හිටපු නායකයකු සැප්තැම්බර් 19 වැනිදා හවස් යාමයේ කොළඹදී අනුස්මරණය කිරීමට ඇති සුදානම සම්බන්ධයෙන් සිවිල් සමාජ ක්‍රියාධාරීන් සමාජ මාධ්‍ය ඔස්සේ ප්‍රචාරය කර තිබුනි.

එයට විරුද්ධව ඩෑන් ප්‍රියසාද් නැමැත්තෙකු වට්ස් ඇප් පනිවිඩ හරහා වර්ගවාදී ගැටුම් ඇවිලීමට සැලසුම් කළ අවස්ථාවක “ජාතික ආරක්ෂාව” පෙරටු කරගනිමින් අනුස්මරණය වැලැක්විම සදහා අධිකරණ නියෝග ලබා ගැනීමට මරදාන පොලිසිය ක්‍රියා කර තිබේ.

එම රැස්වීම “ජාතික ආරක්ෂාව සම්බන්ධයෙන් දැඩි බලපෑම් කළ හැකි බවත්, එයට විරුද්ධව සංවිධානය වී ඇති විරුද්ධ මතධාරීන් සමග ගැටුම් ඇති විය හැකි බවත්,” පොලිසිය අධිකරණයට දන්වා තිබුණි.

එකී විරුද්ධ මතධාරීන්ගේ ප්‍රහාරක සැලසුම් අඩාළ කිරීමට පොලිසිය ගත් පියවරක් දැනුම් දුන් බවක් අධිකරණ නියෝගයේ දැකගන්නට නැත.

සැප්තැම්බර් 19 වැනිදා දහවල් මරදාන සමාජය සහ සාමයික කේන්ද්‍රයට පොලිස් නිලධාරීන් සමග පැමිණි ජ්‍යෙෂ්ඨ පොලිස් අධිකාරිවරයකු ක්‍රිස්තියානි සහයෝගිතා ව්‍යාපාරයේ මාරිමුත්තු සතිවේල් පියතුමා අතට අධිකරණ නියෝගය ලබා දී අවධාරණය කර තිබුනේ තහනම් සංවිධානයක සාමාජිකයකු සම්බන්ධයන් කතා කිරීමේ අයිතියක් නොමැති බවයි.

“මේක කරන්න දෙන් නැ. ප්‍රෙස් මීටින් මෙතන ගන්න එපා. මේක දෙන් නෑ අපි කරන්න. හේතුව මේක ඇවිල්ලා තහනම් කරපු සංවිධානෙක සාමාජිකයෙක් ගැන කතා කරන්න මෙතන අයිතියක් නෑ. ඊට පස්සේ වාර්ගික ප්‍රශ්නයක් බවට පරිවර්තනය වෙන්න දෙන්න බෑ ෆාදර්. එහෙම උනොත් අපිට ෆාදර්ව අත්අඩංගුවට ගන්නත් සිද්ධ වෙනවා. ”

වැඩ බලන මරදාන පොලිස් ස්ථානාධිපති ප්‍රධාන පොලිස් පරීක්ෂක පී.ජී.ටී කුෂාන්ත කළ පැමිණිල්ලට අනුව මාලිගාකන්ද අතිරේක මහේස්ත්‍රාත් බී.ඒ ධම්මික හේමපාල නිකුත් කළ නියෝගයේ සදහන්ව ඇත්තේ අනුස්මරණයට විරුද්ධ මත ධාරීන් සමග ගැටුම් ඇති විය හැකි බව සදහන් කරමින් තිලීපන් අනුස්මරණය වලකාලමින් නියෝග නිකුත් කරන ලෙස ඉල්ලා ඇති බවයි.

