යුද්ධයේ අවසන් සති දෙකේ මහින්ද, ගෝටා, ෆොන්සේකා රටෙත් නෑ

0

යුද්ධයේ අවසන් සති දෙක තුල කොටි සංවිධාන කොළඹ නගරයට ප්‍රහාර එල්ල කරනු ඇති බවට බියෙන් හිටපු ජනපති, ආරක්ෂක ලේකම් සහ හිටපු හමුදාපතිවරයා රටින්ව පිටව සිටි බව ජනාධිපතිවරයා පවසයි.

“යුද්ධය පැවති කාලයේ අවසාන සති දෙක ගැන සියලු දෙනාට වඩා කරුණු දන්නා කෙනා මමයි. හිටපු ජනාධිපතිවරයා නැහැ. හිටපු අගමැති නැහැ. හිටපු හමුදාපතිවරයා නැහැ. හිටපු ආරක්ෂ ලේකම්වරයා නැහැ. අවසාන සති දෙකේ. ඒ අය රටින් ගියේ ඇයි කියලා හුඟක් දෙනෙක් දන්නෙ නැහැ. එල්ටීටීඊ එක ඇවිල්ල උඩින් බෝම්බ දානකොට කොළඹ නගරයට කොළඹ නගරයේ භීෂණයක් ඇති වුණා කොහෙන් බෝම්බ වැටෙයිද දන්නෙ නැහැ කියලා.”

“අවසන් සති දෙකේ ලැබුණ වාර්තා තමයි අවසන් සටන පසු බහින්නෙ නැහැ එල්ටීටීඊ එක දකුණු ඉන්දියාවේ චෙන්නායි හරි කොහෙ හරි කැලෑ පැත්තක ඉඳලා කොළඹ සම්පුර්ණ විනාශ කරනවා බෝම්බ දාලා කියලා රජයට තොරතුරු ලැබිලා තිබුණා. ඒ නිසා තමයි ඔක්කොම ගියෙ රටින්,” යැයි ජනාධිපතිවරයා 26 බදාදා නිව්යෝර්ක් නුවර දී ඇමරිකාවේ වෙසෙන ශ‍්‍රී ලාංකිකයන් හමු වූ අවස්ථාවේදී ප්‍රකාශ කර ඇත.

“රණවිරුවන්ට ගෞරවයක්”

යුද සමයේ මෙන්ම ඉන් පසුව සිදුවු යුද්ධයට කිසිඳු සම්බන්ධයක් නොමැති අපරාධ ගැන චෝදනා ලැබුවන්ට කෙරෙන පරීක්ෂණ රණවිරු දඩයමක් නොවන බව ජනාධිපතිවරයා ඇමරිකාවේ වෙසෙන ශ‍්‍රී ලාංකිකයන් හට පෙන්වා දී තිබේ.

යුද්ධයට පිටින් සිදුවු එවැනි අපරාධයන්ට වැරදිකරුවන් බව තහවුරු වුවහොත් එම සියලුදෙනාට නීතිය ක්‍රියාත්මක කිරීම සැබෑ රණවිරුවන්ට සිදුකරන ගෞරවයක් බව ජනාධිපති මෛත්‍රීපාල සිරිසේන කියා සිටියේය.

ජාත්‍යන්තර වශයෙන් ශ්‍රී ලංකාවේ ආරක්ෂක අංශ වෙත ගෞරවයක් සහ ඉහළ පිළිගැනීමකට ලක්වන්නේ එම නිවැරදි කර ගැනීම් තුළින් බවටයි ජනපති පවසා ඇත්තේ.

පුවත්පත් කර්තෘවරුන් සහ මාධ්‍යවේදීන් කිසිවෙකුට ඉකුත් වසර තුන හමාර තුළ පහර කෑමකට ලක්ව රට හැර දමා යාමට සිදු නොවූ බව පෙන්වා දී ඇති ජනපති අද වන විට නිදහසත්, ප‍්‍රජාතන්ත‍්‍රවාදයත් සැබෑ ලෙසම තහවුරු වී ඇතැයි සඳහන් කළේය.

ඇසට පෙනෙන සේම නොපෙනෙන ජයග‍්‍රහණ රැසක් පසුගිය වසර තුන හමාර තුළ ශ‍්‍රී ලංකා රජය ලබාගත් කී ජනාධිපතිවරයා අහිමි වූ ජාත්‍යන්තර සහය නැවත ගැනීම හැඳුන්වා දී ඇත්තේ සුවිශේෂී ජයග‍්‍රහණයක් ලෙසයි.

එක්සත් ජාතීන්ගේ මහා මණ්ඩලයේ 73 වන සැසිවාරය සඳහා සහභාගී වීමට සිදුකරන ලද තම ඇමරිකා සංචාරය මාතෘ භූමියේ මෙන්ම විරෝධාර රණවිරුවන්ගේ ද ගෞරවය දිනා දුන් සංචාරයක් බව ජනාධිපති වැඩි දුරටත් ප්‍රකාශ කර තිබේ.

Facebook Comments

wedding people