මෛත්‍රී: දෙමළ ජනයා රැවටූ තවත් සිංහල නායකයෙක් බවට චෝදනා (VIDEO)

1
Ivory Agency Sri Lanka
wedding people

දෙමළ ජනයාගේ බහුතර ජන්දයෙන් ජනාධිපති ධුරයට පත්වු මෛත්‍රීපාල සිරිසේන ජනාධිපතිවරයා දෙමළ ජනයාගේ දේශපාලන ගැටලු විසඳන බවට දුන් මැතිවරණ පොරොන්දු ඉටු නොකළහොත් දෙමළ ජනතාව රැවටු අවසන් සිංහල නායකයා ලෙස ඔහු ඉතිහාස ගත වනු ඇති බවට උතුරු පළාත් සභා මන්ත්‍රීවරයකු පවසා තිබේ.

පාර්ලිමේන්තුවේ දෙවැනි සැසිවාර ආරම්භයේ දී ජනාධිපතිවරයාගේ කතාව තුල ජාතික ප්‍රශ්නය පිළිබඳව සඳහන් නොවීම හා යුද්ධයෙන් මියගිය හමුදා සෙබලුන් සැමරීමට පසුගියදා පැවති උත්සවයේදී කිසිදු හමුදා සෙබලෙකු හට දඬුවම් ලබා නොදෙන බවට ජනාධිපතිවරයා කරන ලද ප්‍රකාශය එම් කේ සිවාජිලිංගම්ගේ දැඩි දෝෂ දර්ශණයට ලක් විය.

“දෙමළ ජනතාවගේ වැඩි ජන්දයෙන් තමයි එතුමා ආවේ. දැන් මොකද කියන්නේ අට වෙනිදා පාර්ලිමේන්තුවේ කතා කරන කොට ජාතික ප්‍රශ්නෙට විසඳුම සම්බන්ධයෙන් මුකුත් නැහැ. වීරයන්ගේ දිනේට මොකද කිව්වේ එක හමුදාවේ එක්කෙනෙක් හරි වැරදිකාරය කියල මම කියන්න කැමති නැහැ, ඉඩ දෙන්නෙ නැහැ කියල කියනවා. දෙමළ ජනතාවට, දෙමළ නායකයන්ට වංචා කරපු අන්තිම සිංහල නායකයා අතිගරු මෛත්‍රීපාල සිරිසේන මහත්තයා” යි මන්ත්‍රීවරයා කියා සිටියේය.

චෙල්වනායගම්ගේ කාලයේ සිට සිංහල නායකයන් විසින් දෙමළ නායකයන් මෙන්ම දෙමළ ජනතාවද රැවටීමට ලක් කළ බවට චෝදනා කරන සිවාජිලිංගම් මන්ත්‍රීවරයා තවදුරටත් රැවටී සිටිමට දෙමළ ජනයා සුදානම් නැති බව ද ප්‍රකාශ කළේය.

දෙමළ ජනයාට දුන් පොරොන්දු අනුව ප්‍රධාන පක්ෂ දෙක එක්වී දෙමළ ජනයා පිළිගත හැකි විසඳුමක් ලබා දෙනවා ද නොඑසේ නම් දෙමළ ජනයාට වංචා කරමින් රැවටු අන්තිම සිංහල නායකයා බවට පත් වනවාද යන්න ජනාධිපති මෛත්‍රීපාල සිරිසෙන් විසින් තීන්දු කළ යුතු බව උතුරු පළාත් සභා මන්ත්‍රී එම් කේ සිවාජිලිංගම් වැඩි දුරටත් කියා සිටියේය.

Facebook Comments