කැබ්නට් මණ්ඩලයේ අනුමැතියෙන් අනතුරුව රජයේ ගැසට් පත්‍රයේ පළකර තිබෙන සමාජ මාධ්‍ය පාලනය කිරීම අරමුණු කරගත් පනත් කෙටුම්පතකට දිවයිනේ ප්‍රමුඛතම වෘත්තිය සමිති නායකයකු විරෝධය පළ කර තිබේ.
“මාර්ගගත ක්‍රමවල සුරක්ෂිත භාවය” නම් පනත් කෙටුම්පතට දැඩි විරෝධය පළ කරමින් කොළඹදී මාධ්‍ය හමුවක් පවත්වමින් ලංකා ගුරු සංගමයේ ප්‍රධාන ලේකම් ජෝසප් ස්ටාලින් සදහන් කළේ ජනතාවට තොරතුරු ගෙන යන මාර්ග ආණ්ඩුව විසින් පාලනය කිරීම බරපතල තත්වයක් බවයි.
“මේක බරපතල අනතුරුදායක තත්වයක් හැටියට අපි දකින්නේ.”
අන්තර් ජාලය හරහා තොරතුරු හුවමාරු කිරීමේදී එම තොරතුරේ නිවැරදිතාවය හෝ එම තොරතුරෙන් සිදු වන අගතිය සම්බන්ධයෙන් තිරණය කිරීමේ බලය මෙම පනත හරහා ජනාධිපතිවරයා සතු වන ආකාරයද ගුරු සංගම් නායකයා මාධ්‍ය හමුවේදී පෙන්වා දුන්නේය.
“මෙරටේ අදහස් ප්‍රකාශ කිරීම, ආණ්ඩුක්‍රම ව්‍යවස්ථාවෙන් අපට ලබා දීලා තියන අයිතිය, තොරතුරු දැනගැනීමේ අයිතිය, ඒ වගේම භාෂණයේ නිදහස මේ දෙකම නැති කරන්න තමයි මේ කටයුතු කරමින් යන්නේ.” ලංකා ගුරු සංගම් නායක ජෝසප් ස්ටාලින් වැඩි දුරටත් සදහන් කළේය.
ජනපති නිව්යෝර්ක් නුවරදී
නිව්යෝර්ක් නුවර දී එක්සත් ජාතින්ගේ මහා මණ්ඩලයේ 78 වැනි සැසිවාරය අමතා සිය ප්‍රධාන දේශනය සිදු කරමින් ශ්‍රී ලංකාවේ ජනාධිපති රනිල් වික්‍රමසිංහ සැප්තැම්බර් 21 වැනිදා පවසා තිබුනේ ආරම්භක අවධියට වඩා ලෝකයේ පවතින ආරක්ෂක සන්ධානයන් මේ වන විට පුළුල් වී ඇති අතර ඒවාට මුහුණදීමට පැරණි සහ නව අවස්ථාවන්ට අනුකූලව උපායමාර්ග සැකසෙමින් පවතින බවයි.
“ඩිජිටල් බෙදීම, මූල්‍ය හා ණය අර්බුදය සහ බලශක්ති ප්‍රභවයන්ගේ පරිණාමය යන කරුණු සමඟ උතුර සහ දකුණ අතර පවතින ගෝලීය බෙදීම් තවදුරටත් පුළුල් කරනවා.” ඔහු පවසා තිබුනි.
Facebook Comments
