යාපනයේ කොරෝනා වෛරසය පැතිර යෑමට ඉන්දියානු ධීවරයන් හේතු වෙතැ’යි යාපනයේ යුද හමුදා අණදෙන නිලධාරියා විසින් කරන ලද ප්‍රකාශය “ජාතිවාදී සහ සාවද්‍ය” ප්‍රකාශයක් ලෙස හෙලා දකින මෙන් තමිල්නාඩු ධීවරයන් අලුතින් පත්වූ ප්‍රාන්ත ආණ්ඩුවෙන් ඉල්ලා තිබේ.
මුහුද මැද දී ඉන්දියානු ධීවරයන් සමග සබඳතා පැවැතිවීමෙන් වළකින ලෙස මේජර් ජෙනරාල් ප්‍රියන්ත පෙරේරා විසින් උතුරු පළාතේ ධීවරයන්ට ප්‍රකාශ කිරීමෙන් සතියකට පසුව ඉන්දියාවේ ප්‍රතිචාරය දක්වා ඇත්තේ DMK පක්ෂය තමිල්නාඩුවේ යළි බලයට පැමිණීමත් සමගයි.
“යාපනයේ හමුදා ආඥාපතිගේ ප්‍රකාශය සත්‍යයෙන් තොර, ද්වේශ සහගත වූවක්. ඔහුගේ මේ වගකීම් විරහිත ප්‍රකාශය අපි තරයේ හෙළා දකිනවා වගේම ඒ සම්බන්ධයෙන් ගත යුතු නිසි ක්‍රියාමාර්ග ගෙන තිබෙනවා,” යි රාමේෂ්වරම් ධීවර නායක බෙන්සිංලාස් ජෙසුරාජා JDS වෙබ් අඩවියට පවසා තිබේ.
මේජර් ජෙනරාල් ප්‍රියන්ත පෙරේරා අප්‍රේල් මස අවසාන සතියේ යාපනයේ රජයේ නිලධාරීන් සමඟ පැවැති සාකච්ඡාවකදී කියා තිබුනේ යාපනයේ ධීවර ප්‍රජාව ඉන්දීය ධීවරයන් සමඟ ගැඹුරු මුහුදේදී ගනුදෙනු කිරීම යාපනයේත්, ඉන් අනතුරුව ශ්‍රී ලංකාව පුරාමත් “ඉන්දියාවේ තත්වයට වඩා දරුණු ලෙස” කෝවිඩ් -19 ව්‍යාප්ත වීමට මග පාදනු ඇති බවයි.
ඔහු ඒ බව මාධ්‍යවේදීන්ට දැනුම් දුන්නේ දිසාපතිවරයා විසින් කරන ලද අනතුරු ඇඟවීමක් ලෙසයි.
“ඒ අනුව ධීවර ජනතාවගෙන් අපි ඉල්ලා සිටිනවා ආරක්ෂක සේනා ආඥාපති වශයෙන්, ඔබ ගැඹුරු මුහුදට ගිහිල්ලා ඉන්දීය ධීවරයන් හමුවෙන්න එපා,” යි මේජර් ජෙනරාල් ප්‍රියන්ත පෙරේරා මාධ්‍යවේදීන් හමුවේ කියා සිටියේය.
එම ප්‍රකාශය ද්වේශ සහගත සහ ජාතිවාදී එකක් ලෙස හෙලා දකින ඉන්දීය ධීවර නායක ජේසුරාජා පවසන්නේ, හමුදා ආඥාපතිගේ ප්‍රකාශය පෝක් සමුද්‍ර සන්ධිය දෙපස ධීවරයන් අතර පවතින සම්බන්ධතාවය අවුල් කිරීම අරමුණු කොට ගත්තක් බවයි.
“මේ හමුදා ආඥාපතිගේ කතාව එපාකරපු සහ අසාධාරණ එකක්. ඔහු කියන දේ අසත්‍යයි විතරක් නෙවෙයි, ද්වේෂ සහගතයි. ඒ වගේම ජාතිවාදීයි. ඉන්දීය ධීවරයන් කියන එකෙන් එයා අදහස් කරන්නේ තමිල්නාඩු ධීවරයන් – අපි යාපනේ ධීවරයන් මුණගැහිලා හා ගනුදෙනු කරනවා කියන එක වැරදි කතාවක්. අපි මුහුද මැදදී හමු වන්නේ නැහැ. ඊටත් වැඩියෙන් මේ වන විට තමිල්නාඩු ධීවරයන්ට යොදා තිබෙන වාර්ෂික ධීවර තහනම අප්‍රේල් 14 සිට ජුනි 15 දක්වා ක්‍රියාත්මක වෙනවා. විශාල ලෙස කොවිඩ් -19 පැතිරී යෑම සහ එන්නත් කිරීමේ වැඩසටහන ආරම්භ වූ දා සිට සියලුම ධීවරයන් මුහුදු රැකියාවට පැමිණීම සිදුවන්නේ එන්නත් කරනු ලැබුවාට පස්සේ වගේම, එය අදාල බලධාරීන් විසින් නිසි ලෙස සහතික කිරීමෙනුත් පසුව යි.”
