කොරෝනා කාලේ “රෝගී සත්කාර සේවා බිඳ වැටීමේ අවදානමක්”

විශේෂඥ වෛද්‍ය වාර්ෂික ස්ථානමාරු ලැයිස්තු සැකසීමේ ප්‍රමාදයක් පවතින බව පෙන්වා දෙන දිවයිනේ සෞඛ්‍ය සේවාවේ ප්‍රමුඛතම සංගමයක් ඒ හේතුවෙන් ශ්‍රී ලංකාවේ විවිධ ස්ථාන වල රෝගී සත්කාර සේවා බිඳ වැටිමට ඉඩ ඇති බවට සෞඛ්‍ය බලධාරීන්ට අනතුරු අඟවා තිබේ.

වසංගතයක් රටේ පැතිර යමින් පවතින වකවානුවක නිවේදනයක් නිකුත් කරමින් රජයේ වෛද්‍ය නිලධාරීන්ගේ සංගමය පවසන්නේ විශේෂඥ වෛද්‍ය සේවාව දිවයින පුරා සමානාත්මතාවයෙන් යුතුව පවත්වාගෙන යාමට නම් වාර්ෂික ස්ථානමාරු ක්‍රමය නිවැරදිව මෙන්ම නිශ්චිත කාලවකවානු සහිතව සිදු කළ යුතු බවයි.

“මෙම නිශ්චිත කාලවකවානු ආයතන සංග්‍රහයේ මැනවින් විග්‍රහ කර තිබේ.”

රජයේ වෛද්‍ය නිලධාරීන්ගේ සංගමයේ ලේකම් වෛද්‍ය සෙනාල් ප්‍රනාන්දුගේ අත්සනින් යුතුව පෙබරවාරි 16 අගහරුවාදා නිකුත් කර තිබෙන නිවේදනයේ දැක්වෙන පරිදි ඒ අනුව සෑම වසරකම අගෝස්තු මස 15 වැනිදාට ප්‍රථම විශේෂඥ වෛද්‍යවරුන් අතරින් ඉල්ලුම්පත් කැඳවීම සිදු කළ යුතුය.

වසරේ ඔක්තොම්බර් මස 01 දා වන විට මාරු වීම් ලැයිස්තුව ප්‍රකාශයට පත් කළ යුතු අතර, ඒ සම්බන්ධව අභියාචනා කැඳවීම ඔක්තොම්බර් මස 15 දා වන විට සිදු කළ යුතුය.

අනතුරුව වසරේ නොවැම්බර් මස 01 වන දා වන විට අභියාචනා කමිටුවේ අවසන් තීරණය අදාල නිලධාරින්ට දැනුම්දිය යුතුය.

එමගින් අලුත් වසරේ ජනවාරි 01 වැනිදා වන විට නව සේවා ස්ථාන කරා විශේෂඥ වෛද්‍යවරුන් හට පත් වීම් ලබා ගැනිමට ඇති අවස්ථාව තහවුරු කෙරෙන බවයි රජයේ වෛද්‍ය නිලධාරීන්ගේ සංගමය පවසන්නේ.

මෙමගින් විවිධාකාර පරිපාලන ගැටලු ඇති වීම වළක්වා ගත හැකි අතර, විශේෂඥ වෛද්‍යවරුන්ගේ දරුවන් හට පාසල් ලබා ගැනිමේදි ඇති විය හැකි ගැටලුද නිරාකරණයට අවස්ථාව සැලසෙන බව එම නිවේදනය මගින් වෛද්‍ය සෙනාල් ප්‍රනාන්දු අවධාරණය කර තිබේ.

එහෙත් අද වන තෙක් සෞඛ්‍ය අමාත්‍යංශය මගින් මෙම ක්‍රියාවලිය අවසන් කර 2021 ජනවාරි මස 1 වැනි දින ක්‍රියාත්මක විය යුතු විශේෂඥ වෛද්‍ය ස්ථානමාරු ක්‍රියාත්මක කිරීමට අවශ්‍ය ප්‍රමාණවත් අවධානයක් ලබා දීමට අපොහොසත් වී ඇති බවට වෛද්‍ය සෙනාල් ප්‍රනාන්දු පෙන්වා දෙයි.

