සැබෑ සංහිඳියාවක් ගොඩනැංවීමට නම් යුද පීඩිතයන්ගේ විශ්වාසය දිනා ගත යුතුයි

0
374
wedding people
Loading...

ශ්‍රී ලංකාව තුල සැබෑ සංහිඳියාවක් ගොඩනැංවීමට නම් යුද පීඩිතයන්ගේ විශ්වාසය දිනාගත් වගවීම් ක්‍රියාවලියක අවශ්‍යතාව කැනඩා අගමැතිවරයා අවධාරණය කර සිටී.

දහස් සංඛ්‍යාත දෙමළ ජනතාවට මරු කැඳවමින් 34 වසරකට ඉහතදී දියත් කෙරුනු කළු ජූලි සංහාරය සිහිපත් කරමින් අගමැති ජස්ටින් ටෘඩෝ නිකුත් කළ නිවේදනයක දැක්වෙන්නේ යුද්ධයේ තුවාල සුව කිරීමට දිගටම කටයුතු කළ යුතු බවයි.

“ශ්‍රී ලංකාවේ සිවිල් යුද්ධයේ අඳුරු කාලපරිච්ඡේදය ගැන ආවර්ජනය කිරීමට අප ඉසුඹු ලන අවස්ථාවේ, පීඩාවට පත් සියලු දෙනාගේ තුවාල සුව කිරීමට අප දිගටම වැඩ කළ යුතුය,” යි අගමැති ටෘඩෝ පවසයි. “සකල ශ්‍රී ලාංකිකයන්ටම දීර්ඝ කාලීන සාමය සහ සංහිඳියාව උදා කරදෙන ජාත්‍යන්තර පරිශ්‍රම කැනඩාව විසින් අනුමත කරනු ලබයි. එහෙත්, යුද පීඩිතයන්ගේ විශ්වාසය සහ ප්‍රසාදය හිමිකරගන්නා වගවීම් ක්‍රියාදාමයක අවශ්‍යතාව අපි අවධාරණය කරමු.”

කළු ජූලියේ 34 වැනි සංවත්සරය සමරන දෙමළ ජනතාව සමග තමන්ද එක්වන බව පවසන කැනඩා අගමැතිවරයා ශ්‍රී ලංකාවේ සිවිල් යුද්ධයේදී වචනයෙන් කිව නොහැකි තරමේ විනාශයන්ට මුහුණ දුන් සැමට තමන්ගේ බලවත් කනගාටුව පල කරන බවද සිය නිවේදනයෙන් කියා සිටී.

Facebook Comments

Loading...