නෙල්සන් මැන්ඩෙලා ආදර්ශයට ගන්නා ලෙසට ලෝක නායකයන්ගෙන් ඉල්ලා සිටින ජනාධිපතිවරයා එම ආදර්ශය ක්‍රියාවට නංවමින් දෙමළ ජනයාට යුක්තිය ඉටු කළ යුතු බවට ගුරු සංගම් නායකයකු පෙන්වා දෙයි.
යහපාලන රජය බලයට පත් කිරීමට උතුරු නැගෙනහිර දෙමළ ජනයා ඡන්දය දුන්නේ සංක්‍රාන්තික යුක්තිය බලාපොරොත්තුවෙන් බවට ලංකා ගුරු සංගමයේ ජෝශප් ස්ටාර්ලින් කොළඹ දී මාධ්‍ය වෙත කියා සිටියේය.
“සංක්‍රාන්තික යුක්තිය නොදුන් ජනාධිපතිවරයා නෙල්සන් මැන්ඩෙලාගේ ආදර්ශ ගන්නලු ලෝකෙට කියනවා. අපි කියනවා ඒ ආදර්ශය අරගෙන මේ රටේ යුද්ධයෙන් පීඩාවට පත්වෙච්ච, පහුගිය රජයෙන් ඝාතනය ලක් වෙච්ච පහර කෑමට ලක් වුණ අයට යුක්තිය ඉෂ්ඨ කරන්න කියලා,” යනුවෙන් ඔහු පැවසීය.
යහපාලන රජය නැවත බලය ලබා ගැනීමට රාජපක්ෂ පාලන සමයේ සිදුවු ඝාතන යොදා ගනිමින් සිටින බවට චෝදනා කරන ගුරු සංගම් නායකයා එම නාඩගම නවතා යුක්තිය ඉටු කරන ලෙස බල කළේය.
මාධ්‍යවේදීන් ප්‍රගීත් එක්නැළිගොඩ අතුරුදහන් කරවීම සම්බන්ධ පරීක්ෂණ වසර තුන හමාරක් තිස්සේ සිදු කරනු ලැබුවද රජය එයට අවශ්‍ය කටයුතු නොකරන බවටයි ලංකා ගුරු සංගමයේ ජෝශප් ස්ටාලින් වැඩි දුරටත් චෝදනා කරන්නේ.
Facebook Comments