“එහෙයින් රජයේ වෛද්‍ය නිලධාරින්ගේ සංගමය වශයෙන් සෞඛ්‍ය අධ්‍යක්ෂ ජනරාල්වරයාගේ කාරුණික මෙන්ම ඉක්මන් අවධානය මේ වෙත යොමු වෙතැයි අපි බලාපොරොත්තු වෙමු.”

එසේ නොමැති වුවහොත් දීප ව්‍යාප්ත සේවාවක් ලෙස පවත්වාගෙන යන වෛද්‍ය සේවාවේ, විශේෂඥ වෛද්‍යවරුන්ගේ සේවා ගැටලු ශ්‍රී ලංකාවේ විවිධාකාර ස්ථාන වල උද්ගත වීම හා එමගින් රෝගී සත්කාර සේවාවන් බිඳ වැටිම නොවැලැක්විය හැකි වනු ඇති බව රජයේ වෛද්‍ය නිලධාරීන්ගේ සංගමය අවධාරණය කර තිබේ.

එම නිවේදනයේ වැඩි දුරටත් දක්වා ඇත්තේ ශ්‍රී ලංකාව තුළ යුද්ධය ක්‍රියාත්මක වු සමයේදී පවා සියලු දිස්ත්‍රික්කයන් ආවරණය වන පරිදි විශේෂඥ වෛද්‍ය නිලධාරින් සේවයේ යෙදවීමට ක්‍රියා කිරීම තුලින් ලෝකයේ වෙනත් රට වලටද ආදර්ශයක් ගෙන දෙමින් ශ්‍රී ලංකාවේ සෞඛ්‍ය සේවය උසස් මට්ටමින් ගුණාත්මක හා සමානාත්මතාවයෙන් යුතුව සියලුම ප්‍රදේශයන් ආවරණය වන ලෙස පවත්වාගෙන යාමට හැකි වු බවයි.

යුද සමයේ GMOA සහාය

රජයේ වෛද්‍ය නිලධාරීන්ගේ සංගමයේ වත්මන් ලේකම් එසේ පැවසුවද , යුද සමයේදී වෛද්‍යවරුන් ඇතුලු රෝහල් කාර්ය මණ්ඩලයේත් රෝගීන්ගේත් ජීවිත අනතුරේ තිබියදී ඒ සම්බන්ධයෙන් කිසිදු මැදිහත් වීමක් නොකිරීම සම්බන්ධයෙන් එම සංගමය වෙතත් චෝදනා එල්ල වී තිබේ.

වෛද්‍යවරුන් ඇතුලු රෝහල් කාර්ය මණ්ඩලයේත් රෝගීන්ගේත් ජීවිත අනතුරේ හෙලමින් ශ්‍රී ලංකාවේ සිවිල් යුද්ධයේ අවසාන කාල පරිච්ඡේදය තුලදී වන්නි පළාතේ රෝහල් වලට බර අවි ප්‍රහාර ගසද්දී තමන් වෙනුවෙන් රජයේ වෛද්‍ය නිලධාරීන්ගේ සංගමය (GMOA) කිසිදු මැදිහත් වීමක් නොකළ බව යුද කලාපයේ සේවය කළ ජ්‍යෙෂ්ඨතම රජයේ වෛද්‍යවරයෙක් පස් වසරකට ඉහත දී හෙළි කර තිබුනි.

බෝම්බ ප්‍රහාර වලට ලක් වෙමින් දිවි නොතකා යුද පීඩිත භූමීයේ සේවය කළ තමන් ඇතුලු වෛද්‍ය වරුන් සීමිත පිරිසගේ ආරක්ෂාව වෙනුවෙන් පියවර ගැනීමේ වගකීම වෛද්‍ය සංගමය විසින් පැහැර හරින ලද බව ලන්ඩනයේ රුපවාහිනී මැදිරියක දී විශේෂ සාකච්ඡාවකට එක්වෙමින් මුලතිව් දිස්ත්‍රික්කයේ හිටපු ප්‍රාදේශීය සෞඛ්‍ය අධ්‍යක්ෂ තුරෙයිරාජා වර්ධරාජා ප්‍රකාශ කර තිබුනි.