සැකකරුවන් අධීක්ෂණය කිරීම වෙනුවෙන් පොලිස් ස්ථාන වෙත පැමිණීම සඳහා මහේස්ත්‍රාත්වරයාට බලය පැවරෙන පරිදි අපරාධ නඩු විධාන සංග්‍රහ පනත සංශෝධනය සදහා කැබිනට් මණ්ඩල අනුමැතිය හිමිව තිබේ.
යම් මහේස්ත්‍රාත්වරයකු පත් කර ඇති අධිකරණ කොට්ඨාසයේ පිහිටි පොලීසියේ, අත්අඩංගුවේ රදවා සිටින සැකකරුවෙක් අධීක්ෂණය කිරීම සදහා එම පොලිස්ථානයට අවම වශයෙන් මසකට එක් වරක්වත් පැමිණිමට අදාළ මහේස්ත්‍රාත්වරයාට බලය පැවරෙන පරිදි 1979 අංක 15 දරන අපරාධ නඩු විධාන සංග්‍රහය පනත සංශෝධනය කිරීම සදහා අමාත්‍ය මණ්ඩල අනුමැතිය ලබා දී ඇති බවයි රජය පවසන්නේ.
සිරගත කර සිටින පුද්ගලයන් අධීක්ෂණය කිරීමේ බලය මේතාක් කල් පැවතියේ ශ්‍රී ලංකා මානව හිමිකම් කොමිසම සහ ජාත්‍යන්තර රතු කුරුස සංවිධානය සතුවය.
එය අත්අඩංගුවේ කෙරෙන වධහිංසා සීමා කිරීමේ විධික්‍රමයක් බව විශ්වාස කෙරේ.
පසුගිය ආණ්ඩුව විසින් වධහිංසාවට එරෙහි එක්සත් ජාතීන්ගේ විකල්ප මූල ලේඛනයට 2017 නොවැම්බර් 17 දා ඇතුලත් වීමත් සමග මානව හිමිකම් කොමිසම උල්ලංඝන වලක්වා ලීමේ ජාතික යාන්ත්‍රණය ලෙස තහවුරු කරන ලදී. ඒ සමගම එයට සිරභාරයේ සිටින්නන සමග නිදහසේ කතා කිරීමටත්, ඔවුන් රඳවා සිටින තත්වය පරීක්ෂා කර බැලීමටත් අවස්ථාව සැලසේ. එමගින් ආණ්ඩුවට නිර්දේශ ඉදිරිපත් කිරීමේ නිල බලයක් හිමිවන බව කොමිසම පවසයි.
නව සංශෝධනය මගින් කොමිසමත්, ජාත්‍යන්තර රතු කුරුසයත් සතු සිරකරුවන් හමුවීමේ බලය සම්බන්ධයෙන් කවර වෙනස්කම් කරන්නේදැයි රජය ප්‍රසිද්ධියට පත් කර නැත.
පොලිසිය ඇතුලු රජයේ ආරක්ෂක අංශ විසින් සිදුකරනු ලබන වධහිංසා පිළිබඳ තොරතුරු මෑත කාලයේදීත් ලැබුණු බව මානව හිමිකම් පිළිබඳ මහකොමසාරිස් වරිය ශ්‍රී ලංකාව සම්බන්ධයෙන් ඉදිරිපත් කළ අලුත්ම වාර්තාවේ සඳහන් කොට තිබේ. පොලිස් අත් අඩංගුවේ සිදුවූ මරණවලට හේතුව වධහිංසනය වගට චෝදනා කෙරෙන බවද ඇය පවසයි.
රජයේ ප්‍රවෘත්ති දෙපාර්තමේන්තුව පෙබරවාරි 16 අඟහරුවාදා නිකුත් කර තිබෙන කැබිනට් තිරණ දැනුම් දීමේ මාධ්‍ය නිවේදනයේ දැක්වෙන පරිදි මහේස්ත්‍රාත් වරුන්ටත් සැකකරුවන් පරීක්ෂා කිරීමේ බලතල හිමිවන පනත් කෙටුම්පතක් මේ වන විටත් සකස් කර තිබේ.
එකී පනත් කෙටුම්පත රජයේ ගැසට් පත්‍රයේ පළ කිරීමටත්, ඉන් අනතුරුව පාර්ලිමේන්තුවට ඉදිරිපත් කිරීමටත් අධිකරණ අමාත්‍යවරයා ඉදිරිපත් කළ යෝජනාව පෙබරවාරි 15 සඳුදා රැස්වු අමාත්‍යමණ්ඩලය විසින් අනුමත කර ඇත.
Facebook Comments
