ගුරු-මුල්ගුරු වැටුප් සටනට පෙර නොවූ විරූ ආකාරයේ සහයෝගයක් දෙගුරුන් විසින් ලබා දෙන මොහොතක සිසුවකුගේ පියකුට ආණ්ඩු පක්ෂයේ දේශපාලනඥයෙක් සිදු කළ පහරදීම සම්බන්ධයෙන් නීතිය ක්‍රියාත්මක කරන ලෙස පොලිස්පතිට ලිඛිත පැමිණිල්ලක් ඉදිරිපත් කර තිබේ.
එසේ නොකළහොත් දැඩි වෘත්තිය ක්‍රියාමාර්ගයකට එළඹෙන බවට ගුරු විදුහල්පති වෘත්තිය සමිති සන්ධානය පොලිස්පතිවරයාට අනතුරු අගවා ඇත.
ගුරු විදුහල්පති වැටුප් විෂමතාවය විසදීමට බලකරමින් මාස 3 කට වැඩි කාලයක් තිස්සේ ගුරුවරුන් සහ විදුහල්පතිවරුන් ගෙන යන අරගලයට සහාය දක්වමින් නොවැම්බර් 03 වැනි බදාදා දිවයින පුරා පාසල්වල දරුවන්ගේ දෙමව්පියන් පාසල් ඉදිරිපිට උද්ඝෝෂණ දියත් කර තිබුනි.
ගුරු විදුහල්පති වෘත්තිය සමිති සන්ධානය පොලිස්පතිවරයාට පැමිණිලි කර ඇත්තේ මාවනැල්ල ප්‍රදේශිය දේශපාලනඥයකු එවැනි විරෝධතාවයක යෙදී සිටි පියෙකුට පහර දී ඇති බවයි.
“මාවනැල්ල මෙඩේරිගම විදුහලේ දෙමව්පියන් ද එලෙස උද්ඝෝෂණයේ යෙදී සිටියදී එම ස්ථානයට පැමිණි මාවනැල්ල ප්‍රදේශිය සභාවේ උප සභාපති කේ. ජී පියතිස්ස මන්ත්‍රීවරයා හා තවත් ප්‍රාදේශිය සභා මන්ත්‍රීවරු දෙදෙනෙක් දෙමව්පියන් එළවා දමමින් පාසල් භුමිය තුළ දී දරුවෙකුගේ පියෙකුට පහර දී ඇත.”
එම පැමිණිල්ලේ වැඩි දුරටත් සඳහන් කර ඇත්තේ දේශපාලනඥයන් බලහත්කාරයෙන් පාසල් පරිශ්‍රයට හා කාර්යාලයට ඇතුල්වෙමින් ගුරුවරුන්ට පරිභව කරමින් තර්ජනයද කර ඇති බවයි.
මේ සම්බන්ධයෙන් වහා පරීක්ෂණයක් සිදු කර ප්‍රාදේශිය සභාවේ උපසභාපතිවරයා සම්බන්ධයෙන් නීතිමය ක්‍රියාමාර්ග ගන්නා ලෙස ගුරු විදුහල්පති වෘත්තිය සමිති සන්ධානය පොලිස්පතිවරයාගෙන් වැඩි දුරටත් ඉල්ලා සිටි.
” එසේ නොවන්නේ නම් මාවනැල්ල ප්‍රදේශිය සභා උපසභාපතිවරයා සිදු කළ මෙම පහරදීමට හා දෙමාපියන් පාසලෙන් එළවා දැමීමටත්, පාසලට බලහත්කාරයෙන් ඇතුල්වෙමින් ගුරුවරුන්ට තර්ජනය කිරීමට එරෙහිවත් දැඩි වෘත්තිය ක්‍රියාමාර්ගවල නිරත වීමට ගුරු විදුහල්පති වෘත්තීය සමිති සන්ධානය කටයුතු යොදන බව ද වැඩිදුරටත් දන්වා සිටිමු, ” යි එම පැමිණිල්ලේ වැඩි දුරටත් සදහන්ය.
ලංකා ගුරු සංගමයේ ජෝසප් ස්ටාලින්, ලංකා ගුරුසේවා සංගමයේ මහින්ද ජයසිංහ, සමස්ත ලංකා එක්සත් ගුරු සංගමයේ යල්වෙල පඤඤාසේකර හිමි, ශ්‍රී ලංකා ජාතික විදුහල්පති සංගමයේ මොහාන් පරාක්‍රම වීරසිංහ, ශ්‍රේණිධාරී විදුහල්පති සංගම් එකමුතුව සුගීෂ්වර විමලරත්න, විදුහල්පති සේවා සංගමයේ සුනිල් ප්‍රේමතිලක, ස්වාධීන අධ්‍යාපන සේවක සංගමයේ ජගත් ආනන්ද සිල්වා, ඒකාබද්ධ ගුරු සේවා සංගමයේ සංජීව බණ්ඩාර, ලංකා ප්‍රගති ගුරු සංගමයේ මයුර සේනානායක, කතෝලික ගුරු සංගමයේ නිර්මාලා ගමගේ, පුහුණු විද්‍යාපීඨ හා උපාධිධාරි ගුරු සංවිධානයේ ඩබ්.ඩබ්.ජේ.එල්.එච්. රොවෙල්, ලංකා ගෘහ වි. හා කෘෂි වි. ඩිප්ලෝ: සංගමයේ එන්.බී. චුලරත්න, ශ්‍රී ලංකා ඉස්ලාම් ගුරු සංගමයේ එම්.කේ. මොහොමඩ් නියාර්, ස්වාධීන ලංකා ගුරු සංගමයේ පී.එම්. පුංචිහෙට්ටි, ලංකා පිරිවෙන් ගුරු සේවා සංගමයේ මීගහජඳුරේ සීලානන්ද හිමි, සමස්ත ලංකා ගුරු උපදේශකවරුන්ගේ සංගමයේ එස්.ජී.එම්. සමරකෝන්, යන ගුරු සංගම් නායකයන් පොලිස්පතිට යොමු කළ පැමිණිල්ලට අත්සන් තබා තිබේ.
ශ්‍රී ලංකා ජාතික ගුරු සංගමය, කඳුරට ගුරු පෙරමුණ, ගුරු විමුක්ති පෙරමුණ, ශ්‍රී ලංකා ප්‍රජාතන්ත්‍රවාදී ගුරු සංගමය, ශ්‍රී ලංකා අධ්‍යාපන සමාජ සම්මේලනය, වතු ගුරු සංගමය, ජාතික ගුරු සභාව, එක්සත් ද්‍රවිඩ ගුරු සංගමය යන ගුරු සංගම්ද එම පැමිණිල්ලට සහාය දක්වා ඇත.
Facebook Comments
