නිරෝධායන රෙගුලාසි උල්ලංඝනය කරමින් ජනමාධ්‍ය අමාත්‍යවරයා උත්සවාකාරයෙන් පැල හිටුවීම ගුරු සංගම් වල දැඩි විරෝධයට ලක්වීමෙන් අනතුරුව නැවත දැනුම් දෙන තුරු පාසල්වල උත්සව පැවැත්වීම අත්හිටුවීමට අධ්‍යාපන ලේකම්වරයා නියෝග කර තිබේ.
රටේ පවතින වසංගත තත්වය හමුවේ අධ්‍යාපන ලේකම්වරයා දුන් නියෝගය ක්‍රියාත්මක කිරීමට පළාත් අධ්‍යාපන බලධාරීන් කටයුතු කළ යුතු බව දිවයිනේ ප්‍රමුඛතම ගුරු සංගමයක් අවධාරණය කරයි.
“කෝවිඩ් 19 ව්‍යාප්තිය වැලැක්වීම වෙනුවෙන් අධ්‍යාපන ලේකම්වරයා විසින් ගන්නා ලද මෙම ක්‍රියාමාර්ගය පිළිබඳව අවධානය යොමු කර පළාත් අධ්‍යාපන බලධාරීන් මෙම නියෝගය ක්‍රියාත්මක කිරීමට අදාළ කටයුතු සිදුකළ යුතු බව ලංකා ගුරු සංගමය අවධාරණය කර සිටී.”
නිවේදනයක් නිකුත් කරමින් ලංකා ගුරු සංගමයේ ප්‍රධාන ලේකම් ජෝසප් ස්ටාලින් පෙබරවාරි 15 සදුදා පෙන්වා දෙන්නේ කෝවිඩ් 19 ව්‍යාප්තිය තුළ පාසල්වල උත්සව ඇතුළු වෙනත් බාහිර ක්‍රියාකාරකම් නොකළ යුතු බවට අධ්‍යාපන අමාත්‍යාංශය චක‍්‍රලේඛයක් පවා නිකුත් කොට තිබියදී විවිධ උත්සව පැවැත්වීම දක්නට ලැබුන බවයි.
පෙබරවාරි 12 දින මහනුවර කෙංගල්ල මහා විද්‍යාලයේ දී ජනමාධ්‍ය අමාත්‍ය කෙහෙලිය රඹුක්වැල්ල විසින් නිරෝධායන පිළිවෙත් ද උල්ලංඝණය කරමින් පාසල් සිසුන් ද සහභාගි කරවාගෙන උත්සවයක් පවත්වා තිබුණේ එම පාසලේ දරුවන් සිව්දෙනෙකුට සහ ගුරුවරියකට කෝවිඩ් 19 ආසාදනය වී තිබියදීය.
ඒ සම්බන්ධයෙන් ලංකා ගුරු සංගමය අධ්‍යාපන බලධාරීන්ට පැමිණිලි කර තිබුනි.
පෙබරවාරි 15 සදුදා අධ්‍යාපන ලේකම් මහාචාර්ය කපිල පෙරේරා විසින් පළාත් අධ්‍යාපන අධ්‍යක්ෂවරු, කලාප අධ්‍යාපන අධ්‍යක්ෂවරු, කොට්ඨාස අධ්‍යක්ෂවරු, පරිවේණාධිපතිවරු සහ විදුහල්පතිවරුන්ට ලිඛිතව දැනුම් දී ඇත්තේ කෝවිඩ් 19 වසංගත තත්වය තුළ නැවත දැනුම් දෙන තුරු පාසල්වල උත්සව පැවැත්වීම අත්හිටුවන බවයි.
එසේම ඉදිරියේ දී එවැනි උත්සව පැවැත්වීම සඳහා දැනටමත් කටයුතු සංවිධානය කර ඇත්නම් එම කටයුතු ද නතර කිරීමට අවශ්‍ය ක්‍රියාමාර්ග ගන්නා ලෙස ද එම ලිපිය මගින් වැඩි දුරටත් දැනුම් දී ඇත.
Facebook Comments