“මරදාන කොළඹ 10 පිහිටි CSR නැමැති ස්ථානයට 30 ට අධික පිරිසක් කැදවා ගෙන එල්.ටී.ටී.ඊ සංවිධානයේ හිටපු ලුතිනන් කර්නල්වරයෙකු වන රාසයියා ප්‍රතීපන් නොහොත් ත්‍යාගී තිලීපන් නැමැති අය සිහි කිරීමේ උත්සවයක් පවත්වන බවත්, එය ජාතික ආරක්ෂාව සම්බන්ධයෙන් දැඩි ලෙස බලපෑම් ඇති කළ හැකි බවත් මෙයට විරුද්ධව සංවිධානය වී ඇති විරුද්ධ මත ධාරීන් සමග ගැටුම් ඇති විය හැකි බවත් සදහන් කරමින් එම තිලීපන් නැමැති අය ස්මරණය කිරීමේ උත්සවය වළක්වාලමින් නියෝගයක් නිකුත් කරන ලෙසත්ය.”

එක් විරුද්ධ මතධාරියෙක් ‘කොන්ද පණ තියන’ සිංහලයන් අවුස්සා ලීමට කටයුතු කර තිබුනේ සමරු සංවිධායකයන් ‘කොටි’ ලෙස හඳුන්වා දෙමිනි.

“කොන්ද පණ තියන අපේ උන් සුදානම් වෙයන්. අපිත් එනවා හෙට සමරන්න. කොළඹට එන කොටින්ට ගුටි පුජාව. මරදානේ CSR හවස 3 ට.” යනුවෙන් සදහන් වට්ස් ඇප් පනිවිඩයක් ” 768882223 ඩෑන් ප්‍රියසාද්” නමින් හුවමාරු කර ඇති බව මානව හිමිකම් ක්‍රියාකාරීන් සමාජ මාධ්‍ය ඔස්සේ දැනුම් දී තිබුනි.

එසේ වෛරී සහගත ලෙස ජනයා ඒකරාශී කිරීමට තත් කළ පුද්ගලයාට එරෙහිව පොලීසිය විසින් ගන්නා ලද ක්‍රියාමාර්ගය කුමක්දැයි මේ තාක් දැන ගන්නට නැත.

දිලීපන්ගේ ප්‍රතිරූපයක් රැගත් වාහනය සැප්තැම්බර් 17 වැනිදා ත්‍රිකුණාමලය සර්ධාපුර සංසන්ධිය වෙත ලගා වෙද්දී, පොලු මුගුරු අතැති කාන්තාවන්ද ඇතුළු සිංහල මැර කණ්ඩායමක් පොලීසිය බලා සිටියදීම සිංහ කොඩි දරා වාහනයට දැඩි ලෙස පහර දී දැඩි අලාභහානි කර සෙල්වරාජා ගජේන්ද්‍රන් පාර්ලිමේන්තු මන්ත්‍රීවරයාටද පහර දී තිබුනි.

ඒ සම්බන්ධයෙන්ද සිහිපත් කරමින් මහේස්ත්‍රාත් වරයා සිය නියෝගයේ අවධාරණය කර ඇත්තේ පොලීසිය ඉල්ලා ඇති පරිදි ඇති විය හැකි බරපතල තත්වය හා ජාතික ආරක්ෂාව සම්බන්ධයෙන් සළකා බලා මෙම උත්සවය පැවැත්වීම වැළැක්වීම සදහා ආඥාවක් නිකුත් නොකළහොත් දැඩි බරපතල තත්වයක් උද්ගත විය හැකි බවයි.

” ඒ අනුව 2023.09.17 වන දින ත්‍රිකුණාමලයේදී මෙවැනිම සැමරුම් උත්සවයක් පැවැත්වීමට ගිය අවස්ථාවේ ඇති වු තත්වයද සැලකිල්ලට ගනිමි. තවද ඔවුන්ගේ අද දින සැලසුම් සම්බන්ධයෙන් නිශ්චිත මතයකට පැමිණිමට හැකියාවක් ඇති බවත්, ඒ අනුව ඉල්ලා ඇති පරිදි ඇති විය හැකි බරපතල තත්වය හා ජාතික ආරක්ෂාව සම්බන්ධයෙන් සළකා බලා මෙම උත්සවය පැවැත්වීම වැළැක්වීම සදහා ආඥාවක් නිකුත් නොකළහොත් දැඩි බරපතල තත්වයක් උද්ගත විය හැක.”

