පුරාවිද්‍යා දෙපාර්තමේන්තුව හරහා උතුරු නැගෙනහිර දෙමළ ඉඩම් බලහත්කාරයෙන් අත්පත් කරගත් සංස්කෘති ඇමති ධුරයෙන් ඉවත් කළ යුතු බවට දෙමළ දේශපාලන පක්‍ෂයක් ජනාධිපතිට යෝජනා කර තිබේ.
“උතුරු නැගෙනහිර පළාතේ දෙමළ මිනිස්සු ජීවත්වෙන, ගොවි තැන් කරන ඉඩම් පුරාවිද්‍යාව නමින් අත්පත් කරගන්නේ ඇමැති විදුර වික්‍රමනායකගේ අණින්,“ යැයි ඉලංගෙයි තමිල් අරසු කච්චි මාධ්‍ය ප්‍රකාශක, පාර්ලිමේන්තු මන්ත්‍රී එම්. ඒ. සුමන්තිරන් පවසයි.
යාපනය, චාවකච්චේරියේ පිහිටි තමිල් අරසු කච්ච්චි ප්‍රධාන කාර්යාලයේදී මාධ්‍යවේදීන් අමතමින් සුමන්තිරන් මන්ත්‍රී වරයා කියා සිටියේ බුද්ධශාසන, ආගමික සහ සංස්කෘතික කටයුතු ඇමැති වික්‍රමනායක ආරක්ෂක හමුදා සේනාංක සමග පැමිණ දෙමළ ජනයාගේ ඉඩම් අත්පත් කරගැනීමට පුරාවිද්‍යා නිලධාරීන්ට අණකරන බවයි.
“ජනාධිපති රනිල් වික්‍රමසිංහ එක්ක තමිල් අරසු කච්චි විදිහට අපි කළ කතා බහේදී පෙනුනේ පුරාවිද්‍යා කොමසාරිස් මනතුංග කැබිනට් තීරණවලට අනුව නොවන බවයි. දැන් ඔහු තනතුරෙන් ඉල්ලා අස්වෙලා. ඒ ගැන විවිධ වාද විවාද තියෙනවා. “
අමාත්‍ය මණ්ඩලය තුල අර්බුද තිබිය හැකි නමුත් ඒ නිසා දෙමළ ජනයාට අසාධාරණයක් නොවිය යුතු බවයි පාර්ලිමේන්තු මන්ත්‍රී සුමන්තිරන් පවසන්නේ.
“මේ අර්බුදය නිර්මාණය කළ වගකිව යුත්තා විදිහට විදුර වික්‍රමනායක ඇමතිවරයා ඉල්ලා අස්වෙන්න ඕනේ, නැත්නම් ජනාධිපතිවරයා ඔහුව ඇමතිකමෙන් ඉවත් කරන්න ඕනේ. “
මතබේදයට තුඩුදී ඇති කුරුන්තුර් මලේ පුරාවිද්‍යා භුමියට හමුදා පිරිවරා ගොස් අලුතින් විහාරයක් ඉදි කිරීමට ගෝඨාභය රාජපක්ෂ පාලන සමයේ මුල පිරුවේ විදුර වික්‍රමනායකයි.
Facebook Comments
