යුද්ධයේ සත්‍යය අනාවරණය කිරීම පිණිස යුද බිම මැද සිට වාර්තාකරණයේ යෙදී සිටියදී බර අවි ප්‍රහාරයෙන් මියගිය දෙමළ මාධ්‍යවේදියකුගේ 12 වැනි ගුණ සමරුව මඩකලපුවේ දී පවත්වා තිබේ.
නැගෙනහිර පළාතේ මාධ්‍යවේදීන් විසින් සමරන ලද්දේ ආණ්ඩුව විසින් නම් කෙරුණු යුද මුක්ත කලාපයක පිහිටි මුලතිව්හි තෙවිපුරම් ගම්මානයට රජයේ හමුදා ගැසූ කාලතුවක්කු ප්‍රහාරයට 2009 පෙබරවාරි 11 වැනිදා ගොදුරුවී ප්‍රතිකාර ලබාගැනීමට නැතිකමින් පසුදා මියගිය පුණ්‍යමුර්ති සත්‍යමුර්තිය.
“ෂෙල් ප්‍රහාරයෙන් ලද තුවාලවලට නිසි ප්‍රතිකාර කිරීමට අවශ්‍ය ඖෂධ නොමැතිකම නිසා අධික ලෙස සිදු වූ රුධිරය වහනය නවතාලීමට මඟක් නොමැති වීමෙන්, විසි හතර පැයක් දුක් විඳි තිස්හත් හැවිරිදි සත්‍යමුර්ති පෙබරවාරි 12 වැනිදා සදහටම දෑස් පියා ගත්තේය,” යි JDS වෙබ් අඩවියේ සටහන් කෙරුණි.
ඒ දිනයේ දේවිපුරම් හා වල්ලිපුනම් ගම් වල‍ට ශ්‍රී ලංකා යුද හමුදාව විසින් ගසන ලද ෂෙල් ප්‍රහාර වලින් මියගිය බවට වාර්තාවන ගැහැනුන්, මිනිසුන් හා ළමයින් ගණන 138 කි. තුන්සිය පනහකට අධික පිරිසක් තුවාල ලදහ.
ත්‍රිකුණාමලේ දිස්ත්‍රික්කයේ මාවිල්ආරුවෙන් 2006 දී යුද්ධය ආරම්භ කළ අවස්ථාවේ සිටම සත්‍යය හෙළි කිරීමට කටයුතු කළ මාධ්‍යවේදීන් අතර කැපී පෙනුණු අයකු ලෙස සත්‍යමුර්ති ගෞරවාදරයට පත් ව සිටී.
ඔහුගේ ඝාතනය යුද අපරාධයක් ලෙස ජාත්‍යන්තර මාධ්‍ය සංවිධාන විසින් හෙලා දකින ලදී.
“යුද්ධය පියවරෙන් පියවර උත්සන්න වෙලා පඩුවන්කරෙයි, වන්නි, මන්නාරම, කිලිනොච්චි සහ මුලතිව් පුරා ඇවිලීගෙන යනකොට මුල ඉඳලම සත්‍ය තොරතුරු ලබා දීමටත් සමූහ ඝාතන හෙළි කිරීමටත් කටයුතු කළ මාධ්‍යවේදීන් අතර සත්‍යමුර්ති ප්‍රමුඛයෙක්,” යැයි මඩකලපු මාධ්‍ය සමාජයේ පැවති ඔහුගේ 12 වැනි ගුණ සමරුවේ දී විශේෂ දේශනයක් කළ ජ්‍යෙෂ්ඨ මාධ්‍යවේදී හා හිටපු පාර්ලිමේන්තු මන්ත්‍රී පී අරියනේන්ද්‍රන් කියා සිටියේය.
“මැයි මාසයේ මහා විනාශයට තුන් මාසයකට ඉස්සරින් ඉඳන් ඉතා බරපතල ලෙස ප්‍රහාර එල්ල වුනා. මේ ප්‍රහාර එල්ල වුනේ මහජනතාව මැදට. සත්‍යමුර්ති ඒ ජනතාව මැද ඉඳගෙන සත්‍යය හෙළිදරව් කරන්නට ගිහින් ඉන්නකොට ආණ්ඩුවේ ෂෙල් ප්‍රහාරයට ගොදුරු වෙලා සාමාන්‍ය මිනිස්සු සිය ගණනක් මැරුණා.”
යුද්ධයේ සැබෑ තත්වය හෙළි කිරීමට වෙහෙසී මරුමුවට පත් සත්‍යමුර්ති ඇතුළු මාධ්‍යවේදීන් හතලිස් පහකට පමණ තවමත් යුක්තිය ඉටුවී නැතැයි කනගාටුව පලකළ මාධ්‍යවේදී අරියනේන්ද්‍රන් ඒ අතර සිංහල පස් දෙනකුද, මුස්ලිම් 3 දෙනකුද වන බව කියා සිටියේය.
“ ‘එකදු සිවිල් වැසියෙක් හෝ ඝාතනය නොවන’ ලෙස රාජ්‍ය ආරක්‍ෂක හමුදා විසින් දියත් කළ අවසන් මෙහෙයුම් විසින් පස් මාසයක් තිස්සේ කණින ලද වන්නියේ සමූහ මිනී වළෙහි වැළැළුණු දස දහස් සංඛ්‍යාත ජනයා අතර පුනියමූර්ති සත්‍යමූර්ති තවත් එක් අයකු පමණක් බව ඇත්තකි. නමුත් ඒ මිනිස් සංහාරය පිළිබඳ ඉතිහාස කතාව දැනගනු රිසි අතළොස්සක් හෝ සිංහලයන් විසින් නිසැකයෙන්ම දත යුතු අපමණ ජීවනාදර්ශයන් අතරට සත්‍යමූර්තිගේ ජීවිතය ද නිසැකවම ඇතුළත් වේ,” යි පුණ්‍යමුර්ති සත්‍යමුර්තිගේ අටවැනි සංවත්සරය නිමිත්තෙන් ජ්‍යෙෂ්ඨ මාධ්‍යවේදී අතුල විතානගේ සටහන් කර තිබුණි.
Facebook Comments
