පරණ යකඩ වලට බෝම්බ විකුණන්න ගිය පිරිසක් අල්ලයි

දස වසරකට වැඩි කලක් යුද හමුදාව බලහත්කාරයෙන් වාඩිලා සිටීමෙන් අනතුරුව මුල් හිමිකරුවන්ට බාර දුන් ඉඩමකින් හමුවු දැවැන්ත උණ්ඩ දෙකක් රැගෙන යමින් සිටි පිරිසක් අත්අඩංගුවට ගෙන තිබේ.

පුදුකුඩිඉරිප්පු පොලිසිය පවසන්නේ මීට පෙර යුද හමුදා කඳවුරක් පිහිටි භූමියක තිබි සොයාගත් උණ්ඩ කොපු දෙකක් පරණ යකඩ සඳහා විකිනීමට රැගෙන යමින් සිටි හය දෙනකු ජනවාරි 4 වැනිදා අත්අඩංගුවට ගත් බවයි.

පළාත් බද වාර්තාකරුවන් පවසන පරිදි එම ඉඩම මුල් හිමිකරුවන්ට පැවරීමෙන් පසුව ඔවුන් එහි වැට සකස් කිරීමේදී ගුවන් බෝම්බ බවට විශ්වාස කෙරෙන උණ්ඩ කොපු දෙකක් හමුවී තිබේ.

එක් උණ්ඩ කොපුවක් කිලෝග්රැම් 400 ක පමණ බරකින් යුතු වන අතර ඒ තුළ පුපුරන ද්‍රව්‍ය නොමැති බව පොලිසිය ජනමාධ්‍ය වෙත පවසා තිබේ.

අත්අඩංගුවට ගත් පිරිස ජනවාරි 5 වැනි බ්‍රහස්පතින්දා මුලතිව් මහේස්ත්‍රාත් අධිකරණයට ඉදිරිපත් කිරීමෙන් පසුව ඇප මත මුදා හැර ඇති බව පළාත් බද මාධ්‍යවේදීහු වැඩි දුරටත් පවසති.

682 වැනි පාබල සේනාංකය

යුද්ධය අවසන්ව ප්‍රදේශයේ ජනයා නැවත පදිංචියට පැමිණෙන විට පුදුකුඩිඉරිප්පු ප්‍රාදේශිය ලේකම් කාර්යාලය ඉදිරිපිට පවුල් 49 ක් පදිංචිව සිටි අක්කර 19ක ඉඩමක් රජයේ හමුදා අත්පත් කරගෙන එහි හමුදා කඳවුරක් ඉදිකර තිබිණි.

පලාත් බද වාර්තාකරුවන් පවසන්නේ 682 වැනි පාබල සේනාංකයේ මුලස්ථානයක් එහි ස්ථාපිත කර තිබු බවයි.

තුන් මසකින් යළි බාර දෙන බවට ඉඩම් හිමියන්ට 2017 දී පොරොන්දු වූ රජයේ හමුදා ප්‍රධානීහු සිව් වසරකට පසු 2021 ඔක්තෝබර් මස අගදී ඉඩම් අක්කර 11 ක් මුදා හැරියෝය. මෙම විශාල ප්‍රමාණයේ උණ්ඩ කොපු දෙක හමුවී ඇත්තේ එලෙස නිදහස් කළ භුමියකිනි.

682 වැනි පාබල සේනාංකයේ මුලතිව් මුලස්ථානයේ පැවති උත්සවයකදී දිස්ත්‍රික් හමුදා අණදෙන්නා වූ මේජර් ජෙනරාල් සිසිර පිලපිටිය ඉඩම් නිදහස් කිරීමේ ලියවිලි දිස්ත්‍රික් ලේකම් කේ.විමලනාදන් වෙත බාර දී තිබේ.

තමන්ට අයත් ඉඩම් නිදහස් කරන ලෙස ඉඩම් හිමියෝ 2017 මාර්තු මාසයේ පාබල හමුදා කඳවුර ඉදිරිපිට දියත් කළ සත්‍යග්‍රහය හමුවේ අක්කර 07 ක් නිදහස් කරමින්, බලහත්කාරයෙන් අල්ලා ගත් සෙසු කොටස් හය මසක් ඇතුලත මුදා හරින්නට පොරොන්දු විය.

පාබල හමුදා අත්පත් කරගත්, පවුල් 29 පදිංචිව සිටි ඉතිරි ඉඩම් අක්කර 11 දෙවැනි පියවර ලෙස මාස තුනක කාලයකින් හා හමුදාව අත්පත් කර ගත් පොන්නම්බලම් රෝහල නිදහස් කිරීමට මාස හයක කාලයක් ගත වන බවද හමුදා ප්‍රධානින් එවකට සදහන් කර තිබුනි. එම රෝහල මේ තාක් නිදහස් කර ඇති බවක් දැනගන්නට නැත.

ඒ අතර 682 පාබල හමුදා සේනාංකයේ නව මුලස්ථානය පිහිටවුයේ මුලතිව්හි පරන්තන් වීදියේ රජයට අයත් අක්කර 75 ක ඉඩමක් පවරා ගෙනයි.