වැඩ බලන මරදාන පොලිස් ස්ථානාධිපති ප්‍රධාන පොලිස් පරීක්ෂක පී.ජී.ටී කුෂාන්තට අනුව දෙපාර්ශවයක් අතර ඇති විය හැකි ගැටුමක් වළක්වාලිමට පොලිසිය යෙදවීමෙන් ඇති වන්නේ අගතිදායක තත්වයකි.

“අදාල ක්‍රියා කලාපයන් පාලනයට පොලීසිය යෙදවීමෙන් ඇති වන අගතිදායක තත්වය පිළිබදවද පුර්ව අත්දැකීම් ස්ථානාධිපතිවරයා පෙන්වා දී ඇත. ඒ අනුව මෙම ක්‍රියා කලාපය අනිවාර්ය ලෙසම සාමකාමී තත්වයෙන් බැහැර වෙන මහජන පීඩාවක තත්වයක් හා ජාතික ආරක්ෂාවට බලපාන තත්වයක් එළඹෙන බවද බැහැර කළ නොහැක. එබැවින් පහත පරිදි නියෝග නිකුත් කරමි.” මාලිගාකන්ද අතිරේක මහේස්ත්‍රාත් බී.ඒ ධම්මික හේමපාල නිකුත් කළ අධිකරණ නියෝගයේ සදහන්ව තිබේ.

“ඒ අනුව මෙම අධිකරණ බල සීමාව තුළ වු මරදාන පොලිස් වසමේ කිසිදු ස්ථානයක පිරිස් වශයෙන් රැස් වී රාසයියා ප්‍රදීපන් නොහොත් ත්‍යාගී ප්‍රදීපන් නැමැති අය ස්මරණය කිරීම සදහා උත්සව පැවැත්වීම හා මාර්ගවල සිදු කරන පෙළපාලි අපරාධ නඩු විධාන සංග්‍රහයේ 106 වගන්තිය අනුව යමින් 2023.09.19 වන දින පැය 12.00 සිට 2023.09.20 වන දින පැය 12 දක්වා තහනම් කරමි.”

කෙසේ වෙතත්, දිලීපන් නමින් ප්‍රකට එල්.ටී.ටී.ඊ සංවිධානයේ රාසයියා පාර්තිපන්ගේ 36 වැනි වාර්ෂික අනුස්මරණය වෙනුවෙන් ගමන් ගන්නා රථ පෙළපාලිය නතර කරන ලෙස වව්නියාව පොලීසිය විසින් වව්නියාව මහේස්ත්‍රාත් අධිකරණයෙන් කළ ඉල්ලිම අධිකරණය විසින් පසුගියදා ප්‍රතික්ෂේප කර තිබුනි.

ප්‍රදේශයේ වාර්තාකරුවන් පවසන පරිදි වව්නියාවේ පදිංචි කරුවන් දෙදෙනකු පොලිසියට ගොනු කළ පැමිණිල්ලේ සදහන් කර ඇත්තේ මෙම රථ පෙළපාලිය නිසා ජනතාව අතර ගැටුම් කාරී තත්වයක් හටගෙන ජාතීන් අතර සහජීවනයට බාධා ඇති විය හැකි බවයි.

එම පැමිණිල්ලට අනුව පොලීසිය අධිකරනයෙන් මෙම ඉල්ලීම කර තිබේ.

වව්නියාව මහේස්ත්‍රාත් සුබාජානී දේවරාසා වව්නියා පොලීසියට අවධාරණය කර තිබුනේ සැමරීමේ අයිතිය ඕනෑම අයකු සතු බවයි.

එබැවින් ජන වර්ග අතර ගැටුම් හා ප්‍රශ්න ඇති නොවන ආකාරයට ප්‍රදේශයේ සහ ජනතාවගේ ආකාරක්ෂාව තහවුරු කරන ලෙස මහේස්ත්‍රාත්වරිය පොලීසියට නියෝග කළ බව පළාත්බද වාර්තාකරුවෝ වැඩි දුරටත් සදහන් කරති.