කොරෝනා ආපදා මධ්‍යයේ හාම්පුතුන් “බොරදියේ මාළු බෑමක”

ආණ්ඩුවේ මැදිහත්වීමෙන් පැවැති සාකච්ඡාවකදී, ලොව පුරා පැතිර යන කොරෝනා වසංගත තත්වය ප්‍රයෝජනයට ගනිමින් හාම්පුතුන් විසින් කම්කරු අයිතීන් දියාරු කිරීමේ උත්සාහයක නිරත වු බවට වෘත්තීය සමිති නායකයෝ චෝදනා කරති.

කම්කරු අමාත්‍ය දිනේෂ් ගුණවර්ධන සහ වෘත්තිය සමිති නායකයන් සමග අප්‍රේල් 27 දින පැවැත්වු සාකච්ඡාවකදී නිදහස් වෙළෙඳ කලාප සේවක සේවිකාවන් දස දහස් සංඛ්‍යාත පිරිසකට සිය රැකියාව අහිමි කරමින් ඔවුන්ගේ වෘත්තීය අයිතීන්ද කප්පාදු කිරීමට හාම්පුතුන් අසතුටුදායක සහ අප්‍රසන්න වෑයමක් දැරූ බවයි දිවයිනේ පුද්ගලික අංශයේ මුල් පෙලේ වෘත්තීය සමිතියක් පවසන්නේ.

තුනෙන් දෙකකටත් වැඩි සේවක සේවිකා පිරිසකට නැවත රැකියා ලබා දිය නොහැකි බව පවසන හාම්පුතුන් සේවකයන්ගේ මැයි මාසයේ සිට ඉදිරි වැටුප් ගෙවීම සදහා රජයේ උපකාරය අයැද සිටි බව ලංකා වෙළඳ, කාර්මික හා පොදු කම්කරු සංගමයේ ලේකම් සිල්වෙස්ටර් ජයකොඩි පෙන්වා දෙයි.

සේවකයන්ගේ මැයි මාසයේ සිට ඉදිරි වැටුප් ගෙවීම සදහා හාම්පුතුන් විසින් රජයේ උපකාරය අයැද සිටියද එම සාකච්ඡාව ඉදිරියට ගෙන යාමේ අවශ්‍යතාවයක් පෙන්නුම් නොකළ බව සදහන් කරන නිදහස් වෙළද කලාප සහ පොදු සේවා සේවක සංගමයේ සභාපති ඇන්ටන් මාර්කස් මාධ්‍යවේදීන් සමග කියා සිටියේ එම සාකච්ඡාව තුලදී හාම්පුතුන් විසින් සිය සම්පුර්ණ කාලය යොදවන ලද්දේ කම්කරු නීතිය වෙනස් කර ගැනීම සදහා බවයි.

වෙළද කලාපයේ සේවකයන්ගේ ගැටලු වලට විසදුම්, යෝජනා ඉදිරිපත් කිරීම සදහා හාම්පුතුන් වෙත දින තුනක කාලයක් කම්කරු අමාත්‍යවරයා විසින් පසුගිය සතියේ ලබා දී තිබු අතර ඊයේ දින සාකච්ඡාවේදී හාම්පුතුන් විසින් ඉදිරිපත් කළ පිටු හතරක ඉල්ලීම් මාලාවක් ලංකා වෙළෙඳ, කාර්මික හා පොදු කම්කරු සංගමයේ ලේකම් සිල්වෙස්ටර් ජයකොඩි විසින් හදුන්වනු ලැබුවේ සේවක අයිතීන් කප්පාදු කරන යෝජනාවලියක් ලෙසයි.

වෘත්තීය සමිති නායක සිල්වෙස්ටර් ජයකොඩි මාධ්‍යවේදීන් හමුවේ කියා සිටි පරිදි ලංකා සේවක සංගමයේ අධ්‍යක්ෂ ජනරාල් කනිෂ්ක වීරසිංහ විසින් ඉදිරිපත් කර ඇති යෝජනාවලිය හරහා ඔහු වඩාත් උත්සාහ ගෙන ඇත්තේ සේවකයන්ගේ සේවය අවසන් කිරීමේ පනත සං‌ශෝධනය කර ගැනීමටයි.

හාම්පුතුන්ගේ සංගමයේ ප්‍රධානියාගේ එම ක්‍රියාව වෘත්තීය සමිති නායකයා හදුන්වා දෙන්නේ “බොර දියේ මාළු බෑමට ගන්නා උත්සාහයක්” ලෙසයි.

ලංකා වෙළඳ, කාර්මික හා පොදු කම්කරු සංගමයේ ලේකම් සිල්වෙස්ටර් ජයකොඩි පෙන්වා දෙන පරිදි මාස හයක කාලයක් යනතෙක් අතිකාල දීමනා නොමැතිව සේවය කිරීම, මාස හයක් යනතෙක් සේවක අර්ථසාධක අරමුදල (EPF) නොගෙවීම, වැඩ කිරීම සදහා නම්‍යශිලී වේලාවන් හදුන්වා දීමේ ක්‍රමවේදයක් අනුගමනය කිරීම වැනි යෝජනා හාම්පුතුන් විසින් ඉදිරිපත් කර තිබේ.

වැඩ බැරිනම් “අපිට දෙන්න”

හාම්පුතුන්ගේ මෙම යෝජනා වලට දැඩිව විරෝධය දැක්වු වෘත්තීය සමිති නායකයන් එහිදී ප්‍රශ්න කර ඇත්තේ වසර ගණනාවක් තමන් යටතේ සේවය කළ සේවකයන් වෙනුවෙන් මේ මොහොතේ අවම වශයෙන් මාස කිහිපයක් හෝ යනතෙක් වැටුපක් ගෙවීමට නොහැකිනම් එවැනි ආයතන ශ්‍රී ලංකාව තුළ පවත්වාගෙන යාමේ ප්‍රතිළුලය කුමක්ද යන්නයි.

