මුලතිව් සමූහ මිනීවලේ කැනීම් කටයුතු සති තුනකින් කල් යයි

යුද්ධයෙන් වැඩිම හානියට පත් වන්නියෙන් වඩාත් මෑත කාලයේ මතුවූ සමූහ මිනීවලේ කැනීම් කටයුතු යළි ආරම්භ කිරීම තවත් සති තුනකින් කල් ගොස් තිබේ.

කොක්කුතොඩුවායි මහාවිද්‍යාලය සමීපයෙන් අහම්බයෙන් අස්ථි කොටස් හමුවීම සම්බන්ධයෙන් පොලීසිය ජුනි මස අගදී අධිකරණයේ ගොනු කළ නඩුව ඔක්තෝබර් 30 වැනිදා කැදවු අවස්ථාවේ කැනීම් කටයුතු නොවැම්බර් 20 වැනිදා ආරම්භ කිරීමට අධිකරණය තීරණය කළ බවයි නීතිඥ වී.කේ නිරංජන් පවසන්නේ.

“අද කැණීම් කටයුතු ආරම්භ කිරීමට නියමිතව තිබුනත් රාජ් සෝමදේවට, අද සහභාගී වීමට නොහැකිවීම නිසා නැවත 20 වැනිදා කැණීම් කටයුතු ආරම්භ කිරීමට තීරණය කරා. ඒ සමගම කොපමණ මුදලක් ඉතිරි වී තිබේනවාද කියලා ප්‍රශ්නේ මතු කරා. මේ පිළිබඳ ගිණුම් වාර්තාවක් අධිකරණයට ඉදිරිපත් කරන්න කියලා ඉල්ලා සිටියා. ඒ සමගම දැනට කැණීම් කර තිබෙන මිනිස් ඇටසැකිලි හැර අනෙකුත් ද්‍රව්‍ය ගැන අතුරු වාර්තාවක් ඉදිරිපත් කරන්න තව කාලය අවශ්‍ය බව මහාචාර්ය රාජ් සෝමදේව ඉල්ලීම් කරලා තිබුනා.”

සිරුරු ගොඩගැනීමේ කටයුතු භාරව සිටින මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේව පසුගිය සතියේ අගනගරයේ මාධ්‍යවේදීන් වෙත පවසා තිබුනේ ඔක්තෝබර් 30 වැනිදා හෝ නොවැම්බර් 1 වැනිදා කැනීම් කටයුතු යළි ආරම්භ කිරීමට සුදානම් බවයි.

නීතිඥ වී.කේ නිරංජන් මුලතිව් මාධ්‍යවේදීන් හමුවේ තව දුරටත් පවසා සිටියේ කොක්කුතුඩුවායි සමුහ මිනි වළ සමීපයේ තවත් මිනිස් සිරුරු මිහිදන් කර ඇති ස්ථාන තිබේදැයි හදුනාගැනීම සදහා රේඩාන් උපකරණයක් යොදා ගැනීමට වෝහාරික පුරාවිද්‍යාඥ මහාචාර්ය රාජ් සෝමදේව අධිකරණයෙන් ඉල්ලීමක් සිදු කර ඇති බවයි.

“අස්ථි කොටස් ඇතුළු හමුවු අනිකුත් දේවල Chain of Custody කියන භාරකාරත්වයේ වගකීම ආරක්ෂා සහගතව පවත්වාගෙන යාමේ අවශ්‍යතාව ගැන අධිකරණයේ අවධාණයට අපි යොමු කළා. මිනිස් අස්ථි හමුවු ස්ථානයේ සිට මීටර් 50 ක් ඇතුලත තවත් මිනිස් අවශේෂ තියනවාද කියලා හොයන්න රාජ් සෝමදේව රේඩාර් උපකරණයක් යොදා ගන්න අධිකරණයෙන් ඉල්ලීමක් කරලා තියනවා. ඒක ගැන සම්පුර්ණ වාර්තාවක් අධිකරණයට ඉදිරිපත් කරන්න කියලා ඉල්ලා සිටියා. මේ ඉල්ලීම් ටික අනුමත කරලා 20 වැනිදා කොක්කුතුඩුවායි සුසුන භුමිය පිහිටි ස්ථානයේ සාකච්ඡාවක් තියලා කැනීම් කටයුතු සිදු කිරීමට නියමිතයි.”

සිරුරු ගොඩගැනීමේ කටයුතු වල වගකීම පැවරී තිබෙන මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේවගේ ඉල්ලිම පරිදි මේ වන විට මුලතිව්, කොක්කුතොඩුවායි සමූහ මිනීවල අවට CCTV කැමරා පද්ධතියක් ද සවිකර තිබේ.

සැප්තැම්බර් 15 වැනි දා කැනීම් කටයුතු තාවකාලිකව නිමා කරමින්, සිරුරු ගොඩගැනීමේ කටයුතු විමර්ශනයට පුරෝගාමී වී සිටි වෝහාරික පුරාවිද්‍යාඥ මහාචාර්ය රාජ් සෝමදේව සඳහන් කර තිබුනේ සිදු කළ කැනීම් වල දී හමුවු සාක්ෂි විශ්ලේෂණය සදහා කැනීම් කටයුතු තාවකාලිකව නතර කරන බවයි.

“දැනට ලැබී තිබෙන සාක්ෂි ක්‍රමානුකුලව විශ්ලේෂණය කිරීම සදහා මාස 2 ක පමණ කාලයකට මේ පරීක්ෂා කිරීම නතර කරලා තියනවා. ඉතින් මේ මුලික විශ්ලේෂණ කටයුතු වලදී අධිකරණ වෛද්‍ය නිලධාරීතුමන්ලගෙත්, අපි කරපු ඒ සොයා ගත්තු ද්‍රව්‍යමය සාක්ෂිත් විශ්ලේෂණයට ලක් කරලා අපි ගරු අධිකරණයට වාර්තාවක් ලබා දීමට නියමිත තිබෙනවා. ඊට පස්සේ අපි මේ සමීක්ෂණය, පරීක්ෂණය තවදුරටත් කරගෙන යනවද නැද්ද කියන එක ගරු අධිකරණය තීරණය කරනතුරු අපි බලාපොරොත්තුවෙන් ඉන්නවා. කුමන තිරණයක් ලැබේද කියන කාරණය.”

මුලතිව්, කොක්කුතොඩුවායි සමූහ මිනීවලේ කැනීම් කටයුතු යළි ආරම්භ කර දින නමයක් ගත වෙද්දී, පුද්ගලයන් දාහත් දෙනකුට අයත් අස්ථි කොටස් ගොඩ ගෙන තිබුනි. ඒ අතර එල්.ටී.ටී.ඊ සාමාජිකාවන්ගේ බවට සැක කෙරෙන සාක්ෂි කිහිපයක් ද විය.

කොක්කුතොඩුවායි මහාවිද්‍යාලයේ සිට කෝකිලායි දෙසට මීටර් 200ක් පමණ දුරකින් ජුනි 29 වැනි බ්‍රහස්පතින්දා හවස් යාමයේ මිනිස් සිරුරු කොටස් සහ ඇඳුම් කොටස හමුවී තිබුනේ ජල සම්පාදන දෙපාර්තමේන්තුවේ කාර්ය මණ්ඩලය ජලනල එළීමට පොළව හාරමින් සිටියදී ය.