ශ්‍රී ලංකා පොදු ජන පෙරමුණෙන් අතාගත ජනාධිපතිවරණ අපේක්ෂකයා ලෙස තරඟ වැදීමට බලා සිටින හිටපු ආරක්ෂක ලේකම්වරයාට ඇමරිකාවේදී නඩු පවරා ඇති බව පොහොට්ටු පක්ෂ සභාපති පිළිගෙන තිබේ.
“මෙම සිද්ධීන් පැහැදිලිව මේ වසරේ අන්තිම ජනාධිපතිවරනේ ඉලක්ක කරගෙන කරපු දෙයක් කියලා පැහැදිලියි. මේ නඩු පැවරීම පිටුපස LTTEය හා දෙමළ ඩයස්පෝරාව සිටින බව බොහෝම පැහැදිලි,” යැයි මහාචාර්ය ජී.එල්. පිරිස් කොළඹ දී කියා සිටියේය.
ලසන්ත වික්‍රමතුංග ඝාතනය හා රෝයි මනොජ්කුමාර් සමාදානම් හට ත්‍රස්ත විමර්ශන ඒකකයේ රඳවා තුන් අවුරුද්දක් වධ හිංසා කිරීම සම්බන්ධව හිටපු ආරක්ෂක ලේකම් ගෝඨාභය රාජපක්ෂට එරෙහිව ඇමරිකාවේදී නඩු පවරා ඇත.
රෝයි මනොජ්කුමාර් වෙනුවෙන් සත්‍යය හා යුක්තිය සඳහා වන ජාත්‍යන්තර ව්‍යපෘතිය (ITJP), හවුස්ෆෙල්ඩ් ජාත්‍යන්තර නීතිඥ ආයතනය හා මානව හිමිකම් නීතිඥ ස්කොට් ගිල්මෝර් සමග එක්ව නඩු පවරන ලදී.
තම සංවිධානය විසින් පැවරූ නඩුවට හා අහිංසා වික්‍රමතුංග ගොනු කරන ලද නඩුවට අදාළ නොතීසි ද ඉරිදා රාත්‍රීයේ එකම ස්ථානයක දී බාර දුන් බව ITJP සංවිධානය නිවේදනයක් නිකුත් කරමින් කියා සිටී.
කෙසේ වෙතත්, එසේ නඩු පැවරීම ගෝඨාභය රාජපක්ෂගේ ඇමරිකානු පුරුවැසි භාවය ඉවත් කර ගැනීමට බාධාවක් නොවන බව ද මෙරට නීති විශාරදයකු වන පොහොට්ටු පක්ෂ සභාපතිවරයා අවධාරණය කළේය.
“අමානුෂිකත්වය කියන්නේ මොකක්ද කියලා මම තේරුම් ගත්තේ හිරේ ඉන්න කොටයි. මේතාක් කිසිම වගවීමක් සිදුවී නැහැ. ඒ නිසා යුක්තිය ඉටු කරවා ගැනීම වෙනුවෙන් මම මේ පළමු පියවර ගන්නේ සතුටින්. වධහිංසාවට ගොදුරු වූ ශ්‍රී ලංකීක වින්දිතයන්ට මේ ක්‍රියාවෙන් අනාගත බලාපොරොත්තුවක් ඇති වේවි.” යැයි රෝයි මනොජ්කුමාර් සමාදානම් ප්‍රකාශ කළේය.
“සමාදානම් මහතා දෙමළ කම නිසා හිරගත කොට වධහිිංසා කරනු ලැබූ ගිණිය නොහැකි තරම් සාමාන්‍ය වැසියන් අතරින් එක් අයෙක්,” යැයි මානව හිමිකම් නීතිඥ ස්කොට් ගිල්මෝර් නඩුව ගොණු කිරීමෙන් අනතුරුව පැවසීය.
ස්කොට් ගිල්මෝර් වොෂින්ටන් ඩීසී මුලස්ථාන කොටගත් ජාත්‍යන්තර මානව හිමිකම් නීතිඥයෙක් වන අතර ISIS ප්‍රාණ ඇපයේ සිටි ජේම්ස් ෆෝලි ගේ පවුලේ සාමාජිකයන් සහ බේබි ඩොක් ඩුවලියර් ගේ හයිටි වින්දිත්‍යන් ඇතළු ලොව පුරා වධහිංසාවන්ට හා යුද අපරාධ වලින් පීඩාවට පත් වූවන් නියෝජනය කර ඇත්තෙකි.
සන්ඩේ ටයිම්ස් මාධ්‍යවේදිනි මාරි කොල්වින් මරාදැමීම සම්බන්ධයෙන් සිරියාවේ අසාද් පාලනයට එරෙහිව පැවරූ නඩුවකින් 2019 ජනවාරියේ ඇමරිකානු ඩොලර් මිලියන 303.6 ක් දිනා දීමට ඔහු සමත් විය.
Facebook Comments
