යහපත් ගුණගරුක මිනිසුන් බිහිකිරීමට ආධ්‍යාත්මික දර්ශනයන්ගෙන් ඉමහත් පිටිවහලක් ලැබෙන බැවින් තමන් කැමති ආගමක් ඇදහීමේ නිදහස අද ශ‍්‍රී ලංකාවේ තහවුරු කර ඇති බව ජනාධිපති මෛත‍්‍රීපාල සිරිසේන මහතා පවසයි.
තැම්පල, රද්දොළුගම මෙතෝදිස්ත දෙව්මැදුරේ දෙශත සංවත්සර ජුබිලි මහෝත්සවයට 04 ඉරිදා පෙරවරුවේ එක්වෙමින් ජනාධිපතිතුමා මේ බව සඳහන් කර තිබේ.
පාරවල් තැනීම්, ගොඩනැගිලි ඉදිකිරීම් වැනි භෞතික සංවර්ධනයෙහි වේගවත් බවක් පැවතිය ද මිනිසාගේ ආධ්‍යත්මික ගුණ වගාව පහතට වැටී ඇති බව සඳහන් කළ ජනාධිපතිතුමා ජනතාවගේ යහපත් හැසිරීම, සංවර්ධනයේ එක් ප‍්‍රමුඛ මිනුම් දණ්ඩක් බව ද සදහන් කර ඇත.
කිතුනු බැතිමතුන්ගේ දරුවන් පාසැල්වලට ඇතුළත් කිරීමේදී මතුව ඇති ගැටලු සහගත තත්ත්වය සම්බන්ධයෙන් මෙහිදී ජනාධිපතිතුමාගේ අවධානයට යොමු කළ කරුණු සැලකිල්ලට ගනිමින් ජනාධිපතිතුමා ප‍්‍රකාශ කර ඇත්තේ අධ්‍යාපන අමාත්‍යාංශය සමග සාකච්ඡා කර ගැටලු සහගත තත්ත්වයක් ඇතිව තිබේනම් එයට පිළියම් ලබා දීමට කටයුතු කරන බවයි.
ශ‍්‍රී ලංකා මෙතෝදිස්ත සභාවේ ආසිරි පෙරේරා රදගුරුතුමාට සහ සීදුව ප‍්‍රදේශය භාරව කටයුතු කරන අධ්‍යක්ෂවරයා වන නදීර ප‍්‍රනාන්දු පියතුමා වෙත තිළිණ ප‍්‍රදානය ද මෙහිදී ජනාධිපතිතුමා අතින් සිදු කර ඇත.
එමෙන්ම එම දේවස්ථානයේ කටයුතු වෙනුවෙන් දායකත්වය සැපයූ කිහිපදෙනෙක් වෙත ද ජනාධිපතිතුමා අතින් උපහාර තිළිණ පිළිගන්වා තිබේ.
එම අවස්ථාවට රාජ්‍ය ඇමතිනි සුදර්ශනී ප‍්‍රනාන්දුපුල්ලේ මහත්මිය ඇතුළු පළාතේ මහජන නියෝජිතයන් පිරිසක් එක්ව සිටි බව ජනාධිපති මාධ්‍ය ඒකකය සදහන් කරයි.
Facebook Comments