මේජර් ජෙනරාල් පෙරේරා කියා සිටියේ ඉන්දීය ධීවරයන් සමග සම්බන්ධතා පවත්වා ගැනීමෙන් සිදුවන ඕනෑම ආසාදනයක් ශ්‍රී ලංකාවට බරපතල ප්‍රතිවිපාක ගෙන දෙනු ඇති නිසා තමන් එයින් වැළකී සිටීමට ඉල්ලා සිටින බවයි.
“හමුවුනොත් ඔබට නොදැනීම කොවිඩ් 19 වැළඳීමට හැකියි. එහෙම උනොත් අපේ යාපනයේ ප්‍රදේශයේ විතරක් නෙවෙයි අපේ අනික් ප්‍රදේශවලත් ඉන්න අහිංසක ජනතාවට කෝවිඩ් 19 වැළඳිලා දැනට තියෙන ඉන්දියාවේ තත්වයට වඩා දරුණු උනොත් අපිට ලොකු ප්‍රශ්නයක්.”
කෙසේ වෙතත්, යාපනයේ සහ තමිල්නාඩුවේ ජනතාව පෙන්වා දෙන්නේ ඔහු කළේ “ඉල්ලීමකට වඩා බොහෝ සෙයින් සමාන වන්නේ අනතුරු ඇඟවීමක්” බවයි.
තමිල්නාඩු ධීවරයන් පවසන්නේ, හමුදා ආඥාපතිගේ මෙම දුරදිග යන ප්‍රකාශය, ජාත්‍යන්තර සමුද්‍රීය මායිම් සීමාව (IMBL) වැරදීමකින් හෝ පසුකර ගියහොත් තමන්ට හිරිහැර කිරීමේ, ශ්‍රී ලංකා නාවික හමුදාවේ දැඩි ස්ථාවරය දිරිමත් කරන්නක් පමණක් වනු ඇති බවයි.
මේ අතර, උතුරු වෙරල තීරයේදී අත් අඩංගුවට ගන්නා ලද ඉන්දීය ධීවරයන් පිරිසක් “නීති විරෝධී සංක්‍රමණිකයන්” ලෙස හැඳින්වීම නිසා නාවික හමුදාවද දෝෂ දර්ශනයට ලක්වී සිටී.
මන්නාරමේදී ධීවර යාත්‍රා 11ක් සමග අල්ලා ගන්නා ලද ධීවරයන් 86 දෙනකු ආපසු ඉන්දියාවට භාර දෙමින් නාවික හමුදාව පවසා තිබුනේ ඔවුන් “මෙරට මුහුදු සීමාවට ඇතුළු වීමට උත්සාහ කළ බවට සැක කෙරෙන” පුද්ගලයන් බවයි.
යුද හමුදාව සමග හවුලේ නාවික හමුදාවත් තමිල්නාඩු විරෝධයක් අවුළුවමින් මහ මුහුදේදී ඉන්දීය ධීවරයන්ට අඩන්තේට්ටම් කිරීම යුක්ති සහගත කිරීමේ උත්සාහයක නිරත වන බව රාමේශ්වරම් ධීවර නායකයාගේ පිළිගැනීමයි.
“එක පුද්ගලයෙක් හරි ඉන්දියාවේ ඉඳලා ලංකාවට ධීවර බෝට්ටුවක නීති විරෝධී විදියට ආවයි කියලා ඔප්පු කරන්න,” යි ජේසුරාජා නාවික හමුදාවට අභියෝග කළේය.
ශ්‍රී ලංකාව වේගයෙන් ගෝලීය මත්ද්‍රව්‍ය වෙළඳාමේ කේන්ද්‍රස්ථානය බවට පත්වෙමින් පවතින බවට එල්ල වන චෝදනා මධ්‍යයේ, ඉන්දු-ශ්‍රී ලංකා වෙරළ තීරයේ මත්ද්‍රව්‍ය සහ තහනම් භාණ්ඩ ජාවාරම් වැඩිවීමත් සමඟම, මුර සංචාර වැඩි කිරීමේ මුවාවෙන්, ශ්‍රී ලංකා නාවික හමුදාව විසින් තමන් ඉලක්ක කරනු ඇතැයි ඉන්දීය ධීවරයෝ බියට පත්ව සිටිති.
සිය අනන්‍යතාවය හෙලි නොකිරීමේ කොන්දේසිය මත, තමිල්නාඩු රජයේ ජ්‍යෙෂ්ඨ නිලධාරියෙකු JDS ය සමග පවසා ඇත්තේ, තම ධීවරයන්ගේ දුක්ගැණවිලි සටහන් කරගෙන් ඉදිරි ක්‍රියාමාර්ග සඳහා තමිල්නාඩු සහ නවදිල්ලි පාලකයන්ගේ අවධානයට යොමු කර ඇති බවයි.
මසුන් ඇල්ලීමට යාත්‍රා කිරීමට පෙර උතුරේ ධීවරයන් පූර්ව අවසරයක් ලබා ගත යුතු බවටත්, එන්නත් ලබා ගත යුතු බවටත් නියම කර තිබෙන අතර, ශ්‍රී ලංකාවේ දකුණු පලාත් වල ධීවරයන් සඳහා එවැනි උපදෙස් කිසිවක් නිකුත් කර නැත්තේ ඇයි දැයි උතුරු පළාතේ ධීවරයෝ ප්‍රශ්න කරති.
Facebook Comments
