හැත්තෑ එක් වන රාජ්‍ය නිදහස් දින අගනුවර උත්සවශ්‍රීයෙන් සැමරෙද්දී අහිමි නිදහස් ඉල්ලා උතුරු නැගෙනහිර ජනතාව විරෝධතා පවත්වා තිබේ.
“කළු නිදහස් දිනය” ලෙස නම් කරමින් යාපනය විශ්ව විද්‍යාලයේ කළු කොඩි ප්‍රදර්ශනය කරමින් යාපනය විශ්ව විද්‍යාල ශිෂ්‍ය සංගමය සිය විරෝධය ප්‍රදර්ශනය කරන ලදී.
හමුදා විසින් අල්ලා ගෙන සිටින තම පාරම්පරික භූමිය නිදහස් කරන ලෙස හා අතුරුදහන්වුවන්ට යුක්තිය ඉටු කරන ලෙසට මෙන්ම දෙමළ ජනයාට නිදහස ලබා දෙන ලෙස බල කරමින් වු විරෝධතා පුවරු යාපනය විශ්ව විද්‍යාලය පුරා දැක ගත හැකි වු බවයි සිලෝන් නිව්ස් වාර්තාකරු පවසන්නේ.
දේශපාලන සිරකරුවන් නිදහස් කරන ලෙසට හා අතුරුදහන් වුවන්ට යුක්තිය ඉටු කරන ලෙස බල කරමින් කොළඹින් ගොස් සිටි සම අයිතිය ව්‍යාපාරය යාපනය බස් නැවතුම ඉදිරිපිට විරෝධතාවයක් පැවත්වා තිබුණි.
වසරකට වැඩි කාලයක් තිස්සේ අතුරුදහන් වුවන්ට යුක්තිය ඉටු කර දෙන ලෙස බල කරමින් කිලිනොච්චි කන්දසාමී කෝවිල ඉදිරිපිට සත්‍යග්‍රහයේ නිරත අතුරුදහන් වුවන්ගේ ඥාතීන්ද යුක්තිය ඉල්ලා උද්ඝෝෂණයේ නිරත විය.
ශ්‍රී ලංකාවේ නිදහස් දිනය දෙමළ ජනයාට කළු දිනයක් ලෙස නම් කරමින් ඔවුන් සිය විරෝධතාව පැවැත්වු අතර හිටපු උතුරු පළාත් මහ ඇමැතිවරයා ඇතුළු විශාල පිරිසක් එයට එක්ව සිටි බවයි අප වාර්තාකරු පවසන්නේ.
දින 706 තිස්සේ හමුදාව වාඩිලා සිටින තම පාරම්පරික ඉඩම් හා ගොවිබිම් ඉල්ලා විරෝධයේ නිරත කේපාපිලව් ජනයා ද නිදහස් දිනය කළු දිනයක් ලෙස නම් කර විරෝධතා දැක්වීය.
තම ඉඩම් නිදහස් කරන ලෙස බල කරමින් පැවැත්වු විරෝධයට යාපනය හා නැගෙනහිර විශ්ව විද්‍යාල සිසුන් ද එක්වී සිටිනු දැක ගනු ලැබුණි.
මේ අතර නැගෙනහිර විශ්ව විද්‍යාලයට එක්රැස් වු අතුරුදහන් වුවන්ගේ ඥාතීන් තමන් හට යුක්තිය ඉටු කරන ලෙසට බල කරමින් උද්ඝෝෂණයක් පවත්වන ලදී.
Facebook Comments
