රජය ගෙන එන නව දේශපාලන විසඳුම රට පාවාදීමක් නොවන බව මෙන්ම ජාතීන් අතර ප්‍රශ්නය විසඳා ගතහොත් රට සීඝ්‍රයෙන් දියුණු කිරීමට හැකියාව ලැබෙන බවත් අගමැතිවරයා පවසයි.
රට තුළ යුද්ධයක් ඇති වීමට දේශපාලන අර්බුදයන් හේතු වු බව කී අගමැති රනිල් වික්‍රමසිංහ එම ගැටළු සඳහා දේශපාලන විසඳුම් මගින් පිළිතුරු සොයා ගැනීම අතවශය බව අවධාරණය කළේය.
යෝජිත නව ව්‍යවස්ථාවේ උපරිම බලය බෙදා දීම, පාර්ලිමේන්තුවට අමතරව සෙනට් සභාවක් ඇති කිරීම, රටේ කිසිදු ජන කොට්ඨාසයකට මදි පුංචි කම් සිදු නොවන සේ මානව හිමිකම් සුරක්‍ෂිත කිරීම, ස්වාධීන අධිකරණ ක්‍රමයක් ඇති කිරීම, යුද්ධයෙන් අවතැන් පිරිස් වහා පදිංචි කිරීම ආදිය ඇතුළත් වන බව පවසන අගමැතිවරයා මේ කරුණු කාරනා සඳහා රටේ ප්‍රධාන දේශපාලන පක්ෂ දෙක වන එක්සත් ජාතික පක්‍ෂය සහ ශ්‍රී ලංකා නිදහස් පක්‍ෂය එකඟ වන්නේ නම් බුද්ධශාසනයට ප්‍රමුඛස්ථානය ලබා දෙන ඒකීය රාජ්‍යය සංකල්පය පිළිබඳව සලකා බැලීමට සූදානම් බව සුළු ජාතික පක්ෂ ප්‍රකාශ කර තිබෙන බව පෙන්වා දුනි.
මීට පෙර කිසිම අවස්ථාවක මෙවැනි එකඟතාවයට ඔවුන් පැමිණ නැති බව මෙන්ම එක්සත් ජාතික පක්ෂයත්, ශ්‍රී ලංකා නිදහස් පක්ෂයත් එකට එකතුවී අන්තර්වාර වාර්තාවේ කරුණුවලට එකඟ වනවා නම් ඒකීය රටක් සහ බුද්ධාගමට ප්‍රමුඛතාවය දීම පිළිබඳ සංකල්පයට එරෙහි නොවන බවට සුළු ජාතික පක්ෂ පොරොන්දු වී ඇතැයි අගමැතිවරයා ගාල්ල, වැකුණගොඩ පැවැති “නිල සෙවන” පොලිස් නිල නිවාස විවෘත කිරීමේ උත්සවයට සහභාගීවීමෙන් කියා සිටියේය.
නව ව්‍යවස්ථාව පිළබඳ වු විවාදය අන්තවාදීන්ගේ සටනක් නොවිය යුතු යැයි අවධාරණය කල අගමැතිවරයා ඒකීය භාවයක් හෝ ෆෙඩරල් ක්‍රමයක් ඉල්ලීම, රට පාවා දීමේ චෝදනා, ආදී දෙපැත්තෙන්ම එල්ල වන කිසිදු අන්තවාදී ඉල්ලීමක් හෝ යෝජනාවක් අපට අවශ්‍ය නොමැති බව සහ නව ව්‍යවස්ථාවක් සඳහා ආරම්භ කල ගමන ඉදිරියටම ගෙන යන බවට පොරොන්දු වුනි.
මෙම අවස්ථාව රටට ඉතිරිව ඇති අවසාන අවස්ථාව බව පෙන්වා දුන් අගමැති රනිල් වික්‍රමසිංහ ගැටළු වලට පිළිතුරු සොයා ගතහොත් ඊට පසුව තවත් ගැටුම් ඇති නොවන බව වැඩි දුරටත් කියා සිටියේය.
Facebook Comments
