ජනපතිට විරෝධය දැක්වූ හතළිහකට නඩු

නැගෙනහිර සංචාරය අතරතුරදී ජනාධිපතිවරයාට විරෝධතා දැක්වු බෞද්ධ භික්ෂුවක් සහ මන්ත්‍රීවරයකු ඇතුළු හතලිස් දෙනකුට එරෙහිව පොලීසිය අධිකරණය හමුවේ නඩු පවරා තිබේ. ඒ අතරින් සාතිශය බහුතරය දෙමළය.

අධිකරණ නියෝගය ඉක්මවා යමින් විරෝධතා දැක්වීම හේතුවෙන් ඔවුන්ට එරෙහිව පොලීසිය මෙම පියවර ගෙන ඇති බවයි පළාත් බද වාර්තාකරුවන් පවසන්නේ.

එදින සිදුවීම් වාර්තා කළ දෙමළ මාධ්‍යවේදීන් දෙදෙනකුගෙන්ද පොලිසිය ප්‍රශ්න කර තිබේ.

මඩකළපුව ශාන්ත මයිකල් විද්‍යාලයට වසර 150ක් පිරීම නිමිත්තෙන් ඔක්තෝබර් 07 වැනිදා දිනත් මඩකලපුව චෙන්කලඩි මධ්‍ය මහා විද්‍යාලයේ 149 වන සංවත්සර උත්සවයට ඔක්තෝබර් 8 වැනි දිනත් ජනාධිපති රනිල් වික්‍රමසිංහ සහභාගී වෙද්දී එම දෙදින තුළ ස්ථාන දෙකකදී ජනාධිපතිවරයාට එරෙහිව විරෝධතා දියත් කර තිබුනි.

පළාත් බද වාර්තාකරුවන් පවසන්නේ ජනාධිපතිවරයා නැගෙනහිර සංචාරය කරන කාල සීමාව තුලදී උද්ඝෝෂණ කිරීමට තහනමක් නොමැති මුත් මාර්ග අවහිර කරමින්, මහජන සාමය කඩවන ආකාරයෙන් විරෝධතා පැවැත්වීම තහනම් කරමින් මඩකලපුව මහේස්ත්‍රාත් අධිකරණය නියෝග නිකුත් කර තිබු බවයි.

ඔක්තෝබර් 07 වැනිදා ජනාධිපති රනිල් වික්‍රමසිංහ මඩකළපුව ශාන්ත මයිකල් විද්‍යාලයේ සංවත්සර උත්සවයට සහභාගී වෙද්දී මංගලාරාම විහාරාධිපති අම්පිටියේ සුමනරතන හිමියන් ඇතුළු මයිලත්ත මඩු මාදවනෙයි ප්‍රදේශයේ කිරි ගොවීන්ගේ ඉඩම් අත්පත්කරගනිමින් වගා කටයුතු වල යෙදී සිටින සිංහල ගොවීන් පිරිසක් පොලිස් මාර්ග බාධක බිද දමමින් පාසල තුලට ඇතුල් වීමට උත්සාහ ගෙන තිබුනි.

ඒ සම්බන්ධයෙන් මඩකලපුව පොලීසිය අධිකරණය හමුවේ කරුණු වාර්තාකිරීමෙන් පසුව අධිකරණය නියෝග කර ඇත්තේ අම්පිටියේ සුමනරතන හිමියන් හා තවත් බෞද්ධ භික්ෂුන් දෙදෙනකුටත්, සිංහල ගොවීන් තිදෙනකුටත් නොවැම්බර් 27 වැනිදා මඩකලපුව මහේස්ත්‍රාත් අධිකරණය හමුවේ පෙනී සිටින ලෙසයි.

මඩකලපුව චෙන්කලඩි මධ්‍ය මහා විද්‍යාලයේ 149 වන සංවත්සර උත්සවයට ඔක්තෝබර් 8 වැනි දිනත් ජනාධිපති රනිල් වික්‍රමසිංහ සහභාගී වන අවස්ථාවේ දී ජනාධිපතිවරයා ගමන් ගන්නා මාර්ගය අවහිර වන පරිදි මයිලත්තමඩු මාදවනෙයි කිරි ගොවීන්, අතුරුදහන්වු පවුල් වල සාමාජිකයන් දේශපාලනඥයන් හා එක්ව විරෝධතා දියත් කළ බවයි පළාත් බද වාර්තාකරුවන් පවසන්නේ.

එම විරෝධතාවයට එක්වු බලහත්කාරයෙන් අතුරුදහන් කළ පවුල් වල මව්වරුන්ට පොලිස් නිලධාරීන් පහර දෙන ආකාරය පලාත් බද මාධ්‍යවේදීන් විසින් විඩියෝ ගත කර ද තිබුනි.

අධිකරණ නියෝගය අභිබවා යමින් විරෝධතා පැවැත්වීම සම්බන්ධයෙන් පාර්ලිමේන්තු මන්ත්‍රී රාසමානික්‍යම් ශානක්‍යන්, හිටපු පාර්ලිමේන්තු මන්ත්‍රීවරුන් වන පී. අරියනේන්ද්‍රන්, ජී. ශ්‍රී නේෂන්, එස්. යෝගේෂ්වරන්, දෙමළ ජාතික ජනතා පෙරමුණේ ප්‍රකාශක කනගරත්නම් සුගාෂ්, එම පක්ෂයේ සංවිධායක ටී. සුරේෂ්, මාධ්‍යවේදීන් වන පුණ්‍යමුර්ති ශෂීකරන්, V. ක්‍රිෂ්ණකුමාර් හා මයිලත්තමඩු මාදවනෙයි කිරි ගොවීන් ඇතුළු 34 දෙනෙකුගෙන් එරාවුර් පොලීසිය මේ වන විටත් ප්‍රකාශ සටහන් කරගෙන ඇති අතර ඔවුන්ට නොවැම්බර් 17 වැනිදා එරාවුර් අධිකරණය හමුවේ පෙනී සිටින ලෙස අධිකරණය නියෝග කර තිබේ.