ගොඩබිමෙන් හා ගුවනින් ගිලන් රථ සේවාවක්

0

දීප ව්‍යාප්ත ගිලන් රථ සේවාවක් ගොඩබිමෙන් සහ ගුවනින් නොමිලේ ක්‍රියාත්මක කිරීම සඳහා ආයෝජන සිදු කිරිමට ජර්මනියේ ලෝක ප්‍රකට බෙන්ස් සමාගම සහ එයාර් බස් සමාගම සුදානම් බව සෞඛ්‍ය අමාත්‍යංශය පවසයි.

ජර්මනියේ සංචාරයක නිරත සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මෙම සමාගම් සහ එරට රජයේ ආර්ථික කටයුතු සඳහා මුල්‍ය ප්‍රතිපාදන ලබාදෙන බැංකු නියෝජිතයින් මෙන්ම ජර්මන් රජයේ නිලධාරීන් සමග විශේෂ සාකච්ඡාවක දී මේ බව සඳහන් කොට ඇත.

ස්වභාවික විපත් සහ හදිසි ආපදා තත්ත්වයක දී රෝගීන් ප්‍රවාහනය කිරිම සඳහා ජර්මනියේ එයාර් බස් සමාගම හෙළිකොප්ටර් යානා 24ක ආයෝජනයක් සිදු කිරීමට මෙහිදී පොරොන්දු වී ඇති අතර දීප ව්‍යාප්ත ගිලන් රථ සේවාව සඳහා ගිලන් රථ 1050ක් සහ හදිසි ආපදා රථ 240ක් ලබාදීමට බෙන්ස් සමාගම මෙහිදී පොරොන්දු වූ බව සෞඛ්‍ය අමාත්‍යවරයා පවසයි.

ඉන්දීය රජය විසින් දැනට ශ්‍රී ලංකාවෙි ක්‍රියාත්මක කර ඇති ගිලන් රථ සේවාව මගින් ජනතාවට විශාල සේවාවක් ඉටු වන බව පවසන ඇමති රාජිත ඒ ආකාරයට ජනතාවට නොමිලයේ ගිලන් රථ සේවාවක් ක්‍රියාත්මක කිරීමට ජර්මනිය ලබාදෙන සහයෝගය අගය කර බව ප්‍රකාශ කළේය.

මෙම ආයෝජනය අඩු පොලී අනුපාතයක් යටතේ සිදුවන බව මෙන්ම එය කඩිනමින් ආරම්භ කරන බවයි සෞඛ්‍ය අමාත්‍යවරයා සඳහන් කළේ.

මෙවැනි සේවාවක් ක්‍රියාත්මක කිරීම සඳහා මතුව ඇති අවශ්‍යතාවය පිළිබඳව සෞඛ්‍ය අමාත්‍යවරයා ජර්මන් නියෝජිතයින් දැනුවත් කළ අතර ඊට ඔවුන්ගේ ප්‍රසංසාව හිමි විය.

ගිලන් රථ සේවාව සඳහා අවශ්‍ය මානව සම්පත ශ්‍රී ලාංකිකයින්ගෙන් ලබාගැනීමටත් ඔවුන්ට අවශ්‍ය පුහුණුව ජර්මනියේ දී ලබා දීමටත් බෙන්ස් සමාගම එකඟත්වය පළ කර ඇත.

Facebook Comments