මියන්මාර බෞද්ධයන්ගෙන් එල්ල වන ප්‍රහාරයන්ගෙන් දිවි බේරා ගෙන පලාවිත් සරණාගතයන් ලෙස ශ්‍රී ලංකාවට පැමිණි රෝහින්ග්‍යාවරුන්ට සිංහල බෞද්ධ භික්ෂුන්ගේ විරෝධය එල්ල වී තිබේ.
බෞද්ධ භික්ෂුන්ගේ විරෝධය හමුවේ ගල්කිස්ස ප්‍රදේශයේ එක්සත් ජාතීන්ගේ සරණාගතයන් කාර්යාලයේ රැකවරණය ලබමින් රැඳි සිටි මියන්මාර රෝහින්ග්‍යාවරු 30 වැඩි ප්‍රමාණයක් ආරක්ෂාව පතා සිය රැකවරණයට ගත් බව පොලිස් මාධ්‍ය ප්‍රකාශක සිලෝන් ජර්නල්ස් වෙත කියා සිටියේය.
මියන්මාරයේ බෞද්ධයන් විසින් දිගින් දිගටම මුස්ලිම් විරෝධි ප්‍රහාර එල්ල කල පසුව එරට හමුදා විසින් රෝහින්ග්‍යා විරෝධි ප්‍රහාර දියත් කර ඔවුන් පලවා හරිමින් සිටින බව විදෙස් මාධ්‍ය වාර්තා කර තිබුණි.
මෙම රෝහින්ග්‍යා මුස්ලිම් සරණාගතයන් 30 දෙනා පසුගිය අප්‍රේල් 30 වෙනිදා කන්කසන්තුරේ ආසන්න මුහුදේ දී අත්අඩංගුවට ගනු ලැබුවේ ශ්‍රී ලංකා නාවික හමුදාව විසිනි.
අක්මීමන දයාරතන හිමිගේ නායකත්වය යටතේ රෝහින්ග්‍යවරුන් රඳවා සිටි ගල්කිස්ස ප්‍රදේශයේ නිවස අසලට කඩා වැඳි පිරිස “මියන්මාර ත්‍රස්තවාදීන් පිරිසක්” එම ස්ථානයේ රැඳී සිටින බව පවසමින් කලහකාරි ලෙස හැසිරෙන විඩියෝ සමාජ ඡාලා වල පල කර තිබුණි.
දැඩි මතධාරී බෞද්ධ භික්ෂුන් විසින් “ත්‍රස්තවාදීන්” ලෙස හැඳින්වු මෙම සරණාගතයන් අතර බිලිඳු දරුවන් හා කාන්තාවන් විශාල පිරිසක් සිටි බව අප වාර්තාකරුවෝ පවසති.
Facebook Comments
