ඉදිරි ජනාධිපතිවරණයට දෙමළ අපේක්ෂකයකු ඉදිරිපත් කර සිංහල බෞද්ධ ආවේශයක් ඇති පුද්ගලයකු නැවත වරක් ජනාධිපති ධුරයට පත් කිරීමට මහින්ද රාජපක්ෂ ප්‍රමුඛ බලවේගය උත්සාහ දරමින් සිටින බවට වාමාංශික නායකයෙක් අනතුරු අඟවයි.
මහින්ද රාජපක්ෂ ද බලයට පත්වුයේ දෙමළ ජන්ද වළක්වා සහ මුස්ලිම් ඡන්ද අවහිර කරමින් බව නව සම සමාජ පක්ෂ නායකයා පෙන්වා දී සිටී.
“කොටි සංවිධානයේ මතවාදය තුල ඉන්න අය හිතාගෙන ඉන්නේ අපි වෙන් වෙන්නම ඕනා. ඒකා කවදා හෝ යුද්ධයකින්ම කරලා කවදා හෝ වෙන් වෙන්න ඕනයි කියලා හිතාගෙන ඉන්න ජනතාවක් ඉන්නවා. ඒ ජනතාව විශාලයි කියලා හිතාගෙන ඉන්න අය ඉන්නවා,” යි ආචාර්ය වික්‍රමබාහු කරුණාරත්න කොළඹ පැවති මාධ්‍ය හමුවක දී පැවසීය.
ඇතැම් දෙමළ පිරිස් පවා ඒ අනුව යමින් තමන්ගේ වෙන්වීමේ අයිතිය දිනා ගැනීමට ලෝක අනුග්‍රහය ලබා ගැනීමට උත්සාහ දරන බව කී ආචාර්ය වික්‍රමබාහු කියා සිටියේ කොටි සංවිධානය විනාශ කිරීමට ශ්‍රී ලංකාවට බල කරන ලද්දේ ඉන්දීය හා ඇමරිකාව වැනි රටවල් බවට එම පිරිස් වලට අමතක වී ඇති බවයි.
“ඇමරිකාව හා ඉන්දියාව කොටි සංවිධාන ත්‍රස්ත සංවිධානයක් විදියට නම් කරලා. ඒක විනාශ කරලා විතරයි ඊළඟට අපිට කතා කරන්න පුලුවන් කියන මතයේ හිටපු අය. ඒ අය අදටත් ඉන්නෙ ඒ මතයේ.”
එබැවින් කොටි සංවිධානයේ මතය ඔස්සේ ගමන් කර දෙමළ ජනයා හට සටනකින් වෙන්වීමක් ලබා ගත හැකි බවට සිතීම ලොකු මුසාවක් ලෙසයි ආචාර්යවරයා විසින් හඳුන්වනු ලැබුවේ.
කෙසේ වෙතත් දෙමළ අපේක්ෂයකු ඉදිරිපත් කිරිමෙන් ජනාධිපතිවරණයට ඉදිරිපත් වන ලිබරල් අපේක්ෂයා පරාජය කිරිමට නොහැකි වනු ඇති බවට විශ්වාසය පළ කරන නව සම සමාජ පක්ෂ නායකයා සුළු ජාතීන්ගේ හා බෞද්ධ නොවන ආගමිකයන්ගේ මනාපයෙන් එජාප ජනාධිපතිවරයකු බිහි වෙතැයි අනාවැකි පළ කළේය.
Facebook Comments
