ගෝඨාභය රාජපක්ෂ ජනාධිපති ධුරයට පත්වනවාත් සමඟම සිංහල බෞද්ධ සංවිධාන දෙකක් විසුරුවා හරින බවට නිවේදනය කර තිබේ.
බොදුබල සේනා සංවිධානය හා රාවනා බලය සංවිධාන මෙසේ විසුරුවා හැරීමට තීරණය කර ඇති බවයි එම සංවිධාන වල නායකයින් පවසන්නේ.
සිංහල නායකයෙකු රටට ලැබී ඇති හෙයින් තම සංවිධානය විසුරුවා හරින බව බොදුබල සේනා සංවිධානයේ නායක ගලගොඩ අත්තේ ඥානසාර හිමි 19 අඟහරුවාද මාධ්‍ය වෙත කියා සිටියේය.
“දැන් සිංහලයන්ට නායකයෙක් ඉන්නවා. රටට නායකයෙක් ඉන්නවා. දැන් අපිට නටන්න උද්ඝෝෂණ කරන්න වෙන එකක් නෑ. අපිට තිබුණ ගැටලුව වුණේ රටේ නීතිය ක්‍රියාත්මක කිරීමයි. මේ නීතිය ක්‍රියාත්මක කරන්න ජනපතිවරයා කටයුතු කළොත් බිඳීගිය ජාතික ඒකාග්‍රතාවය ඇති කරන්න හේතුවක් වේවි.”
සුළු ජාතික ඡන්දවලින් හැර ආණ්ඩුවක් පිහිටු වීමට නොහැකි බවට තිබු අදහස ජනාධිපතිවරණ ප්‍රතිඵලය සමඟ මිත්‍යාවක් බවට පත්වු බව පෙන්වා දෙන එහිමියන් හොඳ නායකත්වයක් පත් කර ගත් ආකාරයෙන්ම මහමැතිවරණයෙන් පසු හොඳ ඇමැති මණ්ඩලයක් පත් කර ගත යුතු බවටයි යෝජනා කරන්නේ.
“රට ගෙනියන්න හොඳ නායකත්වයක් තියෙනවා. ඒ නිසා අපේ සංවිධානය මීට පස්සේ අවශ්‍ය වෙන්නේ නැහැ කියලා අපි විශ්වාස කරනවා. ඒ නිසා මහ මැතිවරණයෙන් පස්සේ සංවිධානය විසුරුවා හරිනවා” යි ගලගොඩ අත්තේ ඥානසාර හිමි පැවසීය.
රාජ්‍ය පෙළපතින් පසු රටට නියමාකාර නායකයෙක් ලැබී ඇති බැවින් මින් මතුවට රට ජාතිය ආරක්ෂා කර ගැනීම සඳහා ජාතික සංවිධානවල අවශ්‍යතාවක් නොමැති බව නව සිංහල රාවය ජාතික සංවිධානයේ මහලේකම් මාගල්කන්දේ සුදත්ත හිමියන් පෙන්වා දෙයි.
එබැවින් මහ මැතිවරණයෙන් පසුව තම සංවිධානය විසුරුවන බව පවසන එහිමියන් රට, ජාතිය, සංස්කෘතිය, ආගම, සාසනය සුරැකීමේ වගකීම නව ජනාධිපති ගෝඨාභය රාජපක්ෂ ජනාධිපතිවරයා විසින් නිසි ආකාරව ඉටු කරන බවට මහා සංඝරත්නයට පුර්ණ විශ්වාසයක් ඇති බවද අවධාරණය කළේය.
එක්සත් ජාතික පක්ෂය පරාජ වීමට හේතු වුයේ එම පක්ෂයේ ඇතැම් මැති ඇමතිවරුන් මහා සංඝ රත්නයට, බෞද්ධාගමට සහ සිංහල සංස්කෘතියට නිගා කිරීම නිසා බවද මාගල්කන්දේ සුදත්ත හිමියන් වැඩි දුරටත් කියා සිටියේය.
Facebook Comments
