රජයේ හමුදා වලට චෝදනා එල්ලවන මානව හිමිකම් උල්ලංඝන සම්බන්ධයෙන් යුක්තිය ඉල්ලා උද්ඝෝෂණය කරන දෙමළ ජනතාවගේ ඔත්තු බලන පුද්ගලයකු විසින් ජාතික නිදහස් දිනයදා මාධ්‍යවේදියකුගේ නිදහස් වාර්තාකරණයට බාධා කර තිබේ.
අධිතාක්ෂණික කැමරාවකින් සන්නද්ධව සිටි නිල ඇඳුමක් රහිත එම පුද්ගලයා විසින් නිදහස් මාධ්‍යවේදී බාලනාදන් සතීස් පසෙකට තල්ලු කර ඇත්තේ වසර ගණනාවක් තිස්සේ බලහත්කාරයෙන් අතුරුදහන් කර සිටින සිය සමීපතමයන් සොයා දෙන ලෙස රජයට බලකරමින් පෙබරවාරි 4 ජාතික නිදහස් දිනයදා වව්නියාව බස් නැවතුම් පොළ ඉදිරිපිටදී අතුරුදහන් වුවන්ගේ ඥාතීන් විසින් විරෝධතාවයක් පවත්වද්දීය.
තමන්ගේ රාජකාරියට බාධා කිරීමට හේතු විමසු මාධ්‍යවේදියාට එම පුද්ගලයා පවසා ඇත්තේ බුද්ධි අංශ සඳහා තොරතුරු රැස් කිරීමට එම අවස්ථාවේ ඡායාරූප ගත කළ යුතු බැවින් ඔහු පැත්තකට තල්ලු කළ බවයි.
මාධ්‍යවේදියකු වන තමන්ද විරෝධතාවය වාර්තා කිරීමේ කාර්යේ යෙදී සිටින බව එම පුද්ගලයාට බාලනාදන් සතීස් පවසා තිබේ.
නවීන පන්නයේ කැමරාවක් අත දරා සිටි බුද්ධි නිලධාරීයා එහිදී මාධ්‍යවේදියගෙන් ප්‍රශ්න කර ඇත්තේ ජංගම දුරකතනයකින් විඩියෝ ගත කිරීම සිදු කරන්නේ ඇයිද යනුවෙනි.
මාධ්‍යවේදී බාලනාදන් සතීස් සහ බුද්ධි නිලධාරියා අතර එම මොහොතේ සිදුවන සංවාදය පළාත් බද මාධ්‍යවේදීන්ගේ කැමරා කාචයට හසුව තිබුනි.
මාධ්‍යවේදී බාලනාදන් සතීස් ට සිදු කළ බාධා කිරීම සම්බන්ධයෙන් සහෝදර මාධ්‍යවේදීන් සිදු කළ ප්‍රශ්න කිරීම් හමුවේ එම පුද්ගලයා තමන් බුද්ධි නිලධාරියකු බව හෙළිකර තිබේ.
ඔහුට අමතරව සිවිල් ඇඳුමින් සැරසුණු තවත් පුද්ගලයන්ද අතුරුදහන් වුවන්ගේ ඥාතීන්ගේ විරෝධතාව වීඩියෝ ගත කරනු ප්‍රාදේශීය මාධ්‍යවේදීන් විසින් රූගත කර තිබේ.
එම දින වලම උතුරු නැගෙනහිර පළාත් සිසාරා දියත් කළ පස්දින පාද යාත්‍රාව රූපගත කිරීමෙන් අනතුරුව ආණ්ඩුව විසින් එහි නායකත්වයට එරෙහිව පොලිසිය හා උසාවිය යෙදවීම ආරම්භ කර ඇත.
ජනාධිපති ගෝඨාභය රාජපක්ෂ බලයට පත්වූ පසු යුද පීඩිතයන්ට එරෙහි ආරක්ෂක අංශ මෙහෙයුම් උත්සන්න වීම සම්බන්ධයෙන් ජගත් මානාව හිමිකම් මහකොමසාරිස් වරිය කම්පාව පල කොට තිබේ.
Facebook Comments