වෘත්තීය සමිති නායකයන් එහිදී දැඩි ස්වරයෙන් හාම්පුතුන් වෙත අවධාරණය කර ඇත්තේ ආයතන තමන්ට ලබා දෙන්නේනම් කම්කරු පාලනයක් යටතේ එම ආයතන මෙහෙයවා පෙන්විය හැකි බවයි.

කම්කරු අමාත්‍ය දිනේෂ් ගුණවර්ධන ද එහිදී හාම්පුතුන්ගේ අදහස් වලට එකග නොවු අතර කොරෝනා වසංගත තත්වය හේතුවෙන් සේවකයන්ගේ සේවය අවසන් කිරීම කිසිසේත්ම නොකළ යුතු බව අවධාරණය කළේයැයි වෘත්තිය සමිති නායක සිල්වෙස්ටර් ජයකොඩි සදහන් කරයි.

පසුගිය රජය විසින් ඉදිරිපත් කිරීමෙන් පසු වෘත්තිය සමිති 22 ක් විසින් ප්‍රතික්ෂ්‍රේප කළ “ඒකීය කම්කරු පනතේ” අඩංගු යෝජනා හාම්පුතුන්ගේ යෝජනාවලිය තුළ පුර්ණ වශයෙන් අන්තර් ගත වී තිබු බව නිදහස් වෙළද කලාප සහ පොදු සේවා සේවක සංගමයේ සභාපති ඇන්ටන් මාර්කස් පෙන්වා දෙයි.

ඔහු වැඩි දුරටත් මාධ්‍යවේදීන් හමුවේ අවධාරණය කර සිටියේ ආයෝජන ප්‍රවර්ධන කලාපයේ සේවකයන්ගේ අප්‍රේල් මස වැටුප අනිවාර්යෙන්ම ආයතන ප්‍රධානීන් විසින් සේවකයන්ට ගෙවිය යුතු බවයි.

සේවක කප්පාදුව දැනටමත් ඇරඹිලා

ලෝකය පුරා ව්‍යාප්තව ඇති වසංගත තත්වය හමුවේ සිය ගැනුම් කරුවන් විසින් නව ඇනවුම් සිදු නොකරන බැවින් දැනටමත් මුල්‍ය අර්බුදයකට මුහුණ දී සිටින තත්වයක් තුළ ආයතන පවත්වාගෙන යාමේ බරපතල ගැටළුවක් උද්ගත වී ඇති බව පවසමින් ඇතැම් ආයතන මේ වන විටත් සිය සේවකයන් ඉවත් කිරීමේ කටයුතු ආරම්භ කර ඇති බව පවසන වෘත්තිය සමිති නායක සිල්වෙස්ටර් ජයකොඩි පෙන්වා දෙන්නේ එවැනි සිද්ධීන් කිහිපයක් මේ වන විටත් තම සංගමයට වාර්තා වී ඇති බවයි.

ඒකල, යක්කල, කෑගල්ල , කොග්ගල යන ප්‍රදේශවල පිහිටා තිබෙන එක් ඇගලුම් සමාගමක සේවක සේවිකාවන්ට වන්දි මුදලක් ලබාගෙන සේවයෙන් ඉල්ලා අස්වන ලෙස එහි පාලකයන් විසින් මේ වන විටත් බලකර ඇති බව වෘත්තිය සමිති නායකයා අවධාරණය කරයි.

මාස 6 ට අඩු කාලයක් සේවය කළ සේවකයන් මෙන්ම මෑන් පවර් ක්‍රමය යටතේ සේවයේ නිරත වුවන් මේ හරහා දැඩි අසරණතාවයකට පත්ව ඇති බව ජ්‍යෙෂ්ඨ වෘත්තිය සමිති නායකයා පෙන්වා දෙයි.

නිදහසට කරුණු ඉදිරිපත් කරමින් සේවක කප්පාදුවක් සිදු කිරීමට හාම්පුතුන් විසින් ගන්නා උත්සාහය කිසිදු සාධාරණ පියවරක් නොවන බව පෙන්වා දෙන වෘත්තිය සමිති නායකයන් අවධාරණය කරන්නේ යුරෝපයේ ඇගළුම් විලාසිතා වසරින් වසර වෙනස් වන බැවින් තත්වය සමනය වු වහාම නැවතත් මෙරටට නව ඇනවුම් ලැබෙනු ඇති බවයි.

එතෙක් මෙම සේවකයන්ගේ රැකියා සුරක්ෂිත කළ යුතු බව වෘත්තිය සමිති නායකයෝ පෙන්වා දෙති.

කම්කරු අමාතාංශයේ පැවැති එම සාකච්ඡාව සදහා කම්කරු අමාත්‍යවරයා, කම්කරු කොමසාරිස් ජනරාල්, කම්කරු අමාත්‍යාශයේ ලේකම්, හාම්පුතුන්ගේ නියෝජිතයන් සහ නිදහස් වෙළද කලාප සහ පොදු සේවා සේවක සංගමය, ශ්‍රී ලංකා නිදහස් සේවක සංගමය, ලංකා වෙළෙඳ කාර්මික හා පොදු කම්කරු සංගමය, ජාතික වෘත්තිය සමිති සම්මේලනය යන වෘත්තීය සමිති හතරේ නියෝජිතයන් එක්ව තිබේ.

රජයේ සංඛ්‍යා ලේඛන අනුව දිවයින පුරා නිදහස් වෙළද කළාප 14ක කර්මාන්ත ශාලා 278 ක සේවක සේවිකාවෝ 1,37,478 ක් සේවය කරති.