ගිනස් වාර්තාවක් තැබීම සඳහා නිර්මාණය කරන ලද දිගම සාරි පොට ඇල්ලීම සඳහා පාසල් ළමුන් යොදා ගැනීම සම්බන්ධයෙන් පරික්ෂණයක් ආරම්භ කල බව ජාතික ළමා ආරක්ෂණ අධිකාරිය පවසයි.
මහනුවර ගන්නෝරුව ප්‍රදේශයේ මංගල උත්සවයක් සඳහා පාසල් ළමයින් 250 දෙනකු සහභාගී කරවා ගනිමින් එම ළමුන් හිංසනයට ලක්කළ බවට ජාතික ළමා ආරක්ෂක අධිකාරියට ලැබී ඇති පැමිණිලි මත මෙම පරික්ෂණ ආරම්භ කල බව එම අධිකාරිය නිවේදනයක කරයි.
ජාතික ළමා ආරක්ෂක අධිකාරියේ සභාපතිනි නීතීඥ මරිනි ද ලිවේරාගේ අත්සනින් යුතුව නිකුත් කල නිවේදනයේ වැඩි දුරටත් සඳහන් කර ඇත්තේ මෙම සිද්ධිය සම්බන්ධයෙන් අධ්‍යාපන බලධාරීන් සමග සාකච්ඡා කරන බවයි.
මහනුවර ප්‍රදේශයේ 21 බ්‍රහස්පතින්දා පැවැති මෝස්තර නිරූපිකාවකගේ මංගල උත්සවයක ඔසරි පොට ඇඳි මනාලියගේ සැතපුම් ගණනාවක් මග දිගට ඔසරි පොට අල්ලා ගැනීමට පාසල් සිසුන් සහභාගී කරවාගෙන තිබිණි.
මෙම උත්සවය සඳහා පාසල් සිසුන් සහභාගි කරවා ගැනීම පිළිකුලෙන් යුතුව හෙලා දකින ලංකා ගුරු සංගමය මේ සඳහා ළමුන් සහභාගී කර ඇත්තේ මධ්‍යම පලාත් මහ ඇමති සරත් ඒකනායකගේ නියෝගයෙන් බවට චෝදනා කළේය.
සිල් රෙද්දෙන් නුගත් පාඩම
කලාප අධ්‍යක්ෂ, පලාත් අධ්‍යාපන අධ්‍යක්ෂ සහ අධ්‍යාපන ලේකම්ගේ අවසරයෙන් තොරව පාසල් ළමුන් පාසලෙන් පිටට ගත නොහැකි බව කී ජෝශප් ස්ටාර්ලින් දේශපාලකයන්ගේ නියෝග මත දරුවන් ප්‍රවර්ධන කටයුතු සඳහා යොදා ගැනීම දැඩීව හෙලා දකින ලදී.
දේශපාලන නියෝග මත රාජ්‍ය සේවකයන්ට නීති විරෝධි කටයුතු කිරීම හරහා හිමි වන දඬුවම් පිළිබඳව “සිල් රෙදී නඩුව” හොඳම උදාහරණය බව පෙන්වා දෙන ගුරු සංගම් නායකයා එවැනි දඬුවම් ලබා දී තිබියදීත් රාජ්‍ය සේවයන් මෙසේ දේශපාලකයන්ගේ නීති විරෝධී නියෝග ක්‍රීයාත්මක කිරීම බරපතල තත්ත්වයක් බව සිලෝන් ජර්නල්ස් වෙත කියා සිටියේය.
Facebook Comments
