ඒකාබද්ධයට එරෙහි පොලිසියේ ඉල්ලීම ඉවතට

0

අධිකරණ තීන්දුව නොතකා හිටපු මහබැංකු අධිපතිට එරෙහිව විරෝධතා දැක්වීම සම්බන්ධයෙන් ඒකාබද්ධ විපක්ෂයේ මන්ත්‍රීවරුන් අධිකරණයට කැඳවීමට නොතීසි නිකුත් කරන ලෙස පොලීසිය විසින් කළ ඉල්ලීම කොළඹ කොටුව මහේස්ත්‍රාත් ලංකා ජයරත්න විසින් ප්‍රතික්ෂේප කරනු ලැබුවා.

පාර්ලිමේන්තු මහලේකම්වරයා හරහා අධිකරණය හමුවේ පෙනී සිටින ලෙස ඒකාබද්ධ විපක්ෂයේ මන්ත‍්‍රීවරුන් 11 දෙනෙකුට නොතීසි නිකුත් කරන ලෙසටයි කොටුව පොලිසිය විසින් අධිකරණයෙන් ඉල්ලා ඇත්තේ.

කෙසේ වෙතත් මහේස්ත‍්‍රාත්වරිය මෙම ඉල්ලීම ඉවත දමමින් ප්‍රකාශ කර සිටියේ උද්ඝෝෂකයින්ට අධිකරණ නියෝග නිසි පරිදි ලබා දී නොමැති බවයි.

ශබ්ද විකාශන යන්ත්‍ර මගින් නිවේදන නිකුත් කිරීම විධිමත් ලෙස අධිකරණ නියෝගයක් දැනුම්දීමක් ලෙස සැලකිය නොහැකි බවත්,පුද්ගලිකව එකී නියෝගය අතට බාරදීම විධිමත් ක්‍රමය බවයි මෙහිදී මහේස්ත්‍රාත්වරිය විසින් පෙන්වාදී ඇත්තේ.

නීති විරෝධී ලෙස මෙම පිරිස් කටයුතු කර ඇත්නම් ‍නීතිය ක්‍රියාත්මක කිරීම සඳහා පොලීසියට හැකියාව ඇති බවත්,ඊට අධිකරණයේ නොතීසි අවශ්‍ය නොවන බවත් මහේස්ත්‍රාත්වරිය සඳහන් කර ඇත.

සිද්ධිය සම්බන්ධයෙන් අධිකරණය නිවැරදි කරුණු වාර්තා කිරීමක් සිදුකරනතුරු නඩුව බහා තැබීමට මහේස්ත‍්‍රාත්වරිය නියෝග කළේය.

Facebook Comments