නීති විරෝධී ඉන්දීය ට්‍රෝලර් යාත්‍රා මෙරට මුහුදේ මසුන් මැරීම නවතාලීමට අසමත්වීම සම්බන්ධයෙන් ධීවර ප්‍රජාව බලධාරීන්ට චෝදනා කරද්දී මසක් ඇතුලත දේශීය ධීවරයන් සියයකට අධික පිරිසක් අත්අඩංගුවට ගැනීමට නාවික හමුදාව සහාය ලබා දී තිබේ.
ශ්‍රී ලංකා නාවික හමුදාව සහ ශ්‍රී ලංකා වෙරළාරක්‍ෂක දෙපාර්තමේන්තුව එක්ව ඔක්තෝබර් 1 වැනිදා සිට 31 වැනි දින දක්වා කාලය තුළ බටහිර, නැගෙනහිර, උතුර, උතුරු මැද, වයඹ සහ දකුණ යන නාවික විධානයන් කේන්ද්‍ර කර ගනිමින් සිදු කළ සෝදිසි මෙහෙයුම් මගින් නීති විරෝධී ලෙස ධීවර කර්මාන්තයේ යෙදුණු පුද්ගලයන් 112 ක්, ලොරියක් සහ ධීවර යාත්‍රා 26ක් ඇතුළු ධීවර ආම්පන්න නීති‍යේ රැහැනට හසු කර දීමට කටයුතු කළ බව නාවික හමුදාව නිවේදනය කර තිබේ.
ධීවර බලපත් නොමැතිව ධීවර කර්මාන්තයේ නියැලීම, නීති විරෝධී ලෙස මුහුදු කූඩැල්ලන් ඇල්ලීම, පුපුරණ ද්‍රව්‍ය භාවිතයෙන් මසුන් ඇල්ලීම, බලපත්‍ර රහිතව රාත්‍රී කාලයේ කිමිදුම් කටයුතු සිදුකරමින් නීති විරෝධී ධීවර කර්මාන්තයේ නියැලීම, බලපත්‍ර කොන්දේසි උල්ලංගනය කරමින් වියලි මුහුදු කූඩැල්ලන් ප්‍රවාහනය, නීති විරෝධි ධීවර ආම්පන්න ප්‍රවාහනය, වියලි මෝර මසුන් සහ මෝර වරල් සන්තකයේ තබා ගැනීම, නීති විරෝධී දැල් භාවිත කිරීම සහ තහනම් ප්‍රදේශයන්හි ධීවර කටයුතු සිදු කිරීම යනාදී නීති විරෝධී ධීවර කටයුතු හේතුවෙන් මෙම පුද්ගලයින් සහ ධීවර ආම්පන්න නාවික හමුදා භාරයට ගෙන ඉදිරි නීතිමය කටයුතු සඳහා ඉදිරිපත් කිරීමට කටයුතු කළ බව නාවික හමුදාව වැඩි දුරටත් පවසයි.
මෙලෙස නාවික හමුදා භාරයට ගත් පුද්ගලයින් වයස අවුරුදු 19ත් 59ත් අතර වයසේ පසුවන කඩකර්ච්චේනෙයි, කට්ටපරිච්චාන්, කල්පිටිය, ත්‍රිකුණාමලය, නිලාවේලි, මන්නාරම, මුලන්කාවිල්, ඉච්චලම්පත්තු, කුච්චවේලි, පොඩුවකට්ටු, බේරුවල, තලෙයිමන්නාරම, වලලායි, ඉච්චම්පටාර්, කදිරවේලි, තෝපුර්, මුතූර්, කින්නියා, තොඩුවාව, මහවැව, චීන වරාය, තංගල්ල සහ කාත්තන්කුඩි යන ප්‍රදේශයන්හි පදිංචිකරුවන් බවට හඳුනාගෙන තිබේ.
අත්අඩංගුවට ගත් පුද්ගලයන්, ධීවර යාත්‍රා සහ අනෙකුත් ධීවර ආම්පන්න ඉදිරි නීතිමය කටයුතු සඳහා පුත්තලම, ත්‍රිකුණාමලය, කුච්චවේලි, මන්නාරම, මුලතිව්, මයිලඩි සහ කිරින්ද, යන ධීවර පරීක්‍ෂක කාර්යාල වෙතත් සාම්පුර්, තලංගම, නිලාවේලි හා කාත්තන්කුඩි පොලිස්ථාන වෙතත් භාරදී ඇත.
අල්ලස් චෝදනා
ට්‍රෝලර් බෝට්ටු යොදා ගනිමින් මෙරට මුහුදට ඇතුල් වන ඉන්දීය ධීවරයන් මුහුදු සම්පත් විනාශ කරමින්, තමන්ට එල්ල කරන තර්ජනයට එරෙහිව ආණ්ඩුව කිසිදු පියවරක් නොගැනීමට විරෝධය පාමින් ඔක්තෝබර් 17 වැනිදා උතුරේ ධීවර සංගම් එක්ව විරෝධය දියත් කර තිබුනි.
මුලතිව් සිට පේදුරු තුඩුව දක්වා බෝට්ටු පෙළපාලියකින් ගිය ධීවරයෝ අවසානයේදී ජන හමුවක් පැවැත්වූහ.
දෙමළ ජාතික සන්ධානයේ පාර්ලිමේන්තු මන්ත්‍රී එම්.ඒ. සුමන්දිරන් එම ජන හමුව අමතමින් සදහන් කර තිබුනේ පාර්ලිමේන්තු පනතක් මගින් තහනම් කර තිබියදීත්, ඉන්දීය ට්‍රෝලර් යාත්‍රා යොදා ගනිමින් ලංකා මුහුදේ මසුන් ඇල්ලීම සිදුවන්නේ මුදල් අල්ලස් මත බවයි.
පසුගිය කාලය පුරාම ඉන්දීය ධීවරයන්ගෙන් එල්ල වන තර්ජන ගැන ධීවර ඇමැතිවරයා දැනුවත් කළ ද ඊට එරෙහිව පියවර ගැනීමට කටයුතු නොකළ බවට උතුරු නැගෙනහිර ධීවරයෝ චෝදනා කරති.
“ලංකාවේ ආණ්ඩුවේ ධීවර ඇමතිවරයා මේ ට්‍රෝලර් තහනම් කරන්න පියවර ගන්නේ නැහැ. අපිට ආරංචි විදිහට මේ නීති විරෝධී ට්‍රෝලර් යාත්‍රා වලින් දවසකට රුපියල් 5000ක් ගන්නවා කියලා, මේ වගේ හොර වැඩ කරන්න එපා. අපේ ධීවරයන් වෙනුවෙන් පනත ක්‍රියාත්මක කරන්න,“ යැයි ද පාර්ලිමේන්තු මන්ත්‍රී එම්.ඒ. සුමන්දිරන් සදහන් කර තිබුනි.
කෙසේ වෙතත්, නාවික හමුදා යාත්‍රා සමග ගැටීමෙන් මහ සයුරේ මියගිය ඉන්දීය ධීවරයන් සම්බන්ධයෙන් පරීක්ෂණ පැවැත්වීමට ශ්‍රී ලංකාවේ ආණ්ඩුවට බලකරන ලෙස ඉල්ලා තමිල්නාඩු ධීවරයන් විරෝධතා පවත්වා තිබුණි.
සේයා – ශ්‍රී ලංකා නාවික හමුදාව
Facebook Comments
