ජනාධිපතිවරණ ප්‍රතිඵලය හරහා එක්සත් ශ්‍රී ලංකාවක වාසය කිරීමට ඇති දෙමළ ජනයාගේ කැමැත්ත නැවත ඔප්පු කර ඇතැයි දෙමළ ජාතික සන්ධාන නායකයා නිවේදනය කර තිබේ.
ජන්දය වර්ජනය කරන ලෙස ඇතැම් දෙමළ නායකයින් කරන ලද ඉල්ලීම උතුරේ ජනයා නොසලකා හැරීම ගැන සතුට පලකරන ඔහු, දෙමළ ජාතික ප්‍රශ්නය විසඳීමට අදාල අංග කිහිපයක් සිය මැතිවරණ ප්‍රකාශනයේ සඳහන් කළ සජිත් ප්‍රේමදාසට ඡන්දය දෙන ලෙස TNA ඉල්ලා සිටි බව පෙන්වා දෙයි.
“මෙහි පදනම වූයේ, උපරිම බලය බෙදීමක් මගින් එක්සත්, නොබෙදුනු, නොබෙදෙන ශ්‍රී ලංකාවක් තුල ජාතික ප්‍රශ්නයට විසඳීමක් ලබා ගැනීමයි,” යනුවෙන් ආර් සම්බන්ධන් මන්ත්‍රීවරයා පවසයි. උපරිම බලය බෙදා හැරීමකට සියලු ප්‍රධාන පක්ෂ අනුමැතිය දී ඇති බවද ඔහු සඳහන් කරයි.
උතුරු නැගෙනහිර ජනතාව මැතිවරණ ප්‍රතිඵලය හරහා දුන් පණිවුඩය නව ජනාධිපතිවරයා විසින් වටහා ගනු ඇති බවට දෙමළ සන්ධාන නායකයා විශ්වාසය පළ කර තිබේ.
ආර්ථික සමාජ සංවර්ධනය වෙනුවෙන් සියලු පුරවැසියන්ට එක හා සමානව සැලකීමත් එක රටක් ලෙස කටයුතු කිරීමත් වැදගත් බව තම නිවේදනය හරහා දෙමළ සන්ධාන නායක ආර්. සම්බන්ධන් වැඩි දුරටත් අවධාරණය කර ඇත.
Facebook Comments
