ශ්‍රී ලංකා – සිංගප්පූරු නිදහස් වෙළඳ ගිවිසුම යටතේ මෙරට කිසිදු වෘත්තිකයෙකුට අවස්ථා අහිමි වීමක් හෝ අසාධාරණයක් හෝ සිදු නොවන බව මෙන්ම මෙරට රැකියා වෙළඳපොළ විදේශිකයන්ට විවෘත කිරීමක් සිදු නොවන බවට අගමැතිවරයා සහතික වී තිබේ.
ශ්‍රී ලංකා ඉංජිනේරු ආයතනයේ සහ ශ්‍රී ලංකා ගෘහ නිර්මාණ ශිල්පී ආයතනයේ නියෝජිත පිරිසක් අරලියගහ මන්දිරයේ දී හමුවූ අවස්ථාවේදී අගමැති රනිල් වික්‍රමසිංහ මේ බව පැවසු බවයි රජයේ නිල වෙබ් අඩවිය පවසන්නේ.
නිදහස් වෙළඳ ගිවිසුම සම්බන්ධව විවිධ වෘත්තිකයන්ට තිබෙන ගැටළු සහ දුරාවබෝධයන් විසදා ගැනීම සඳහා නිරන්තරයෙන් සාකච්ඡා වාරයන් පැවැත්වීමට ද මෙහිදී තීරණය වී ඇත.
ගිවිසුම හා එහි උපලේඛණ සම්බන්ධයෙන් ගැටළු මතුවී ඇති තැන් පිළිබඳව, දැනුම් දෙන ලෙස ද, එවිට සත්‍ය තත්වය පැහැදිලි කර ගත හැකි බව ද අගමැති රනිල් වික්‍රමසිංහ පෙන්වා දී තිබේ.
ගිවිසුම ක්‍රියාත්මක වීම නිරීක්‍ෂණය කිරීමේ කටයුතුවලට ක්‍රියාශීලීව සම්බන්ධ වීමට ද නියෝජිතයෝ එකඟත්වය පළ කග ඇති අතර එම නිරීක්‍ෂණ අනුව ගිවිසුම වාරානුකූලව සංශෝධනය කරලීමේ අවකාශ ඇති බව ද මෙහිදී අවධාරණය කෙරුණ බවයි වෙබ් අඩවිය වාර්තා කරන්නේ.
වෙළඳ ගිවිසුම්වලට එළැඹිමේ පරමාර්ථය විදේශ ආයෝජන මෙරටට ඇද ගැනීමත්, ශ්‍රී ලාංකේය වෘත්තිකයන්ට විදේශ රැකියා අවස්ථා ඇති කිරීමත්, ලෝකයේ අනෙකුත් රටවල සමාගම් සමග මෙරට සමාගම්වලට ඒකාබද්ධව ව්‍යාපාර කිරීමට අවස්ථාව සැලසීම බව සංවර්ධන උපාය මාර්ග සහ ජාත්‍යන්තර වෙළඳ කටයුතු අමාත්‍ය මලික් සමරවික්‍රම මෙහිදි වැඩි දුරටත් කියා සිටියේය.
Facebook Comments
