අනුරාධපුර දිස්ත්‍රික්කයේ මෙතෝදිස්ත මධ්‍යස්ථානයකට අලුත් අවුරුද්දේ පුණ්‍ය සමයේදී ප්‍රචණ්ඩ ලෙස පහරදී පූජකවරුන් සහ බැතිමතුන් ට බැනවැදී තර්ජනය කළ ක්‍රිස්තියානි විරෝධී කලහකාරීන්ට නායකත්වය දුන්නේ පොහොට්ටුවේ ප්‍රාදේශීය නායකයකු බව හෙළිවී තිබේ.
කලහකාරීන්ට සහ පහර කෑ පුද්ගලයන්ට නායකත්වය දෙමින් ඔවුන්ගේ ප්‍රකාශකයා ලෙසින් කටයුතු කළේ “අනුරාධපුර නගර සභාවේ දේශපාලන පක්ෂයක් නියෝජනය කරන” අයකු බව මෙතෝදිස්ත අගරදගුරු හිමියෝ ප්‍රකාශ කරති.
“අහෝ… දැන් බළල් අත එළියට. ප්‍රහාරය පසුපස දේශපාලන හස්තයක් තිබේ,” යි ආසිරි පී පෙරේරා අගරදගුරු තුමා අනුරාධපුර පොලිසියට සිය නීතිඥයා සමග ගොස් පැමිණීමෙන් පසු සමාජ මාධ්‍ය ජාල ඔස්සේ ප්‍රකාශයක් කරමින් පවසා ඇත.
ප්‍රහාරකයන් සමග පොලිසියට පැමිණ සිටියේ අනුරාධපුර නගර සභාවේ පොහොට්ටු මන්ත්‍රී නලින් සිරිවර්ධන බව ජාතික ප්‍රතිපත්ති පිළිබඳ රාජ්‍ය අමාත්‍ය හර්ෂ ද සිල්වා හෙළි කර තිබේ.
“තව බල්ලෝ ආවොත් අඬු කඩනවා,” යි පොලිසිය තුළදී නාගරික මන්ත්‍රීවරයා තර්ජනය කළ බව අමාත්‍යවරයා සමාජ මාධ්‍ය ඔස්සේ ප්‍රකාශ කර ඇත.
ඔවුන් කණ්ඩායම පොලිසියේදී බලකර ඇත්තේ ශ්‍රී ලංකා මෙතෝදිස්ත සභාව විසින් ආබාධිතයන් වෙනුවෙන් කූඹිච්චන්කුලමේ පවත්වාගෙන යන ආගමික මධ්‍යස්ථානයට පිට පළාත් වල වන්දනාකරුවන් පැමිණීම තහනම් කරන ලෙසයි.
ඉකුත් ඉරිදා තරුණ පිරිසක් විසින් අනුරාධපුර නගරයෙන් කිලෝමීටර් 11 ක් පමණ දුරින් පිහිටි කූඹිච්චන්කුලම් යාඥා ගෘහයට පහර දුන්නේ පළමු වතාවට නොවන බව පවසන ශ්‍රී ලංකාවේ මෙතෝදිස්ත සභාවේ මහනාහිමියන් කියා සිටින්නේ මේ අවුරුද්ද තුල රට පුරා ක්‍රිස්තියානි විරෝධී ප්‍රචණ්ඩ ක්‍රියා තිහකට වැඩි ප්‍රමාණයක් සිදුවී ඇති බවයි.
කූඹිච්චන්කුලම් මධ්‍යස්ථානය ද කිහිප වතාවක් ප්‍රහාරයට ලක්වූ බව වාර්තා වීමෙන් පසු ඒ ගැන සොයා බැලීමට 14 ගොක් ඉරිදා ගොස්, දිනුක ප්‍රියශාන් සිල්වා දේවගැති තුමන් සමග පුණ්‍ය සමය තුලදී දේව මෙහෙය පවත්වන අවස්ථාවේ 25 දෙනකුගෙන් පමණ යුත් තරුණ කැලක් යාඥා ගෘහයට ප්‍රචණ්ඩ ප්‍රහාරයක් එල්ල කර තිබේ.
“ඔවුන් අපට කෑ කෝ ගැහුවා, ගල් මුල් එව්වා, විශාල ලෙස ගල් ප්‍රහාරයන් ආවා අපේ වහලට, ඒ වගේම රතිඤ්ඤා පත්තු කර කර අපේ නමස්කාර ස්ථානය ඇතුලට විසිකරා,” යි අගරදගුරු ආසිරි පී පෙරේරා කොළඹ මෙතෝදිස්ත සභා මුලස්ථානයේ දී මාධ්‍යවේදීන්ට කියා සිටියේය.
කෙසේ වෙතත් එලෙස පහරදී පූජකවරුන් සහ බැතිමතුන් ට බැනවැදී තර්ජනය කළ ක්‍රිස්තියානි විරෝධී කලහකාරීන් අධිකරණය හමුවට පැමිණවීමට පොලිසිය කටයුතු කර නැත.
ශ්‍රී ලංකා ජාතික ක්‍රිස්තියානි ධර්මදාන සන්ධානය (NCEASL) විසින් ගණන් බලා ඇති පරිදි ගෙවුනු මාස තුනහමාරේ දිවයින තුල එල්ලවී ඇති ක්‍රිස්තියානි විරෝධී ප්‍රහාර සංඛ්‍යාව 35 කි.
වත්මන් ආණ්ඩුවේ පාලනය පැවති ඊට පෙර අවුරුදු තුනේ කිතුනු ඇදහිල්ලට එරෙහි ප්‍රචණ්ඩ ප්‍රහාර ඇතුලු සිදුවීම් 363 ක් ඔවුන් විසින් ලේඛනගත කොට ඇත.
Facebook Comments
