නියඟයෙන් හා ගංවතුර බලපෑමෙන් සහල් අර්බුදයක්

0

දිවයිනේ වියලි කලාපයට බලපෑ නියඟය සහ ඇති වු හදිසි ගංවතුර තත්ත්වය හේතුවෙන් ශ්‍රී ලංකාවේ සහල් නිෂ්පාදන පහත වැටී දැඩි සහල් අර්බුදයකට මුහුණ පා සිටින බව දිවයිනේ ප්‍රධානතම ව්‍යාපාරිකයන්ගේ සංවිධානය අනතුරු අඟවයි.

අප්‍රේල් සිට සැප්තැම්බර් දක්වා යෙදෙන යල කන්නයේ අස්වැන්න 48% කින් පහත වැටෙන අතර පසුගිය ඔක්තෝම්බර් සිට මාර්තු දක්වා මහ කන්නයේ දී සහල් නිෂ්පාදනය 49% කින් පහත වැටුනු බව ශ්‍රී ලංකා වාණිජ මණ්ඩලය සිය නවතම ආර්ථික විශ්ලේෂණ වාර්තාවෙන් පෙන්වා දෙයි.

යල කන්නය සඳහා අපේක්ෂිත සහල් අස්වැන්න මෙට්‍රික් ටොන් 789,000 වන අතර එය 2016 වසරේ වාර්තාවූ මෙට්‍රික් ටොන් පහලොස් ලක්ෂයට සාපේක්ෂව පහල යාමක් බව පෙන්වා දෙන එම වාර්තාව පසුගිය වසරේ නිෂ්පාදිත සමස්ත සහල් මෙට්‍රික් ටොන් 4,420 න් මේ වසරේ අපේක්ෂා කරන නිෂ්පාදනය මෙට්‍රික් ටොන් මිලියන 2,267ක් බවද කියා සිටී.

කෙසේ වෙතත් අවදානම හමුවේ පරිභෝජනය සඳහා අවශ්‍ය වන සහල් හිඟයක් ඇතිවීම මැඩ පැවැත්වීම සඳහා ආනයන නීති රීති ලිහිල් කරමින් සහල් ආනයන කරුවන්ට සහල් ආනයනය සඳහා රජය අවසර ලබා දී තිබේ.

ඒ අනුව අමතර සහල් මෙට්‍රික් ටොන් පන්ලක්ෂයක් ආනයනය කිරීමට රජය සුදානම් වන අතර එමඟින් ශ්‍රී ලංකාවේ ඇතිවිය හැකි සහල් හිඟතාවය මගහැරගැනීම සඳහා පිටුවහලක් වනු ඇතැයි විශ්වාස කෙරේ.

ශ්‍රී ලංකාව දශක හතරකින් මුහුණ මුහුණ දෙන බරපතලම නියංසායට අගෝස්තුව වනවිට ගොදුරු වීමේ අවදානම ගැන එක්සත් ජාතීන්ගේ සංවිධානය අනතුරු අඟවා තිබුනේ මේ වසර මුලදී ය.

එම අභියෝගයට මුහුණ දීම සඳහා දැනට පවත්නා කෘෂිකාර්මික ප්‍රතිපත්ති වෙනත් ආහාර සුරක්ෂිතතා සහ පෝෂණ ප්‍රතිපත්ති සමගින් වහාම සමපාත කරමින් තිරසාර කෘෂිකාර්මික ප්‍රවේශයකට එළඹිය යුතු බව ලෝක ආහාර සංවිධානය මුල්වී පසුගිය පෙබරවාරියේ නිකුත් කළ සමීක්ෂණ වාර්තාවකින් නිර්දේශ කර තිබුනි.

Facebook Comments

wedding people