යුක්තිය ඉෂ්ඨ කරන බවට පොරොන්දු දෙමින් බලයට පත් වු යහපාලන රජයට එම පොරොන්දු අමතක වී ඇති බවට දොස් නඟන අතුරුදහන් මාධ්‍යවේදියකුගේ බිරිඳ අපරාධ වලට සම්බන්ධ රාජපක්ෂ මිතුරන් ආරක්ෂා නොකරන ලෙස ජනාධිපතිවරයාගෙන් ඉල්ලා තිබේ.
“මේ රටේ මිනිස්සුන්ට වෙච්ච දේ පිළිබඳ සත්‍ය හෙළි කරන්න. යාලුවන් රකින්න එපා” යැයි අට වසරකට ඉහත දී අතුරුදහන් කරන ලද මාධ්‍යවේදී ප්‍රගීත් එක්නැළිගොඩ වෙනුවෙන් 25 ප්‍රහස්පතින්දා “ප්‍රගීත් එක්නැලිගොඩ මතක යාදින්න” මැයෙන් කොළඹ පෑවති අනුස්මරණයකදී සන්ධ්‍යා එක්නැළිගොඩ කියා සිටියාය.
බලයට පත් වීමට දුන් පොරොන්දු අමතක නොකරන ලෙස ඉල්ලා සිටි සන්ධ්‍යා එක්නැළිගොඩ “ඒක ඔබතුමාටත් සාපයක් වේවි” යැයි ජනාධිපති මෛත්‍රීපාල සිරිසෙන් හට අනතුරු ඇඟවීය.
ප්‍රගීත් එක්නැලිගොඩ පැහැරගත් රාජපක්ෂවරුන්ට මේ වනවිටත් දඩුවම් ලැබී ඇති බවට කියා සිටි ඇය සත්‍ය හමු නොවු බවත් අපරාධ කරුවන් ඇත්ත ප්‍රකාශ කරන තත්වයකට පත්වන ලෙසත් ඉල්ලා කොටුව දුම්රිය පොළ ඉදිරිපිටදී කාලි මැණියන්ට සහ පත්තිනි මැණියන්ට දේව කන්නලව්වක් සිදු කරන ලදී.
මාධ්‍යවේදී ප්‍රගීත් එක්නැළිගොඩ පැහැරගෙන අතුරුදහන් කරවීමට සැක පිට අත්අඩංගුවට ගෙන සිටි හමුදා සෙබලුන් 2016 වසරේ දී ඇප ලබා යළි සේවයේ පිහිටුවන ලදී.
ප්‍රගීත් එක්නැලිගොඩ අතුරුදහන් කිරීමේ නඩුවේ චූදිත සෙබළුන්ට නැවත යුද හමුදාවේ රැකියා ලබා දී ඇත්තේ රටේ ආරක්ෂක අමාත්‍යවරයා මෙන්ම සේනාධිනායාද වන ජනාධිපති මෛත්‍රිපාල සිරිසේන ගේ අනුදැනුම සහිතව බවට ශ්‍රී ලංකා වෘත්තිය ජනමාධ්‍යවේදින්ගේ සංගමය චෝදනා කර තිබුණි.
Facebook Comments
