යුඇන්පියෙන් ඡන්දෙට යාමට බාහු බලා සිටී (VIDEO)

0

ෆැසිස්ට්වාදයට හා ජාතිවාදයට විරුද්ධව එක්සත් ජාතික පක්ෂය සමග එක්වී නව පෙරමුණක් බිහි කර ඒ ඔස්සේ ඉදිරි මැතිවරණයට තරග වැදීමේ අපේක්ෂාව නව සම සමාජ පක්ෂ නායකයා විසින් ප්‍රකාශයට පත් කර තිබේ

නව පෙරමුණ “එක්සත් ජාතික බලවේගය” ලෙස නම් කර ඇති බව පවසන ආචාර්ය වික්‍රමබාහු කරුණාරත්න තමන්ද කොළඹ දිස්ත්‍රික්කය නියෝජනය කරමින් එම පෙරමුණ සමග එක්ව තරඟ කරන බව පවසා ඇත.

“කොළඹ දිස්ත්‍රික්කයේ තරග කිරීමට මම ඉල්ලා තියෙනවා. අපි විශ්වාස කරනවා ඒක ලැබෙයි කියලා මම හිතනවා. අනෙක් දිස්ත්‍රික්ක වලත් අපේ සහෝදරවරු ඉන්න පළාත් වල තරඟ කිරීමට ඉල්ලා තියෙනවා. අපි විශ්වාස කරනවා අපේ සම සමාජ අය කිහිප දෙනෙක් මාත් සමඟ විවිධ ප්‍රදේශ වලින් තරඟයට ඉදිරිපත් වීමට අවකාශයක් ලැබෙයි කියලා.”

සජිත් ප්‍රේමදාස නොයෙකුත් පුද්ගලයන්ගේ ඉච්ඡා බස් වලට රැවටී මෝඩයෙක් සේ කටයුතු කර ඔහුගේ පියාටත් අගෞරව කරමින් සිටින බවට ද පසුගිය දා පැවති මාධ්‍ය හමුවක දී නසසප නායකයා චෝදනා කළේය.

ඔහු එම මෝඩ ගමන නවතා දමා ප්‍රජාතන්ත්‍රවදී සටනට නැවත වරක් එක්වනු ඇති බවටයි ආචාර්ය වික්‍රමබාහු කරුණාරත්න විශ්වාසය පළ කරන්නේ.

රට තුළ විශාල ලෙස විනාශකාරී අංග ලක්ෂණ මතු වෙමින් තිබෙන බවට අනතුරු ඇඟවු ආචාර්යවරයා සුළු ජාතින්ගේ අයිතීන් සම්බන්ධව හා මානව හිමිකම් සුරැකීම වෙනුවෙන් එක්සත් ජාතීන් සමඟ ගිවිසගත් දෑ වලින් වත්මන් ආණ්ඩුව ඉවත් වීම ඊට උදාහරණ ලෙස පෙන්වා දුන්නේය.

විදෙස් රට වලට තර්ජනය කරමින් එම ගිවිසුමෙන් ඉවත්වීම හරහා වෙළෙඳාමට මෙන්ම විදෙස් සබඳතා වලට ද සම්බාධක වැටීමේ අවදානමක් පවතින බවද නව සම සමාජ පක්ෂ නායක ආචාර්ය වික්‍රමබාහු කරුණාරත්න වැඩි දුරටත් කියා සිටියේය.

 

Facebook Comments