සෞඛ්‍යාරක්ෂාව ගැන නුපුහුණු හමුදා සාමාජිකයන් කොරෝනා මර්දනයට යෙදවීම හරහා රජය ප්‍රමුඛ සෞඛ්‍ය අංශ අපරාධයක් සිදු කර ඇති බවට ඉහල පෙලේ සෞඛ්‍ය වෘත්තිය සමිති නායකයෙකු චෝදනා කර තිබේ.
ලොව කිසිදු රාජ්‍යයක් කොරෝනා මර්දනයේ ප්‍රමුඛස්ථානය හමුදාවට ලබා නොදෙන බවත් මෙරට හමුදා කොවිඩ් 19 මර්දනයට යොදා ගනිමින් ඔවුන් රෝගයට නිර්වාරණය කිරීම කැඳවා ගන්නා ලද ප්‍රශ්නයක් බවයි හිටපු පාර්ලිමේන්තු මන්ත්‍රී රජයේ හෙද නිලධාරින්ගේ සංගමයේ සමන් රත්නප්‍රිය පෙන්වා දෙන්නේ.
“මේ වගේ වසංගත තත්ත්වයකදී ප්‍රමුඛතාවය ගන්න ඕනේ සෞඛ්‍ය අංශ. මොකද මේක විද්‍යාව සම්බන්ධ තාක්ෂණය සම්බන්ධ ප්‍රශ්නයක්. ලෝකේ හැම රටක්ම එහෙමයි. දියුණු රටක වේවා දියුණු නැති රටක වේවා සෞඛ්‍ය අංශ මිසක් හමුදාව හෝ පොලිසිය හෝ වෙනත් කණ්ඩායමක් මේකෙ ප්‍රමුඛත්වය අරගෙන කටයුතු කරනවා අපි දකින්නේ නෑ. නමුත් ලංකාවේ තත්ත්වය වෙනස් වුනා. කාර්ය සාධක බලකායේ ප්‍රධානියා කළේ හමුදාපතිවරයා ඉතින් ඒක ගැලපෙන්නෙ නැහැයි කියන කාරණය අපි කලින්ම සඳහන් කළා.”
හමුදාව හෝ පොලිසිය කළ යුත්තේ මෙම තත්වයට මුහුණ දීමට සාක්ෂරතාවක් ඇති සෞඛ්‍ය වෙත වෙනත් ආකාරයෙන් සහාය දීම බව පවසන වෘත්තිය සමිති නායකයා ලොව පුරා සිදුවන්නේ එය බව කියා සිටියේය.
ආරක්ෂක අංශ මෙවැනි අවස්ථාවක සහායට ගැනීමට පෙර ඔවුන්ට දින කිහිපයක් පුහුණුවක් ලබා දිය යුතු බවත් එය සෞඛ්‍ය බලාධාරින්ගේ වගකීමක් බව අවධාරණය කරන සමන් රත්නප්‍රිය එවැන්නක් සිදුවුයේ නම් නාවික සෙබලුන්ට මෙවැනි ඉරණමක් අත්නොවන බවයි පවසන්නේ.
කොරෝනා අසාදිත රෝගීන් කඳවුරෙන් පිට සමාජ සමග මුසුවීම හේතුවෙන් ඔවුන් සියලු දෙනා පරීක්ෂණ වලට සහ නිරෝධායනයට යොමු කිරීමට සිදුව ඇති අතර මෙය කළමනාකරණය නොකර ගැනීමට සම්බන්ධව සෞඛ්‍ය බලධාරින් වගකිව යුතු බවයි රජයේ හෙද නිලධාරින්ගේ සංගමයේ හිටපු පාර්ලිමේන්තු මන්ත්‍රී සමන් රත්නප්‍රිය වැඩි දුරටත් සඳහන් කරන්නේ.
Facebook Comments
