ශ්‍රී ලංකාවේ සියලූම දෙනාට වැදගත් උත්සවයක් ලෙස රාමසාන් උත්සවය හදුන්වාදෙන අගමැති රනිල් වික්‍රමසිංහ පවසන්නේ අද වන විට ලංකාවේ ප්‍රධානතම ආගමික උත්සව කාලයක් ලෙස රාමසාන් සමය හැදින්විය හැකි බවයි.
“ලංකාවේදී මෙම උත්සවය ඉස්ලාම් ආගම අදහන අයට පමණක් සීමා වෙලා නැහැ. ලංකාවේ සියලූම දෙනාට වැදගත් උත්සවයක් ලෙස අප මෙය සළකනවා. අද ශ්‍රී ලංකාවේ ප්‍රධානතම ආගමික උත්සව කාලයක් ලෙස රාමසාන් සමය හැදින්විය හැකියි. විවිධ ජාතීන් විවිධ ජන වර්ග ජීවත් වන රටක් ලෙස අප සියලූ දෙනාටම ගරු කළ යුතුයි. ඒ සියලූම ජන කණ්ඩායම්වලට තම තමන්ගේ සංස්කෘතිය බුක්ති විඳීමේ අයිතින් ලබා දිය යුතු. යි” අරලියගහ මන්දිරයේ පැවති රාමසාන් ඉෆ්තාර් උත්සවයට ජුනි 5 අගහරුවාදා සහභාගී වෙමින් අගමැතිවරයා කියා සිටියේය.
මෛත්‍රීපාල සිරිසේන ජනාධිපතිතුමා ප්‍රමුඛ රජයක් ලෙස මේ රටේ විවිධ ආගම් විවිධ ජන කොට්ඨාශ එකතු කර ගනිමින් ශ්‍රී ලාංකික රාමුව තුළ එය සමරන අතර එසේ නොමැතිනම් විවිධ ප්‍රශ්න ඇති වන බවත් ලංකාවෙත් එවැනි ගැටළු ඇති වු බව අගමැතිවරයා සදහන් කරයි.
පසුගිය මාර්තු මාසයේ තෙල්දෙණියේ දී සිදුවු මුස්ලිම් විරෝධී ප්‍රහාර සම්බන්ධයෙන් “ආණ්ඩුව කනගාටුව පළ කරනවා” යි කී අගමැති රනිල් වික්‍රමසිංහ ෆේස්බුක් තහනම් කරමින් අවශ්‍ය කටයුතු පාලනය කර නැවත නීතිය හා සාමය ඇති කල බව ප්‍රකාශ කළේය.
“ෆේස්බුක් තහනම් කරමින් අවශ්‍ය කටයුතු පාලනය කළා. මේ වන විට කිහිපදෙනෙක් රක්‍ෂිත බන්ධනාගාරගත කර තිබෙනවා. තවත් කිහිපදෙනෙක් ඇප මත නිදහස් කර තිබෙනවා. නීතියට අනුව ඒ සම්බන්ධව ඉදිරි වැඩකටයුතු සිදු කරනවා. ඒ වගේම එම ගැටළු සම්බන්ධව විවිධ පරීක්‍ෂණ ගණනාවක් මේ වනවිට අවසන් කර තිබෙනවා. ඒවායේ ලිපිගොනු 100 ට වැඩි ප්‍රමාණයක් නඩු පැවරීම සඳහා නීතිපති තුමාට යවා තිබෙනවා. ගැටළුවක් ඇති වූ අවස්ථාවක නීතිය සම්පූර්ණයෙන්ම ක්‍රියාත්මක කිරීම හරහා එම ගැටළු නැවත ඇතිවීම වළක්වා ගත හැකියි” අගමැතිවරයා වැඩි දුරටත් කියා සිටියේය.
Facebook Comments
