ශ්‍රී ලංකාවේ මේතාක් සොයාගන්නා ලද විශාලතම සමූහ මිනීවල තුළින් හමුවූ අස්ථි කොටස් අතරින් මතු වූ ළමා ඇට සැකිළි ප්‍රමාණය විසි හය දක්වා ඉහළ ගොස් තිබේ.
මන්නාරම සතොස සමූහ මිනීවලේ ප්‍රධාන වෝහාරික විශේෂඥ අධිකරණ වෛද්‍ය සමින්ද රාජපක්ෂ පවසන පරිදි මේ වන විට මිනිවලෙන් පාදා ගන්නා ලද සමස්ත ඇට සැකිළි ප්‍රමාණය 312කි.
අදාළ ඇට සැකිළි අතරින්, මිනිස් සිරුරු 297 කට අයත් අස්ථි කොටස් මේ වන විටත් ගොඩගෙන තිබේ.
පසුගිය සතිය වන විට සමූහ මිනිවළ තුළින් ළමා සිරුරු 23 කට අදාළ අස්ථි කොටස් හමුවී තිබු අතර මේ සතියේ කැනීම් තුළින් තවත් ළමා සිරුරු 03 ක කොටස් මතුකර ගැනීමට හැකිවී ඇති බවද හෙතෙම පැවසීය.
සොයාගත් අස්ථි කොටස් අතරින් කාබන් පරීක්ෂාවට යොමු කළ සාම්පල් හයක් ජනවාරි 23 වැනිදා ෆ්ලෝරිඩාවේ කාබන් නීර්ණ පරීක්ෂණ රසායනාගාර වෙත ලබාදුන් අතර, අදාළ පරීක්ෂණ වාර්තාව තවත් සතියක පමණ කාලයකින් ලැබීමට නියමිත බවයි විශේෂඥවරයා පෙන්වා දෙන්නේ.
අදාළ කාබන් පරීක්ෂණ දත්ත පිළිබඳ වාර්තාව තමන් වෙත හා මන්නාරම මහේස්ත්‍රාත් අධිකරණය වෙත ලිඛිතව යොමු කරන ලෙසට අදාළ රසායනාගාර දැනුවත් කොට ඇති බවද වෛද්‍යවරයා සඳහන් කළේය.
මන්නාරම පැරණි සතොස ගොඩනැඟීල්ල කඩා දැමීමෙන් ඉවත් කළ පස් රැගෙන ගිය මන්නාරම එමිල් නගර් ප්‍රදේශයේ පස් ගොඩක තිබී මාර්තු 26 වැනිදා අස්ථි කොටස් තොගයක් හමුවීමෙන් අනතුරුව අදාළ ස්ථානය සම්බන්ධයෙන් පරීක්ෂණ පැවැත්වීම ආරම්භ කරනු ලැබීය.
අධිකරණ නියෝගයකට අනුව 2018 මැයි 28 දා සිට මන්නාරම සතොස සමූහ මිනීවලේ කැණිම් කටයුතු ආරම්භ කල අතර මේ වන විට දින 139 තිස්සේ අදාළ පරීක්ෂණ සිදු කර ඇත.
මන්නාරම මහේස්ත්‍රාත් ටි.සරවනරාජාගේ නියෝග යටතේ පුරාවිද්‍යා විමර්ශන මහාචාර්ය රාජ් සෝමදේව හා විශේෂඥ අධිකරණ වෛද්‍ය සමීන්ද්‍ර රාජපක්ෂ මන්නාරම පොලිස් නිලධාරීන්, මන්නාරම අධිකරණ නිලධාරීන්, රජයේ රස පරීක්ෂක නිලධාරීන්ගේ සහයෝගය යටතේ අදාළ ස්ථානයේ පරීක්ෂණ පවත්වයි.
Facebook Comments
